BONAA 23
23
Yãkɛna a zɛ́a
1Àsun òpi baaru kpáro. Àsun zɛ kũ gbɛ̃ vãnio ɛ́kɛ sèedade ũro. 2Àsun tɛ́ parii yãvãnikɛnaa gũnlo. Àsun zɛ kũ pario yãkpatɛ gũn à bo yãzɛde kpɛro. 3Tó takaside yã nnaro, àsun zɛ kãaoro. 4Tó n ibɛrɛɛ zù ke a zaaki sã̀tɛ akũsɔ̃ n kpakũ kãao, ǹ a kũ ǹ gɛ́onɛ bɛ. 5Tó n n zãnguri zaaki è àtɛn fu asoa, ǹ kpái, ǹsun a tónlo.
6Tó takaside yã nna, àsun bo a kpɛro. 7À kɛ zã̀ kũ manafikio. Àsun taarisaride ke gbɛ̃ mana dɛro, zaakũ mani tó taaride bo pãro. 8Àsun gusarɛgba síro, zaakũ gusarɛgba dì tó wɛ́denɔ vĩna kũmɛ, akũsɔ̃ àdi gbɛ̃ mananɔ yã litɛ kpɛdangara. 9Àsun bòasu wɛ́ tãro. Á bòasukɛ dɔ̃, zaakũ bòasunɔn á ũ yã Misila. 10Àgɔ̃ pɔ́ tɔ̃ á buranɔa à kɛkɛ ari wɛ̃̀ suddo, 11a wɛ̃̀ suppladen à tó zĩtɛ kámma bo à ĩam pá, de á takasidenɔ le ò a zã̀ kũ à bùtɛ gwenɔ kɔ̃nɔ wɛ, nɔ̀bɔsɛ̃ntɛnɔ le ò a kpara só. À kɛ lɛ dɔ kũ á geepi búo kũ á kùkpɛo. 12Àgɔ̃ zĩ kɛ ari gɔrɔ suddo, a suppladen àgɔ̃ kámma bo, de á zùnɔ kũ á zaakinɔ le ò kámma bo, akũsɔ̃ á zɔ̀nɔ kũ bòasunɔ ni le ò ĩam pá. 13Àgɔ̃ yã kũ ma òárɛnɔ kũna pínki. Àsun tãnanɔ tɔ́ síro. Òsun ń tɔ́ ma á lɛ́n sero.
Dikpɛ mɛ̀n aakɔ̃nɔ
(Bon 34:18-26)
14Wɛ̃̀ kũ wɛ̃̀ɛo àgɔ̃ su dikpɛ kɛmɛnɛ gɛ̃̀n aakɔ̃. 15Àgɔ̃ Burodi Futɛnasari dikpɛ kɛ lákũ ma dìtɛárɛ nà, àgɔ̃ burodi futɛnasari só ari gɔrɔ suppla mɔ kũ òdi pi Abibu gũn a gɔrɔa, zaakũ mɔ pìi gũnn a bɔtɛn Misila. Gbɛ̃ke sún su ma kĩnaa ɔkoriro. 16Àgɔ̃ Pɔ́kɛ̃na dikpɛ kɛ gɔrɔ kũ a na pɔ́kɛ̃naaa, à á burapɔ káakunɔ kpáma. Àgɔ̃ Pɔ́dufublena dikpɛ kɛ wɛ̃̀ lakanaaa, gɔrɔ kũ a á burapɔnɔ kàkara pínki. 17Wɛ̃̀ kũ wɛ̃̀ɛo gɛ̃̀n aakɔ̃ á gɔ̃gbɛ̃ sĩnda pínki su kɔ̃kakarana kɛ makũ Dikiri á Luda arɛ. 18Àsun pɔ́futɛna kpáma lɛɛlɛ kũ sa'opɔ aruoro. Àsun dikpɛ sa'opɔ nísi ditɛ gu dɔaro. 19Àgɔ̃ gɛ́ ma Dikiri á Luda ɔnn kũ á burapɔ káakunɔo. Àsun blènɛ nɔ̀bɔ kuku kũ a da yɔ̃'ioro.
Luda Malaika ni do a gbɛ̃nɔnɛ arɛ
20Mani malaika gbarɛ à doárɛ arɛ à á dãkpã zɛ́n à ká kãáo gu kũ ma kɛ̀kɛn. 21À laakari dɔ a yãa à a yã ma. Àsun bo a kpɛro, zaakũ ani sùru kɛ kãáo á taari yã musuro kũ ma tɔ́ kúa yãi. 22Tó a a yã mà akũsɔ̃ a yã kũ ma òárɛ kɛ̀ pínki, manigɔ̃ de á ibɛrɛnɔ ibɛrɛ ũmɛ, á wɛtɛrinɔ wɛtɛri ũ. 23Ma malaika pì ni doárɛ arɛ à gɛ́ zɛárɛ bùsu kũ Amɔrinɔn kun kũ Itinɔ kũ Pɛrizinɔ kũ Kanaanɔ kũ Ivinɔ kũ Yebusinɔo, mani ń kakatɛ. 24Àsun kútɛ ń tãnanɔnɛ à dońyĩro, àsun ń kɛna kɛro. À ń gboro à ń gbɛ̀nɔ wíwi. 25À dɔ Dikiri á Ludai, ani arubarika daárɛ á pɔ́blen kũ á pɔ́minaao, ani gyãnɔ kɛ̃áwa. 26Nɔgbɛ̃nɔ ni nɔ̀ bɔtɛ á bùsunlo akũsɔ̃ para nigɔ̃ kunlo. Mani á wɛ̃̀ndi bà dɔárɛ kũ mɔ̀kakɔ̃anaao. 27Mani vĩna dada gbɛ̃ kũ ò kú á arɛnɔi, mani tó bídi gɛ̃ buri kũ a ka ń kĩnaanɔgu, mani tó á ibɛrɛnɔ kpɛ liárɛ. 28Mani zúmantɛ̃nɔ gbarɛ á arɛ ò ká Ivinɔgu kũ Kanaanɔ kũ Itinɔ ò pɛ́ḿmaárɛ. 29Adi kɛ mani pɛ́ḿmaárɛ wɛ̃̀ do gũn gɔ̃̀nɔnlo, de bùsuu pì sún gɔ̃ lákpɛ ũ nɔ̀bɔsɛ̃ntɛnɔ daálaro yãi. 30Manigɔ̃ pɛ́ḿmaárɛ busɛbusɛmɛ ari à kɛ dasi à ká à bùsu sí. 31Mani á bùsu lɛ́ daárɛ zaa Isira Tɛ̃ra lɛ́a ari Filisitininɔ Isira lɛ́a, zaa gbáranna lɛ́n ari Yuflati lɛ́a. Mani bùsupidenɔ naárɛ á ɔĩ à pɛ́ḿma. 32Á bàka súngɔ̃ kú ń yãn ke ń tãnanɔ yãnlo. 33Àsun tó ògɔ̃ kú á bùsunlo, de òsun tó à durunna kɛmɛnɛro, zaakũ tó a ń tãnanɔ gbàgba, a tankutɛ kpàkpa á zĩdanɛmɛ.
Currently Selected:
BONAA 23: BB2005
Highlight
Copy
Compare
Share
Want to have your highlights saved across all your devices? Sign up or sign in
Bisã Bible © SIM International, 2005.
