BONAA 16
16
Mana kũ kpɛkpɛrɛwinɔ
1Isarailanɔ fùtɛ Ɛlimu ń pínki, akũ ò kà Sini gbáranna kũ à kú Ɛlimu kũ Sinaio dagura ń bona Misila mɔ plade gũn gɔrɔ gɛ̃rode zĩ. 2Akũ ò zuka kà Musai kũ Harunao gbárannan gwe ń pínki 3ò pìńnɛ: Bɔ́ yã mɛ́ à tò Dikiri dí ó dɛdɛ Misilaroo? Gwe odì vutɛ ò pɔ́ ble kũ nɔ̀bɔɔo ari ò kã, akũ a su kũoo gbárannan kũ à ó dɛdɛ kũ nàao.
4Dikiri pì Musanɛ: Bona musu mani pɔ́ble fãárɛ. Gbɛ̃nɔ ni bɔtɛ ò gɔrɔ do pɔ́ sɛ́tɛ lákũ gu dìgɔ̃ dɔ nà ń blena lɛ́n, de mà ń yɔ̃ mà gwa tó ò ma doka kũna. 5Gɔrɔ suddode zĩ gɔrɔ pla pɔ́n oni sɛ́tɛ ò a pɔ́ble kɛ. 6Akũ Musa kũ Harunao pìńnɛ ń pínki: Ɔkɔsiala áni dɔ̃ kũ Dikiri mɛ́ à á bɔ́tɛ Misila, 7zia kɔnkɔ áni Dikiri gakuri e. À zuka kũ a kàai mà. Bɔ́n ó ũ kũ áni gbasa a zuka kàwáii? 8Musa ɛ̀ra à pì: Dikiri ni á gba nɔ̀bɔɔ à só ɔkɔsiala, zia kɔnkɔ ani pɔ́ble kpááwa á blena lɛ́n, kũ à zuka kũ á kàai mà yãi. Pɔ́ken ó ũro. Adi kɛ ókɔ̃nɔ a zuka kàwáiro, Dikirimɛ.
9Akũ Musa pì Harunanɛ: Ǹ o Isarailanɔnɛ ń pínki ò na Dikirii, zaakũ à ń zukakanaa mà. 10Kũ Haruna tɛn yã ońnɛ, ò arɛ dɔ̀ gbáranna kpa, akũ ò è Dikiri gakuri bò à sùḿma tɛ́luku gũn. 11Akũ Dikiri yã ò Musanɛ à pì: 12Ma Isarailanɔ zukakanaa mà. Ǹ ońnɛ ɔkɔsiala oni nɔ̀bɔ só, zia kɔnkɔ oni pɔ́ ble ò kã, oni dɔ̃ kũ makũmɛ Dikiri ń Luda ũ.
13Ɔkɔsi kpɛkpɛrɛwinɔ sù ò dà ń bùrala. Kũ gu dɔ̀ plí kpà à lìkańyĩ. 14Kũ plí kɛ̃̀, akũ pɔ́ gɔ̃̀ katɛna zĩtɛ púu ketekete lán pɔ́ koto bà. 15Kũ Isarailanɔ è, ò pìkɔ̃nɛ: Bɔ́n díi? Zaakũ odi dɔ̃ pɔ́ kũ à de a ũro. Musa pìńnɛ: Pɔ́ kũ Dikiri kpàáwa à blen gwe. 16Yã kũ Dikiri dìtɛárɛn dí: Á baadi sɛ́tɛ a blena lɛ́n. À sɛ́tɛ á baadi zaka lɛ́ dodo á ɔndenɔ dasi lɛ́n. 17Isarailanɔ kɛ̀ lɛ. Ò sɛ̀tɛ, gbɛ̃kenɔ pɔ́ zɔ̃kɔ̃, gbɛ̃kenɔ pɔ́ fíti. 18Kũ ò zakaa dàn, gbɛ̃ kũ à sɛ̀tɛ zɔ̃kɔ̃ pɔ́ dí dialaro, gbɛ̃ kũ à sɛ̀tɛ fíti pɔ́ dí kĩaaro. 19Musa pìńnɛ: Gbɛ̃ke sún a kpara tó ari gudɔoro. 20Gbɛ̃kenɔ dí Musa yã maro, ò a kpara tò ari gu dɔ̀, akũ à kɔ̀kɔɔ kà à vã̀, akũ Musa pɔ fɛ̃̀ gbɛ̃ pìnɔi.
