BONAA 10
10
Kwanɔ dagulanaa
1Dikiri pì Musanɛ: Ǹ gɛ́ Firi'auna kĩnaa, zaakũ ma a kù kɛ gbãna kũ a ìbanɔ, de mà a daboyã dínɔ kɛ ń tɛ́, 2de ǹ le ǹ o n nɛ́nɔnɛ kũ n daikorenɔ lákũ ma wɛ́ tã̀ Misilanɔa nà kũ daboyã kũ ma kɛ̀ ń tɛ́nɔ, àgɔ̃ dɔ̃ kũ makũmɛ Dikiri ũ. 3Akũ Musa kũ Harunao gɛ̀ɛ ò pì Firi'aunanɛ: Dikiri Eberunɔ Luda pì, ĩnigɔ̃ kun mìnatɛnaarɛ sari ari bɔrɛmɛɛ? Ǹ a gbɛ̃nɔ gbarɛ ò gɛ́ donyĩ kɛarɛ. 4Tó n gi ń gbarɛi, zia ani kwanɔ ká n bùsun. 5Ò da zĩtɛla, oni gu ero. Ò lɛ́tɛ pɔ́ kũ ò gɔ̃̀nnɛ legũgbɛɛ gbɛranɔa kũ línɔ pínki. 6Ò pa n kpɛ́nɔ gũn kũ n ìbanɔ pɔ́nɔ kũ Misilanɔ pɔ́nɔ pínki. N denɔ kũ n dizinɔ dí a taka e zikiro, zaa gɔrɔ kũ ò vùtɛ bùsu dín ari kũ a gbãrao. Akũ Musa ɛ̀ra à bò Firi'auna kĩnaa.
7Firi'auna ìbanɔ pìnɛ: Gbɛ̃ pìnɔ nigɔ̃ kisira dawá lɛ ari bɔrɛɛ? Ǹ gbɛ̃ pìnɔ gbarɛ ò gɛ́ donyĩ kɛ Dikiri ń Ludanɛ. Ń dɔ̃ kũ Misila kàkatɛroo? 8Akũ ò ɛ̀ra ò sù kũ Musao kũ Harunao Firi'auna kĩnaa, à pìńnɛ: À gɛ́ donyĩ kɛ Dikiri á Ludanɛ. Á dínɔ mɛ́ oni gɛ́ɛ? 9Musa wèa à pì: Nɛ́ fíti gbɛ̃ zɔ̃kɔ̃. Óni gɛ́ ó pínkimɛ kũ ó nɛ́gɔ̃gbɛ̃nɔ kũ ó nɛ́nɔgbɛ̃nɔ kũ ó sãnɔ kũ ó blènɔ kũ ó zùnɔ, zaakũ Dikiri dikpɛn ótɛn gɛ́ kɛ. 10Akũ à pìńnɛ: Tó ma á gbárɛ kũ á nɔgbɛ̃nɔ kũ á nɛ́nɔ á pínki, ásarumɛ, Dikiri á bo! À laakari kɛ! Átɛn wɛtɛ à fɛ̃ kũmaomɛ. 11Oi! Á gɔ̃gbɛ̃nɔ mɛ́ oni gɛ́ donyĩ kɛ Dikirinɛ, zaakũ lɛn a gbɛ̀ka lɛ. Akũ ò pɛ̀ḿma Firi'auna arɛ.
12Dikiri pì Musanɛ: Ǹ n ɔ dɔ Misila bùsula, kwanɔ ni ká ò sɛ̃̀ kũ lá kũ ò bùtɛ legũgbɛɛ gbɛranɔ ble pínki. 13Kũ Musa a gòo dɔ̀ Misilala, Dikiri bò kũ ĩao ifãboki kpa, àtɛn pá bùsuu pìia fãnantɛ̃ kũ gwãanio zɛnaa sari. Kũ gu dɔ̀, ifãboki ĩa pìi sù kũ kwanɔ. 14Akũ kwa pìnɔ sù ò dà Misila bùsula pínki. Ń dasi de a yã pɔ́nɔla, a taka ni kɛ ziki doro. 15Ò dà zĩtɛla gu sĩnda pínki, akũ zĩtɛ sira kũ̀. Ò sɛ̃̀ kũ lánɔ kũ línɛ kũ ò bò legũgbɛɛ gbɛranɔ blè pínki. Sɛ̃̀ɛ kũ láo kú Misila bùsun doro.
16Gwe gɔ̃̀nɔ Firi'auna Musa kũ Harunao sìsi à pì: Ma durunna kɛ̀ Dikiri á Ludanɛ kũ ákɔ̃nɔ. 17À sùru gɛ̃̀n do dí kɛmɛnɛ kũ ma durunnao, à kútɛ kɛmɛnɛ Dikiri á Ludanɛ à gaga dí kɛ̃ma. 18Kũ à bò Firi'auna kĩnaa, à kútɛ kɛ̀ Dikirinɛ. 19Akũ Dikiri bò kũ ĩa gbãnao ifãlɛtɛ kpa, à sù à kwanɔ sɛ̀tɛ à kà Isira Tɛ̃ran. Bee kwa mɛ̀n do dí gɔ̃ Misila doro. 20Ama Dikiri Firi'auna kùu kɛ̀ gbãna, akũ à gì Isarailanɔ gbarɛi.
Gusira dana Misilala
21Dikiri pì Musanɛ: Ǹ ɔ sɛ́ musu, gusira kũ oni fɔ̃ ò ɔ kɛa ni da Misilala. 22Kũ Musa a ɔ dɔ̀ musu, akũ gusira níkiniki dà Misila gu sĩnda pínkia ari gɔrɔ aakɔ̃. 23Òdi kɔ̃ ero, gbɛ̃ke dí bo a gbɛ̀nlo ari gɔrɔ aakɔ̃ pìia. Ama gupura kú gu kũ Isarailanɔn kun pínki.
24Akũ Firi'auna Musa sìsi à pì: À gɛ́ donyĩ kɛ Dikirinɛ kũ á nɔgbɛ̃nɔ kũ á nɛ́nɔ á pínki, ama à á sãnɔ kũ á blènɔ kũ á zùnɔ tó. 25Musa pì: Ǹ tó ògɔ̃ ó sa'opɔnɔ kũ sa'opɔ kũ òdi ká tɛ́n à tɛ́ kũnɔ kũna, de ò le ò Dikiri ó Luda gbagbao. 26Séto ò gɛ́ kũ ó pɔ́kãdenɔ, bee mɛ̀n do ni gɔ̃ro, zaakũ ń tɛ́n óni sa'opɔnɔ bon ò Dikiri ó Luda gbagbao. De ò kpɛ́ ò ká gwe, ó dɔ̃ pɔ́ kũ óni sɛ́, ò sa ooa gĩaro. 27Dikiri Firi'auna kùgbãna kũ̀, akũ adi we à ń gbarɛro. 28Firi'auna pì Musanɛ: Ǹ gomɛnɛ gwe! Ǹsun tó ó wɛ́ kɛ pla doro. Zĩ kũ ó wɛ́ kɛ̀ pla, n gamɛ. 29Akũ Musa pì: Lákũ n ò nà, óni kɔ̃ e doro.
Currently Selected:
BONAA 10: BB2005
Highlight
Copy
Compare
Share
Want to have your highlights saved across all your devices? Sign up or sign in
Bisã Bible © SIM International, 2005.
