EBERUNƆ 10
10
1Musa doka bi yã mana kũ àtɛn su takamɛ, adi kɛ yã pìinlo. Abire yãi sa dokɔ̃nɔ pì ona gɛ̃̀n baaakɔ̃ wɛ̃̀ kũ wɛ̃̀ɛo dì fɔ̃ à gbɛ̃ kũ òtɛn na Ludainɔ kɛ papana zikiro. 2Tó sa pì onaa gbã̀ bò donyĩrinɔnɛ gɛ̃̀n do ari gɔrɔ sĩnda pínkimɛ yã, de ń kù gbãna, ò a onaa tò. 3Yãpura gũn sa'onaa pì mɛ́ àdigɔ̃ gbɛ̃nɔ durunna yã dɔńgu wɛ̃̀ kũ wɛ̃̀ɛo. 4Zaakũ zùsa kũ blèkofĩnioo aru dì fɔ̃ à durunna kɛ̃ḿma zikiro. 5Abire yãi kũ Kirisi tɛn su andunia gũn, à pì Ludanɛ:
Ń ye sa'opɔ ke gbairo,
akũ n bisãsiri mɛ̀ɛ kɛ̀mɛnɛ.
6Sa'opɔ kũ òdi ká tɛ́n à tɛ́ kũ
kũ sa'opɔ kũ òdi o durunna yã musuo
dì kánguro.
7Akũ ma pì: Makũmɛ la!
Lákũ ò kɛ̃̀ takadan ma yã musu nà
ma su n pɔyenyĩna kɛmɛ, Luda.
8Káaku gĩa à pì, sa'ona kũ gbao kũ sa kũ òdi ká tɛ́n à tɛ́ kũo kũ sa kũ òdi o durunna yã musuo dì ká Ludaguro, à yeiro, bee kũ doka mɛ́ à dìtɛ. 9Akũ à pì, akãamɛ dí, a su a pɔyenyĩna kɛmɛ. À a káakupɔ kpà kpado a plade ditɛna yãi. 10Luda pɔyenyĩnaa pì kɛnaa gũn Yesu Kirisi a zĩda kpà sa'opɔ ũ gɛ̃̀n do, à tò ó kú adona Luda gbɛ̃nɔ ũ.
11Gɔrɔ sĩnda pínki sa'orinɔ dìgɔ̃ kú ń zĩ gũmmɛ, ògɔ̃ sa dokɔ̃nɔ kũ àdi fɔ̃ à durunna kɛ̃ḿma zikiro o gɛ̃̀n baaakɔ̃. 12Kirisi sɔ̃, à sa ò durunna yã musu gɛ̃̀n domɛ ari gɔrɔ sĩnda pínki, akũ à gɛ̀ɛ à vùtɛ Luda ɔplai. 13Zaa gɔrɔ kũ̀a à kú gwe, àtɛn dã Luda a ibɛrɛnɔ kɛarɛ a tìntin ũ. 14Zaakũ sa'ona gɛ̃̀n do pìi gũn, à tò gbɛ̃ kũ à gbã̀ bòńnɛnɔ gɔ̃̀ papana ari gɔrɔ sĩnda pínki. 15Luda Nini ɛ̀ra àtɛn yã pì owɛrɛ dɔ à pì:
16Ma bàka kunna kũńwo gɔrɔ birenɔ gbɛra yãn dí:
Mani ma dokayãnɔ dańnɛ ń nɛ̀sɛɛ gũn,
mani kɛ̃ ń swɛ̃̀ɛa.
17Akũ gbasa à pì:
Mani ń durunna kũ ń taarinɔ yã da doro.
18Lákũ à ń durunna kɛ̃̀ḿma nà, sa'ona ń yãi zɛ́ vĩ doro.
