EBERUNƆ 9

Luda bàka kunna kũńwo zĩ sa'onaa

1Luda bàka kunna kũńwo káaku donyĩ zɛ́ vĩ kũ Ludakuki kũ à kú zĩtɛo. 2Fitila kũ teburu kũ òdi burodi kátɛa Ludanɛɛo kú kpɛ́da kũ òdi pi gu kũ à kú adonan. 3Kpɛ́nɛ kũ òdi pi Ludakuki pì kú lábure plade kpɛ. 4A gũnn turaretitikpataki kũ ò pì kũ wuraao kun kũ Luda bàka kunna kũńwo àkpati kũ wura kútɛa mámmamwo. Wura lo kũ mana kú a gũn kú àkpatii pìi gũn kũ Haruna gò kũ à lá bɔ̀tɔɔ pàao kũ Luda yãditɛna gbɛ̀ anlonɔo. 5Àkpatii pìi musu kɛrubu gakuridenɔn kú durunnakɛ̃mmakila. Pɔ́ pìnɔ bɔkɔtɛna dodo gɔrɔn díro.

6Ń katɛna lɛ gũn, sa'orinɔ dìgɔ̃ gɛ̃ kpɛ́da gũn gɛ̃̀n baaakɔ̃ ò ń sa'ona zĩ kɛ. 7Sa'oriki mɛ́ àdi gɛ̃ kpɛ́nɛ wɛ̃̀ do gɛ̃̀n do, akũsɔ̃ àdi gɛ̃ aru sariro. Àdi aru pì fãfã a zĩda durunna yãi kũ a gbɛ̃nɔ pɔ́ kũ ò kɛ̀ dɔ̃nasarikɛ gũnwo. 8Luda Nini tɛn mɔwɛrɛ, gɔrɔ kũ kpɛ́ káaku pì kun, Ludakuki zɛ́ wɛ̃naro. 9Abirekũ tɛn yã lɛkɔ̃awɛrɛ kũ tera yão à pì, pɔ́ kũ donyĩrii dì Luda gbanɔ kũ sa'opɔ kũ àdi kpáanɔ dì fɔ̃ à a nɛ̀sɛ danɛ dokɔ̃nɔ swáswaro. 10Yã ditɛnaa pìnɔ bi mɛ̀barayãmɛ. Pɔ́ble kũ pɔ́minaao kũ gbã̀bona buri sĩnda pínkio yãmɛ. Ò dìtɛ ari zɛ́ dufu gɔrɔ gɔ̃ kámɛ.

Luda bàka kunna kũńwo dufu sa'onaa

11Akũ Kirisi sù yã mana kũ à kà tera sa'oriki ũ. À gɛ̃̀ bizakuta kũ à zɔ̃kɔ̃ akũsɔ̃ à papana de a káakupɔla gũn, kũ bisãsiri mɛ́ à dɔ̀ro, andunia díkĩna pɔ́n sɔ̃ro. 12Adi gɛ̃ Ludakukin kũ blè ke zù aruoro, à gɛ̃̀ kũ a zĩda aruo gɛ̃̀n domɛ, à gbɛ̃nɔ bòo ari gɔrɔ sĩnda pínki. 13Zaakũ òdi blè aru kũ zùsa aruo kũ zùnunu kũ ò kpàta túbuo fãfã gbɛ̃ kũ ò gbãsĩnɔa ò gbã̀ boońnɛ, 14oni Kirisi pɔ́ o dɔ yá? À a zĩda kpà Ludaa mamberu sari kũ Nini kũ àdigɔ̃ kun gɔrɔ sĩnda pínki gbãnao. A aru dì ó swɛ̃̀ pípiwɛrɛ bona yã pã kɛkɛna pìnɔ gũn, de ò zĩ kɛ Luda Wɛ̃̀ndidenɛ.

15Abire yãi Kirisi mɛ́ à Luda bàka kunna kũńwo dufu yãkɛkɛri ũ, de gbɛ̃ kũ Luda ń sísinɔ wɛ̃̀ndi kũ àdi lákaro kũ à a lɛ́ sɛ̀ le yãi. À gà de à ń bo, à taari kũ ò kɛ̀ Luda bàka kunna kũńwo káakupɔ yã musunɔ kɛ̃ḿma. 16Tó ò ye ò zĩ kɛ gbɛ̃ lɛ́gbɛditɛnaaa, sé ògɔ̃ dɔ̃ sãnsãn kũ ade gà, 17zaakũ ga gbɛran lɛ́gbɛɛ dìgɔ̃ gbãna vĩ. Tó lɛ́gbɛditɛri kpɛ́ bɛ̃nɛ, lɛ́gbɛ dìgɔ̃ gbãnaro. 18Abire yãin odi Luda bàka kunna kũńwo káakupɔ pì sa kɛ aru sariro. 19Kũ Musa doka yãditɛnanɔ ò gbɛ̃ sĩnda pínki wára, à sãkã tɛ̃ra zónzon kũ sɛ̃̀sɔ̃vlãoo sɛ̀ à zɔ̃̀ zùsanɛ bɔ̀rɔ kũ blèkofĩni aru kũ ò yã̀katɛ kũ íooa, à fã̀fã Musa dokaa kũ gbɛ̃nɔo dɔ ń pínki 20à pì, Luda bàka kunna kũńwo arun gwe, kũ à dìtɛárɛ à kũna. 21Lɛn Musa aru fã̀fã bizakutaa kũ sa'ona zĩkɛbɔnɔo dɔ pínki. 22Doka gũn aru mɛ́ àdi gbã̀ bo pɔ́ daside pínkinɛ. Arukɔtɛnaa sari durunnanɔ kɛ̃mmana kunlo.

Kirisi a zĩda kpà sa'opɔ ũ durunna mìdɛna yãi

23Zaakũ à kɔ̃ sìo ò gbã̀ bo pɔ́ kũ ò kú ludambɛ taka pìnɔnɛ lán abire bà, sa'opɔ kũ à de abirekũla kɔ̃ sì kũ ludambɛ pɔ́ pìnɔ. 24Zaakũ Kirisi dí gɛ̃ Ludakuki taka kũ bisãsiri bònlo, à gɛ̃̀ a yãpuran ludambɛmɛ, gu kũ à kun tera ó Zɛkũnwode ũ Luda arɛ. 25Sa'oriki dì gɛ̃ Ludakukin kũ pɔ́kãde aruo wɛ̃̀ kũ wɛ̃̀ɛo, ama Kirisi dí gɛ̃ de à a zĩda kpá gɛ̃̀n baaakɔ̃ yãiro. 26Tó adi kɛ lɛro, de àtɛn wari kɛ gɛ̃̀n baaakɔ̃ zaa anduniakatɛna gɔrɔa. Yãpura gũn à sù gɛ̃̀n domɛ gɔrɔ kũ andunia kà a kákia sà, à a zĩda kpà sa'opɔ ũ, de à durunna mì dɛo. 27Luda dìtɛ bisãsirinɛ à ga gɛ̃̀n do, gbasa à yãkpatɛ kɛ kãao, 28lɛn Kirisi a zĩda kpà gɛ̃̀n do lɛ, à gbɛ̃nɔ durunna dì a mìia dasi. Ani ɛra à su a gɛ̃̀n pladeo, adi kɛ durunna yãin doro, de à gbɛ̃ kũ ń wɛ́ dɔinɔ sura ba yãimɛ.

Currently Selected:

EBERUNƆ 9: BB2005

Highlight

Copy

Compare