BONAA 19
19
Sinai kpi sarɛ
1Isarailanɔ bona Misila mɔ aakɔ̃de gũn 2ò fùtɛ Rɛfidimu. Kũ ò kà Sinai gbárannan, akũ ò bùraa kàtɛ gwe Sinai kpi sarɛ. 3Musa dìdi à gɛ̀ɛ Luda kĩnaa kpi pìi musu, akũ Dikiri lɛ́ zùi à pì: Ǹ yã dí o Yakubu buri Isarailanɔnɛ: 4A è lákũ ma kɛ̀ Misilanɔnɛ nà, lákũ ma á sɛ́ ma su kãáo ma kĩnaa, lákũ vãu dì a nɛ́ sɛ́ a dɛ̀mbɛrɛɛa nà. 5Tó a ma yã mà á ma bàka kunna kãáo yã kũna tera sà, anigɔ̃ de ma gbɛ̃ yenyĩdenɔ ũ buri sĩnda pínki tɛ́. Bee kũ andunia de ma pɔ́ ũ pínki, 6ánigɔ̃ demɛnɛ kínanɔ kũ sa'orinɔ ũ, ma gbɛ̃ kũ ò kú adonanɔ ũ. Yã kũ ĩni o Isarailanɔnɛɛn gwe.
7Musa kìpa à gbɛ̃ zɔ̃kɔ̃nɔ sìsi, akũ à yã kũ Dikiri ònɛɛ bàbańnɛ pínki. 8Gbɛ̃nɔ wèa ń pínki ò pì: Yã kũ Dikiri òwɛrɛ pínki óni kɛ. Akũ Musa gɛ̀ɛ à yã kũ ò òo bàba Dikirinɛ. 9Dikiri pìnɛ: Mani su n kĩnaa túsukpɛ gègetee gũn, de gɔrɔ kũ matɛn yã onnɛ, oni ma onigɔ̃ n náani vĩ gɔrɔ sĩnda pínki. Akũ Musa yã kũ gbɛ̃nɔ òo bàba Dikirinɛ. 10Akũ Dikiri pìnɛ: Ǹ gɛ́ ń kĩnaa ǹ ońnɛ ò gbã̀ bo ń zĩdanɛ gbãra kũ ziao, ò ń pɔ́kasanɔ pípi. 11Ògɔ̃ kú soru gũn ziando, zaakũ a gɔrɔ aakɔ̃de zĩn mani kipa mà zɛ Sinai kpi musu gbɛ̃ sĩnda pínki wára. 12Ǹ zĩtɛ lɛ́ sèeda dańnɛ kpi pìi pɔ̀rɔ lɛ́a ari à lìkai pínki. Ǹ ońnɛ ò laakari kɛ. Òsun didi kpi pìiaro. Ń gbɛ̃ke sún ɔ kɛa sero. Gbɛ̃ kũ à ɔ kɛ̀a, ò ade dɛ. 13Òsun ɔ kɛ adearo. Ò a pápa kũ gbɛ̀ɛo ke ò a pápa kũ kàao ò dɛ. Pɔ́kãden yá, bisãsirin yá, à gàmɛ. Tó ò mà ò kuru pɛ̀ ò a yĩsãm pà, ò na kpi pìii.
14Musa kìpa kpi pìia à sù à gbɛ̃nɔ lè à òńnɛ ò gbã̀ bo ń zĩdanɛ ò ń pɔ́kasanɔ pípi. 15À ɛ̀ra à pìńnɛ: Àgɔ̃ kú soru gũn gɔrɔ aakɔ̃de zĩ yãi. Àsun wútɛ kũ nɔgbɛ̃oro. 16Kũ gu dɔ̀ a gɔrɔ aakɔ̃de pìia, akũ legũ tɛn pũtã àtɛn pí, akũ legũ sìsi kpi musu. Kũ ò kuru yĩsãmpanaa mà, akũ vĩna gbɛ̃ kũ ò kú bùrannɔ kũ̀ ń pínki òtɛn lukaluka. 17Musa bò kũńwo bùran à gɛ̀ɛ kũńwo Luda kĩnaa, akũ ò zɛ̀ zĩtɛ kpi pìi sarɛ. 18Túsukpɛ dà Sinai kpila kũ Dikiri kìpaa kũ tɛ́o yãi. Túsukpɛ pìi fùtɛ lán tãma túsukpɛ bà, akũ kpi pì tɛn yĩgãyĩgã manamana. 19Kuru yĩsãmpana tɛn kara. Kũ Musa yã ò, akũ Luda wèa legũpũtãnaa gũn.
20Dikiri kìpa à zɛ̀ Sinai kpi mìsɔ̃ntɛa à Musa sìsi, akũ à dìdi à gɛ̀ɛ gwe. 21Dikiri pìnɛ: Ǹ kipa ǹ kpãkɛ̃ gbɛ̃nɔi, òsun vĩ gulɛzɛkila ò su ò ma gwaro, de ń paridenɔ sún gagaro yãi. 22Bee sa'ori kũ òdi namainɔ, ò gbã̀ bo ń zĩdanɛ de màsun fɛ̃ńyĩro yãi. 23Musa pì Dikirinɛ: Oni didiro, zaakũ n kpãkɛ̃wái n pì ò zĩtɛ lɛ́ sèeda da kpi pìi pɔ̀rɔ lɛ́a à gɔ̃ n pɔ́ ũ. 24Akũ Dikiri pìnɛ: Ǹ kipa ǹ Haruna sɛ́ ǹ su kãao, ama sa'orinɔ kũ gbɛ̃ kparanɔ sún vĩ bara ò su ma kĩnaaro de màsun fɛ̃ńyĩro yãi. 25Akũ Musa kìpa gbɛ̃ pìnɔ kĩnaa à yã pìi òńnɛ.
Currently Selected:
BONAA 19: BB2005
Highlight
Copy
Compare
Share
Want to have your highlights saved across all your devices? Sign up or sign in
Bisã Bible © SIM International, 2005.