Ò na Ludai
19Abire yãi ma gbɛ̃nɔ, kũ Yesu aru gbãnao ó gɛ̃na Ludakukin zɛ́ vĩ kũ swɛ̃̀ɛo kpatɛna. 20À wɛ̃̀ndi zɛ́ dufu bòwɛrɛ a mɛ̀ɛ gãi à gɛ̃̀ kũoo lábure kpɛ ari Ludakukia. 21Lákũ ó sa'ori zɔ̃kɔ̃ vĩ nà Luda ɔnkũri ũ, 22ò na Ludai kũ nɛ̀sɛ doo kũ a náanikɛna sikaa sario kũ swɛ̃̀ kũ ò pìpi ò taari laasun bò a gũnwo kũ mɛ̀ kũ ò a zú ò kũ í swáswao. 23Ògɔ̃ tãmaa kũ o zɛo kũna gíngin, zaakũ Luda a lɛ́ sɛ̀, akũsɔ̃ à náani vĩ. 24Ò laakari dɔkɔ̃a, ò tɛ́ kákɔ̃gu yenyĩ kũ yãmanakɛnaao yã musu. 25Òsun pã kpá ó kɔ̃kakaranaai lákũ gbɛ̃kenɔ dì kɛ nàro. Ò lɛ́ dakɔ̃a, atɛ̃nsa lákũ a è Dikiri sugɔrɔ tɛn ká kãni nà.
26Tó o yãpura mà o dɔ̃̀, tó o gi ótɛn durunna kɛ, sa'ona kũ ani durunna kɛ̃wá kun doro. 27Pɔ́ kũ à gɔ̃̀wɛrɛ mɛ́ à de ògɔ̃ wɛ́ dɔ yãkpatɛi ũ kũ swɛ̃̀kɛ̃nguo kũ tɛ́ gbãna kũ ani Luda ibɛrɛnɔ kakatɛo. 28Òdi gbɛ̃ kũ à gì Musa doka dai dɛ a wɛ́ gwanaa sari gbɛ̃nɔn pla ke aakɔ̃ sèedakpanaa musu. 29Tó gbɛ̃ gɛ̀sɛɛ pɛ̀tɛ Luda Nɛ́a, akũ à Luda bàka kunna kũńwo aru kũ à gbã̀ bòarɛ gya bò, akũ à Nini Gbɛ̃kɛkɛnnɛri sɔ̃̀sɔ̃, àgɔ̃ dɔ̃ kũ a wɛ́tãmma nigɔ̃ zɔ̃kɔ̃ de abirekũla manamana. 30Zaakũ ó yã díkĩna òri dɔ̃ à pì, akãa mɛ́ áni fĩna boḿma, akãa mɛ́ áni fĩna bońnɛ. Ò pì dɔ, Dikiri ni yãkpatɛ kɛ kũ a gbɛ̃nɔ. 31Yã pãsĩmɛ, tó n lɛtɛ n da Luda Wɛ̃̀ndide ɔĩ.
32À laasun lɛ́ á kunna yãa. Á wɛ́kɛ̃naa gbɛra a wari fɔ̃̀ á ɔsi zɔ̃kɔ̃ kanaa gũn. 33Zĩkenɔa òdi á sɔ̃sɔ̃, òdi á wɛ́ tã pari gũn. Zĩkenɔa adì zɛ kũ gbɛ̃ kũ òtɛni wɛ́ tã lɛnɔ. 34A purusunanɔ wɛ̃nda dɔ̃̀. Kũ ò á pɔ́nɔ sìáwa, a we kũ pɔnnao, zaakũ á dɔ̃ kũ á aruzɛkɛ mana kũ anigɔ̃ kun gɔrɔ sĩnda pínki vĩ. 35Abire yãi àsun tó á wɔ́rɔgɔ kũ à àre vĩárɛ zɔ̃kɔ̃ gɛ̃tɛáwaro. 36Séde àgɔ̃ mɛna vĩ de à pɔ́ kũ Luda a lɛ́ sɛ̀ le a pɔyenyĩnakɛnaa gbɛra.
37Zaakũ à gɔ̃̀ fítimɛ, ani gì kɛro,
kũ gbɛ̃ kũ àtɛn su ni kipa.
38Gbɛ̃ mana nigɔ̃ kun ma náani kũ àtɛn kɛ yãi,
ama tó à ɛ̀ra kpɛ, ma pɔ nigɔ̃ nnaro.
39Gbɛ̃ kũ òdi boru kũ kpɛo ò ń zĩda kakatɛnɔn ó ũro. Gbɛ̃ kũ ò Luda náani kɛ̀ ò surabanaa lènɔn ó ũ.
Currently Selected:
EBERUNƆ 10: BB2005
Highlight
Copy
Compare
Share
Want to have your highlights saved across all your devices? Sign up or sign in
Bisã Bible © SIM International, 2005.
