BONAA 8
8
Blɔ̀nɔ dagulanaa
1Akũ Dikiri pì Musanɛ: Ǹ gɛ́ ǹ o Firi'aunanɛ, makũ Dikiri ma pì à ma gbɛ̃nɔ gbarɛ ò gɛ́ donyĩ kɛmɛnɛ. 2Tó à gì ń gbarɛi sɔ̃, mani tó blɔ̀nɔ da a bùsu gu sĩnda pínki la. 3Blɔ̀nɔ ni Nili pa ari ò bikũ bara, ò gɛ̃ a ɔnn ari a kpɛ́n, ò didi a gádoa. Ò gɛ̃ a ìbanɔ ɔnnɔ gũn kũ a gbɛ̃nɔ ɔnnɔ. Ò ká a kĩninɔ kũ a gónɔ gũn. 4Blɔ̀nɔ ni didia kũ a gbɛ̃nɔ kũ a ìbanɔ ń pínki.
5Dikiri ɛ̀ra à pì Musanɛ: Ǹ o Harunanɛ à a gò sɛ́ à dɔ swanɔla kũ swa'ɔnɛnɔ kũ ísɛ̃bokinɔ, blɔ̀nɔ ni da Misila bùsula. 6Kũ Haruna a gòo dɔ̀ Misila ínɔla, akũ blɔ̀nɔ bɔ̀tɛ ò dà bùsuu pìla. 7Akũ ɛzɛde pìnɔ kɛ̀ lɛ se ń ɛzɛdekɛ gũn, ò tò blɔ̀nɔ dà Misilala.
8Akũ Firi'auna Musa kũ Harunao sìsi à pì: À kútɛ kɛ Dikirinɛ à blɔ̀nɔ kɛ̃ma kũ ma gbɛ̃nɔ, mani á gbɛ̃nɔ gbarɛ ò gɛ́ sa oa. 9Akũ Musa pì Firi'aunanɛ: Ǹ gɔrɔ ditɛmɛnɛ mà kútɛ kɛnnɛ Dikirinɛ kũ n ìbanɔ kũ n gbɛ̃nɔ, de à blɔ̀nɔ kɛ̃mma kũ n ɔnnɔ ògɔ̃ kú swai ado. 10Firi'auna pì: Zia. Akũ Musa pì: Ani kɛ lákũ n ò nà, de ǹgɔ̃ dɔ̃ kũ gbɛ̃ke de lán Dikiri ó Luda bàro. 11Blɔ̀nɔ ni kɛ̃mma kũ n ɔnnɔ kũ n ìbanɔ kũ n gbɛ̃nɔ ògɔ̃ kú swai ado.
12Kũ Musa kũ Harunao bò Firi'auna kĩnaa, Musa wɛ́ kɛ̀ Dikiria blɔ̀ kũ ò dà Firi'aunalanɔ yã musu. 13Dikiri Musa wɛ́kɛ sì, akũ blɔ̀nɔ gàga kpɛ́nɔ gũn kũ ɔnnɔ kũ buranɔ. 14Ò ń kákara, akũ bùsu gbĩ sɔ̃̀ pínki. 15Kũ Firi'auna è à kɛ̀ sã̀na, a sã kpɛ́ gbãna, akũ à gì Musa kũ Harunao yã mai lákũ Dikiri ò nà.
Sàa dagulanaa
16Dikiri pì Musanɛ: Ǹ o Harunanɛ à a gò sɛ́ à zĩtɛ lɛ́o, bùsutiti ni li sàa ũ Misila gu sĩnda pínkia. 17Akũ ò kɛ̀ lɛ. Haruna a gòo sɛ̀ à zĩtɛ lɛ̀o, akũ bùsutiti lì sàanɔ ũ, ò dà bisãsirinɔla kũ nɔ̀bɔnɔ. Misila bùsutiti lì sàanɔ ũ pínki. 18Ɛzɛdenɔ yɔ̃̀ ò gwà se ń ɛzɛdekɛ gũn, akũ ò fùa. Sàanɔ dà bisãsirinɔla kũ nɔ̀bɔnɔ. 19Akũ ɛzɛdenɔ pì Firi'aunanɛ: Luda ɔgbɛɛmɛ. Ama Firi'auna sã kpɛ́ gbãna, à gì ń yã mai lákũ Dikiri ò nà.
Ífĩninɔ dagulanaa
20Dikiri pì Musanɛ: Ǹ futɛ kɔnkɔkɔnkɔ ǹ gɛ́ ǹ Firi'auna le gɔrɔ kũ àtɛn gɛ́ swai, ǹ onɛ makũ Dikiri ma ò, à ma gbɛ̃nɔ gbarɛ ò gɛ́ donyĩ kɛmɛnɛ. 21Tó à gì ń gbarɛi, mani ífĩninɔ daala kũ a ìbanɔ kũ a gbɛ̃nɔ kũ a kpɛ́nɔ. Misila kpɛ́nɔ ni pa kũ ífĩninɔ, bee zĩtɛ oni daala. 22Gɔrɔ birea mani Gosɛ̃ bùsu gu kũ ma gbɛ̃nɔn kun bo ado. Gwen ífĩninɔ ni dan gularo, de àgɔ̃ dɔ̃ kũ makũmɛ Dikiri ũ a bùsun. 23Mani ma gbɛ̃nɔ dɔ̃kɔ̃nɛ kũ a gbɛ̃nɔ. Zian sèedaa pì ni kɛ.
24Akũ Dikiri kɛ̀ lɛ. Ífĩninɔ kà Firi'auna ɔnn kũ a ìbanɔ ɔnnɔo. Misila yàka pínki ífĩninɔ yãi. 25Akũ Firi'auna Musa kũ Harunao sìsi à pì: À gɛ́ sa o á Ludaa bùsun la. 26Akũ Musa pìnɛ: Ani sí kɛ ò kɛ lɛro, zaakũ pɔ́ kũ óni sa o Dikiri ó Ludaa pì de Misilanɔnɛ tɛ̃̀ ũmɛ. Tó o sa ò kũ pɔ́ kũ à deńnɛ tɛ̃̀ ũo ń wára, oni ó pápa kũ gbɛ̀ɛo ò ó dɛdɛroo? 27Óni táa o gbárannan gɔrɔ aakɔ̃mɛ, gbasa ò sa o Dikiri ó Ludaa lákũ à òwɛrɛ nà. 28Akũ Firi'auna pì: Mani á gbarɛ à gɛ́ sa o Dikiri a Ludaa gbárannan, ama àsun gɛ́ zã̀ro. À kútɛ kɛnɛmɛnɛ. 29Musa pìnɛ: Tó ma ta, mani kútɛ kɛnɛ, ani ífĩninɔ kɛ̃mma zia kũ n ìbanɔ kũ n gbɛ̃nɔ. Ama ǹsun manafiki kɛ doro. Ǹ tó gbɛ̃nɔ gɛ́ sa o Dikiria. 30Kũ Musa bò Firi'auna kĩnaa, a kútɛ kɛ̀nɛ Dikirinɛ. 31Dikiri a wɛ́kɛ sì, akũ ífĩninɔ kɛ̃̀ Firi'aunaa kũ a ìbanɔ kũ a gbɛ̃nɔ. Adi gɔ̃ gukearo, bee mɛ̀n do. 32Ama Firi'auna sã kpɛ́ gbãna ari tera, à gì ń gbarɛi.
Currently Selected:
BONAA 8: BB2005
Highlight
Copy
Compare
Share
Want to have your highlights saved across all your devices? Sign up or sign in
Bisã Bible © SIM International, 2005.
