BONAA 18
18
Yɛtoro gɛna Musa gwa
1Musa anzure Yɛtoro, Midiã sa'ori, yã kũ Luda kɛ̀ Musanɛ kũ a gbɛ̃ Isarailanɔ mà, lákũ Dikiri ń bɔ́tɛ Misila nà. 2À sù à lè Musa gĩnakɛ à a nanɔ Zipora zĩ̀ bɛ 3kũ a nɛ́gɔ̃gbɛ̃ mɛ̀n planɔ. A do tɔ́n Gɛsɔmu, zaakũ Musa pì gbɛ̃ zĩ̀tɔn a ũ dakenɔ bùsun. 4A do tɔ́n Ɛliɛza, zaakũ Musa pì a de Luda a faaba kɛ̀ à a bo Firi'auna fɛ̃nɛda lɛ́i. 5Akũ Yɛtoro fùtɛ àtɛn su Musa kĩnaa kũ a nɛ́nɔ kũ a nanɔo gu kũ à bùraa kàtɛn Luda kpi sarɛ gbárannan. 6À lɛ́gbãzã kɛ̀ Musanɛ à pì: Matɛn su n kĩnaa kũ n nanɔo kũ n nɛ́ mɛ̀n planɔo. 7Musa bò à gɛ̀ɛ à dà a anzurelɛ à kùtɛ à lɛ́ pɛ̀a. Ò kɔ̃ aafiaa gbɛ̀ka, akũ ò gɛ̃̀ kpɛ́n. 8Musa yã kũ Dikiri kɛ̀ Firi'aunanɛ kũ Misilanɔ Isarailanɔ yãi bàbanɛ pínki kũ wari kũ à ń lé zɛ́ gũnnɔ pínki kũ lákũ Dikiri ń bó nào. 9Yɛtoro pɔ kɛ̀ nna yã mana kũ Dikiri kɛ̀ Isarailanɔnɛɛa pínki kũ lákũ à ń bó Misilanɔ ɔĩ nào. 10Akũ à pì: Ò Dikiri sáabu kpá lákũ à á bó Firi'auna kũ Misilanɔ ɔĩ nà. 11Má dɔ̃̀ sà kũ Dikiri zɔ̃kɔ̃ de tãnanɔla ń pínki. Kũ Misilanɔ ĩa dã̀áwa, à yã mɔ̀ńnɛ. 12Akũ Yɛtoro sa'opɔ kũ òdi ká tɛ́n à tɛ́ kũ ò Ludaa kũ sa'opɔ pãndenɔ dɔ. Akũ Haruna kũ Isaraila gbɛ̃ zɔ̃kɔ̃nɔ ń pínki ò sù ò pɔ́ blè kãao Luda arɛ.
Yãgɔ̃gɔ̃rinɔ ditɛnaa
13Kũ gu dɔ̀ Musa vùtɛ àtɛn yã gɔ̃gɔ̃ńnɛ, ò katɛnai zaa kɔnkɔ ari ɔkɔsi. 14Kũ Musa anzure yã kũ àtɛn kɛńnɛ è pínki, akũ à a là à pì: Bɔ́n ntɛn kɛ kũ gbɛ̃ dínɔ lɛɛ? Bɔ́yãi ntɛn yãkpatɛ kɛńnɛ ndo, gbɛ̃ sĩnda pínki katɛnanyĩ zaa kɔnkɔ ari ɔkɔsii? 15Musa wèa à pì: Gbɛ̃nɔ dì su ma kĩnaa ò Luda pɔyenyĩna yã mamɛ. 16Tó ò yãkete vĩ, òdi su ma kĩnaa mà yã pì gɔ̃gɔ̃ńnɛ mà Luda doka kũ à dìtɛnɔ ońnɛ.
17Musa anzure pìnɛ: Yã kũ ntɛn kɛ manaro. 18Ĩni kpasa, gbɛ̃ kũ ò kú kũnwonɔ ni kpasa dɔ, zaakũ zĩ pì denla, ĩni fɔ̃ ǹ kɛ ndoro. 19Ǹ ma yã ma sà, mani lɛ́ damma, Luda nigɔ̃ kú kũnwo. Ĩnigɔ̃ deńnɛ yãgɔ̃gɔ̃ri ũ, ĩnigɔ̃ gɛ́ kũ ń yãnɔ Luda kĩnaa, 20ĩnigɔ̃ doka kũ Luda dìtɛnɔ dańnɛ, ĩnigɔ̃ zɛ́ kũ à de ò sɛ́ mɔńnɛ kũ yã kũ oni kɛnɔ. 21Ǹ gbɛ̃ laakaride náanide kũ ò Luda vĩna vĩ akũ òdi gusarɛgba síronɔ sɛ́ ń tɛ́, ǹ ń ditɛ gbɛ̃nɔn wàa sɔsɔɔronɔ don'arɛdenɔ ũ kũ gbɛ̃nɔn basɔsɔɔroo kũ gbɛ̃nɔn bupla akurio kũ gbɛ̃nɔn kurikurio, 22de ògɔ̃ yã gɔ̃gɔ̃ gbɛ̃ pìnɔnɛ gɔrɔ sĩnda pínki. Oni su n kĩnaa kũ yã zĩ'ũnɔ pínki, ama oni yã fítinnanɔ gɔ̃gɔ̃ ń zĩda. Abire mɛ́ ani n aso lagonnɛ. 23Tó Dikiri wènnɛ, tó n kɛ̀ lɛ, ĩni fuaro, gbɛ̃ pìnɔ ni tá bɛ kũ laakariio kpatɛna.
24Musa a anzure yã mà à kɛ̀ lákũ à òarɛ nà pínki. 25À gbɛ̃ laakaridenɔ sɛ̀ Isaraila burinɔ tɛ́ pínki à ń dítɛ gbɛ̃nɔn wàa sɔsɔɔronɔ don'arɛdenɔ ũ kũ gbɛ̃nɔn basɔsɔɔroo kũ gbɛ̃nɔn bupla akurio kũ gbɛ̃nɔn kurikurio. 26Akũ òdigɔ̃ yã gɔ̃gɔ̃ńnɛ gɔrɔ sĩnda pínki. Yã zĩ'ũn òdi suo Musa kĩnaa, akũ òdi yã fítinnanɔ gɔ̃gɔ̃ ń zĩda. 27Musa gɛ̀ɛ à zɛ̀ a anzureenɛ, akũ à tà a bùsun.
Currently Selected:
BONAA 18: BB2005
Highlight
Copy
Compare
Share
Want to have your highlights saved across all your devices? Sign up or sign in
Bisã Bible © SIM International, 2005.
