BONAA 9
9
Pɔ́kãdenɔ gaganaa
1Dikiri pì Musanɛ: Ǹ gɛ́ ǹ Firi'auna le ǹ onɛ Dikiri Eberunɔ Luda pì, à ma gbɛ̃nɔ gbarɛ ò gɛ́ donyĩ kɛmɛnɛ. 2Tó à gì ń gbarɛi, tó à kpɛ́ ń kũna ari tera, 3mani ɔ tɔ̃ a pɔ́kãdenɔa a buran. Mani gagagyã pãsĩ ká a sɔ̃nɔn kũ a zaakinɔ kũ a lakuminɔ kũ a zùnɔ kũ a sãnɔ kũ a blènɔ. 4Mani Isaraila pɔ́kãdenɔ dɔ̃kɔ̃nɛ kũ Misilanɔ pɔ́nɔo. Isarailanɔ pɔ́kãdenɔ ke ni garo. 5Makũ Dikiri ma a gɔrɔ dìtɛ. Zian mani abire kɛ bùsun la.
6Kũ gu dɔ̀, akũ Dikiri kɛ̀ lɛ. Misilanɔ pɔ́kãdenɔ gàga pínki, ama Isarailanɔ pɔ́kãdenɔ ke dí garo. 7Firi'auna yã kũ à kɛ̀ pìi gbɛ̀ka, à mà Isarailanɔ pɔ́kãdenɔ ke dí garo, ama a sã kpɛ́ gbãna, à gì gbɛ̃ pìnɔ gbarɛi.
Bɔ̀bũnu kana Misilanɔgu
8Dikiri pì Musanɛ kũ Harunao: À tãmakpɛ túbu dã okũ dodo, Musa fã Firi'auna arɛ. 9Ani da Misila bùsula pínki lán lukutɛ̃ bà, ani kɛ bisãsirinɔnɛ kũ nɔ̀bɔnɔ bɔ̀bũnu ũ gu sĩnda pínkia. 10Akũ ò tãmakpɛ túbu sɛ̀tɛ ò gɛ̀ɛo Firi'auna kĩnaa. Kũ Musa túbu pìi fã̀ musu, akũ à kɛ̀ bisãsirinɔnɛ kũ nɔ̀bɔnɔ bɔ̀bũnu ũ. 11Ɛzɛdenɔ dí fɔ̃ ò gɛ̀ɛ Musa kĩnaaro bɔ̀bũnu pìnɔ yãi, zaakũ à dàńla kũ Misilanɔ ń pínki. 12Akũ Dikiri Firi'auna kùu kɛ̀ gbãna, lákũ à ò Musanɛ nà, akũ à gì ń yã mai.
Legũgbɛ manaa
13Dikiri pì Musanɛ: Ǹ futɛ kɔnkɔkɔnkɔ ǹ gɛ́ ǹ Firi'auna le, ǹ onɛ makũ Dikiri Eberunɔ Luda ma pì, à ma gbɛ̃nɔ gbarɛ ò gɛ́ donyĩ kɛmɛnɛ. 14Tera sà mani yã pãsĩ pínki daala kũ a ìbanɔ kũ a gbɛ̃nɔ, de àgɔ̃ dɔ̃ kũ andunia gũn pínki gbɛ̃ke de lán ma bàro. 15Zaakũ tó ma ɔ tɔ̃̀ḿma ma gagagyã kàńgu yã, de àkũ kũ a gbɛ̃nɔ làka andunia gũn. 16Ma a kà kpatan de mà a gbãna mɔnɛ, ò ma tɔ́ kpá andunia gũn pínki. 17Lákũ àtɛni a zĩda bi, à gì ma gbɛ̃nɔ gbarɛi ari tera, 18zia mandara'i mani tó legũgbɛ pãsĩ ma manamana, legũgbɛ kũ a taka buri dí ma Misila zikiro zaa lákũ ò a kàtɛ nà ari kũ a gbãrao. 19Ǹ onɛ à gbɛ̃nɔ zĩ ò a pɔ́kãdenɔ kũ pɔ́ kũ à vĩ buranɔ sɛ́tɛ ò káka kpɛ́n pínki. Bisãsirinɔ kũ pɔ́ kũ ò kú bàainɔ, tó òdi gɛ̃ kũńwo kpɛ́nlo, legũgbɛ ni maḿma oni gagamɛ.
