BONAA 20
20
Dokayã mɛ̀n kurinɔ
1Luda yã díkĩna ò pínki à pì: 2Makũmɛ Dikiri á Luda ũ. Ma á bɔ́tɛ zɔ̀blen Misila.
3Àsungɔ̃ dikiri ke vĩ ma gbɛraro.
4-5Àsun pɔ́ke taka kɛ à kútɛ à donyĩ kɛnɛro, pɔ́ kũ à kú musu ke zĩtɛ ke í gũnn yá, zaakũ makũ Dikiri á Luda, nɛ̀sɛgɔ̃bademɛ ma ũ. Madì gbɛ̃ kũ à yemaironɔ yã vãni wí ń burinɔ musu ari à gɛ́ pɛ́ ń sãkpɛnɔa kũ ń nasionɔ. 6Gbɛ̃ kũ ò yemai ò ma dokayãnɔ kũnanɔ sɔ̃, madìgɔ̃ gbɛ̃kɛ vĩ kũńwomɛ ari ń buria.
7Àsun makũ Dikiri á Luda tɔ́ sí pãpãro, zaakũ gbɛ̃ kũ à ma tɔ́ sì pãpã mani tó à bo pãro.
8Àgɔ̃ dɔn kámmabogɔrɔ bi ma pɔ́mɛ. 9Àgɔ̃ á bura zĩ kũ á zĩ sĩnda pínkio kɛ gɔrɔ suddo, 10a supplade gɔ̃ deárɛ kámmabogɔrɔ ũ, zaakũ makũ Dikiri á Luda ma pɔ́mɛ. Àsun zĩ ke kɛ gɔrɔ pì zĩro, ákɔ̃nɔ ke á nɛ́gɔ̃gbɛ̃ ke á nɛ́nɔgbɛ̃ ke á zĩkɛri gɔ̃gbɛ̃ ke nɔgbɛ̃ ke á pɔ́kãde ke nibɔ kũ à kú á bɛa. 11Zaakũ gɔrɔ suddon ma musu kũ zĩtɛo kɛ̀ kũ ísirao kũ pɔ́ kũ ò kú ń gũnnɔ pínki, akũ ma kámma bò a gɔrɔ supplade zĩ. A yã mɛ́ à tò ma arubarikaa dà kámmabogɔrɔ pìn ma dìtɛ ma pɔ́ ũ. 12Àgɔ̃ á de kũ á dao bɛ̀ɛrɛ dɔ̃, de à gì kɛ bùsu kũ makũ Dikiri á Luda matɛn kpááwan.
13Àsun gbɛ̃ dɛro.
14Àsun zina kɛro.
15Àsun kpãni oro.
16Àsun yã dí á gbɛ̃dakearo.
17Àsun á gbɛ̃dake ɔn ni dɛro. Àsun a nɔ ni dɛro ke a zĩkɛri gɔ̃gbɛ̃ ke nɔgbɛ̃ ke a zù ke a zaaki ke pɔ́ kũ à vĩnɔ pínki.
18Gbɛ̃ sĩnda pínki legũpũtãnaa mà kũ kuru yĩsãmpanaao, ò legũpinaa è kũ túsukpɛo dɔ kpi musu, akũ vĩna ń kũ òtɛn lukaluka ò zɛ zã̀ dire. 19Ò pì Musanɛ: Ǹ yã owɛrɛ n zĩda, óni ma. Ǹsun tó Luda yã owɛrɛro, de òsun gagaro yãi. 20Musa pìńnɛ: Àsun tó vĩna á kũro, zaakũ kũ à á yɔ̃ à gwa yãin à sù, de àgɔ̃ a vĩna vĩ akũsɔ̃ àsun durunna kɛro yãi. 21Ò zɛ zã̀ dire, akũ Musa nà túsukpɛ gègetee pìii, gu kũ Luda kun pìn.
Dikiri gbagbaki yã
22Akũ Dikiri pì Musanɛ: Ǹ yã dí o Isarailanɔnɛ: A mà kũ á zĩdao lákũ ma yã òárɛ zaa musu nà. 23Àsun tãna ke kɛ à namaro. Àsun andurufu ke wura pi tãnanɔ ũro. 24À ma gbagbaki bo kũ ɛ̃o à sa oa kũ sãnɔ kũ zùnɔ, sa'opɔ kũ òdi ká tɛ́n à tɛ́ kũ kũ kɛnnakũkɔ̃o sa'opɔo. Gu kũ ma dìtɛárɛ àgɔ̃ ma sísin, mani su á kĩnaa mà arubarika daágu. 25Tó átɛni ma gbagbaki pì bo kũ gbɛ̀ɛo, àsun bo kũ gbɛ̀ anaaoro, zaakũ tó a gã pɛ̀tɛa, a tò à gbã̀a lɛ̀n gwe. 26Àsun ma gbagbaki bo à a didiki kɛro, de á pótompokɛ sún bo gbagbaki pìiaro yãi.
Currently Selected:
BONAA 20: BB2005
Highlight
Copy
Compare
Share
Want to have your highlights saved across all your devices? Sign up or sign in
Bisã Bible © SIM International, 2005.