21Lákũ gu dìgɔ̃ dɔ nà baadi dì sɛ́tɛ a blena lɛ́n. Tó ifãntɛ̃ gbã̀, pɔ́ kũ à gɔ̃̀ zĩtɛ dì yɔ́mɛ. 22Gɔrɔ suddode zĩ ò pɔ́ble sɛ̀tɛ lɛu pla, baadi zaka lɛ́ plapla. Akũ ń gbɛ̃ zɔ̃kɔ̃nɔ gɛ̀ɛ ò ò Musanɛ ń pínki. 23À pìńnɛ: Lɛn Dikiri dìtɛ lɛ. Zia bi kámmabogɔrɔ zĩmɛ, Dikiri gɔrɔmɛ. À pɔ́ kũ á ye à kpá tɛ́a kpá tɛ́a. À pɔ́ kũ á ye à disa disa, à a kpara kũ à gɔ̃̀ ditɛ ari gu dɔ̀. 24Ò dìtɛ ari gu dɔ̀ lákũ Musa ò nà. Adikũ dí vãro adi kɔ̀kɔ káro. 25Akũ Musa pìńnɛ: À ble gbãra, zaakũ kámmabogɔrɔ zĩmɛ, áni e gukea gbãraro. 26Àgɔ̃ sɛ́tɛ ari gɔrɔ suddo. A gɔrɔ supplade bi kámmabogɔrɔ zĩmɛ, anigɔ̃ kun zĩ kũ̀aro.
27Gɔrɔ supplade zĩ gbɛ̃kenɔ bò ò gɛ̀ɛ sɛ́tɛ, akũ odi lero. 28Akũ Dikiri pì Musanɛ: Ánigɔ̃ kú kũ doka kũ ma dìtɛnɔ manaa sario ari bɔrɛmɛɛ? 29Àgɔ̃ dɔ̃ kũ makũ Dikiri ma kámmabogɔrɔ dìtɛárɛ. A yã mɛ́ à tò gɔrɔ suddode zĩ madì gɔrɔ pla pɔ́ble kpááwa. Baadi gɔ̃ kú a gbɛ̀n, gbɛ̃ke sún bo gu kũ à kun gɔrɔ supplade pì zĩro. 30Akũ ò kámma bò gɔrɔ supplade zĩ. 31Isarailanɔ tɔ́ kpà pɔ́ble pìinɛ mana. À de lán pɔ́wɛ pura keteketenɔ bàmɛ. A í nna lán kàra zɔ́de bà.
32Musa pì: Yã kũ Dikiri dìtɛn dí: Ò mana zaka lɛ́ do ditɛ ó burinɔnɛ, de ò pɔ́ble kũ à kpàwá o blè gbárannan ó bona Misila gbɛra e se. 33Akũ Musa pì Harunanɛ: Ǹ lo sɛ́ ǹ mana zaka lɛ́ do kán ǹ ditɛ Dikiri arɛ, de àgɔ̃ ditɛna ó burinɔnɛ. 34Akũ Haruna dìtɛ gbɛ̀ anlonɔ sarɛ de àgɔ̃ ditɛna lákũ Dikiri ò Musanɛ nà. 35Isarailanɔ mana blè wɛ̃̀ bupla ari ò gɛ̀ɛ ò kào bùsu kũ gbɛ̃nɔn kún. Ò mana pìi blè ari ò gɛ̀ɛ ò kào Kanaanɔ bùsu lɛ́a. 36Zaka lɛ́ do bi lita plamɛ.
Currently Selected:
BONAA 16: BB2005
Highlight
Copy
Compare
Share
Want to have your highlights saved across all your devices? Sign up or sign in
Bisã Bible © SIM International, 2005.