20Firi'auna ìba kenɔ vĩna kɛ̀ Dikiri yãnɛ, ò ń zĩkɛrinɔ kũ ń pɔ́kãdenɔ kàka kpɛ́n. 21Ama gbɛ̃ kũ odi Dikiri yã daronɔ ń zĩkɛrinɔ kũ ń pɔ́kãdenɔ tò bàai. 22Akũ Dikiri pì Musanɛ: Ǹ ɔ sɛ́ musu, legũgbɛ ni ma bisãsirinɔ kũ pɔ́kãdenɔ kũ burapɔnɔa Misila bùsu gu sĩnda pínkia. 23Kũ Musa a gòo dɔ̀ musu, Dikiri tò legũ tɛn pũtã, àtɛn ma kũ gbɛ̀ɛo, àtɛn pí, akũ sura tɛn kipa zĩtɛ. Dikiri legũgbɛ kà Misilanɔgu. 24Legũgbɛ tɛn ma, legũ tɛn pí. Legũgbɛ pì pãsĩ. Zaa lákũ Misila bùsu kun nà, legũ dí taka buri dí ma zikiro. 25Legũgbɛɛ pì pɔ́ kũ ò kú bàai Misila bùsu gũnnɔ ásaru kɛ̀ pínki, bisãsirinɔ kũ pɔ́kãdenɔ kũ burapɔnɔ pínki. À sɛ̃̀ntɛ línɔ ɛ̀'ɛ pínki. 26Gosɛ̃ bùsu gu kũ Isarailanɔn kunn legũgbɛɛ pì dí kánlo ado.
27Firi'auna Musa kũ Harunao sìsi à pìńnɛ: Tera sà ma durunna kɛ̀. Dikiri yã mɛ́ à nna, makũ kũ ma gbɛ̃nɔ taaridenɔn ó ũ. 28À kútɛ kɛnɛ. Legũpũtãna kũ legũgbɛ díkĩnao mɔ̀ lɛ. Mani á gbarɛ sa, mani gíárɛ doro. 29Musa pìnɛ: Tó ma bo wɛ̃tɛ kpɛ, mani ma ɔnɔ sɛ́ lei gɛna Dikiri kĩnaa, legũpũtãna ni zɛ, legũgbɛ ni láka, de ǹgɔ̃ dɔ̃ kũ zĩtɛ bi Dikiri pɔ́mɛ. 30Ama má dɔ̃ kũ mɔkɔ̃n kũ n ìbanɔ, átɛn vĩna kɛ Dikiri Ludanɛro ari tera.
31Nagã kũ gbadoo yàka, zaakũ nagã gĩnakɛ à pìa, gbado mure bò. 32Ése kũ werao dí yakaro, kũ òdi ma kpɛkpɛ yãi. 33Musa bò Firi'auna kĩnaa à gɛ̀ɛ wɛ̃tɛ kpɛ, à a ɔnɔ sɛ̀ lei gɛna Dikiri kĩnaa, akũ legũpũtãna kũ legũgbɛɛo zɛ̀, legũ dí ma doro. 34Kũ Firi'auna è legũ kũ legũgbɛɛo kũ legũpũtãnaao zɛ̀, akũ à kpɛ́ àtɛn durunna kɛ, a sã kpɛ́ gbãna, àkũ kũ a ìbanɔ. 35A kù kpɛ́ gbãna à gì Isarailanɔ gbarɛi, lákũ Luda dà Musanɛ à ònɛ nà.
Currently Selected:
BONAA 9: BB2005
Highlight
Copy
Compare
Share
Want to have your highlights saved across all your devices? Sign up or sign in
Bisã Bible © SIM International, 2005.
