BONAA 15
15
Isarailanɔ lɛ̀ɛ
1Akũ Musa kũ Isarailanɔ ń pínki lɛ̀ dí sì Dikirinɛ ò pì:
Mani lɛ̀ sí Dikirinɛ, zaakũ a tɔ́ bona,
à sɔ̃denɔ kũ ń sɔ̃nɔ kà ísiran.
2Dikiri mɛ́ à ma gbãna ũ, mani a táaki lɛ́,
àkũ mɛ́ à ma sura bà.
Àkũmɛ ma Luda ũ, mani a tɔ́ kpá.
Àkũmɛ ma de Luda ũ, mani a tɔ́ sɛ́ lei.
3Dikiri bi zĩ̀kariimɛ, a tɔ́n Dikiri.
4À Firi'auna sɔ̃gonɔ kũ a zĩ̀karinɔ kà ísiran,
à zĩ̀kari gbɛ̃ zɔ̃kɔ̃nɔ vlɛ̃̀ Isira Tɛ̃ran.
5Í lòkotoo pìi dàńla,
ò kpàtɛ zĩtɛ lán gbɛ̀ɛ bà.
6Dikiri, n ɔplan gbãna kun kũ zɔ̃kɔ̃kɛo,
Dikiri, n n ibɛrɛnɔ kàkatɛ kũ n ɔplao.
7N n zãngurinɔ nɛ̀ n gakuri zɔ̃kɔ̃ɔ gũn,
n pɔ fɛ̃̀ n ń nátɛ lán sɛ̃̀ɛ bà.
8N pɔ́ bò n yĩn, akũ í zɔ̃̀kɔ̃rɛ,
à gɔ̃̀ zɛna lán bĩni bà,
ísira ì ari a guragura.
9Ó ibɛrɛ pìnɔ pì,
oni pɛ́tɛwái ò ó lemɛ,
oni ó pɔ́nɔ sɛ́tɛ lákũ ò yei nà,
oni ń fɛ̃nɛdanɔ bo ò ó dɛdɛo.
10N n lɛ́'ĩa vù, akũ ísira dàńla,
ò kpàtɛ lán darumaa bà í zɔ̃kɔ̃ɔ pìn.
11Dikiri, tãnanɔ tɛ́ a kpate mɛ́ à de lán n bàa?
Dín oni lɛkɔ̃a kũnwoo?
Yãbonsarɛkɛri, n zɔ̃kɔ̃kɛ adona,
n gakuri naasi vĩ.
12N n ɔpla pòro, akũ zĩtɛ ń mɔ́mɔ.
13Ókɔ̃nɔ kũ n ó bó zɔ̀blennɔ
ĩni dowɛrɛ arɛ n gbɛ̃kɛ gũn,
ĩni gɛ́ kũoo n bùsun kũ n gbãnao.
14Tó burinɔ mà, oni lukaluka,
í wãna ni ká Filisitini bùsudenɔ pɔa.
15Ɛdɔmunɔ kínanɔ ni vĩna kɛ,
swɛ̃̀ ni kɛ̃ Mɔabu don'arɛdenɔn,
Kanaanɔ bùsudenɔ mɛ̀ ni yɔ́ ń pínki.
16Vĩna zɔ̃kɔ̃ ni ń kũ, swɛ̃̀ ni kɛ̃ńgu,
oni gɔ̃ kítikiti lán gbɛ̀ɛ bà
n gbãna zɔ̃kɔ̃ yãi Dikiri,
ari ókɔ̃nɔ kũ n ó sɛ́ n pɔ́ ũnɔ ni gɛ̃tɛ.
17Dikiri, ĩni gɛ́ kũoo kpi kũ n sɛ̀ n pɔ́ ũ kĩnaa,
ĩni ó zĩni pɛ́tɛ gu kũ n dìtɛ n vutɛki ũn,
n kúki kũ n kɛ̀kɛ n zĩdanɛɛ pìi.
18Dikiri nigɔ̃ kí ble gɔrɔ sĩnda pínkimɛ.
19Kũ Firi'auna sɔ̃nɔ kũ a sɔ̃gonɔ kũ a sɔ̃denɔ gɛ̃̀ ísira gũn, akũ Dikiri sù kũ ío à dàńla, ama Isarailanɔ táa ò gukoria ísira pìi gũn. 20Akũ annabi Miriamu, Haruna dãre, a sɛ̃̀gɛ̃ɛ sɛ̀, akũ nɔgbɛ̃nɔ bò ò tɛ́i ń pínki, òtɛn sɛ̃̀gɛ̃ pá òtɛn ũ wã. 21Miriamu lɛ̀ɛ sìńnɛ à pì:
À lɛ̀ sí Dikirinɛ, zaakũ a tɔ́ bona,
à sɔ̃denɔ kũ ń sɔ̃nɔ kà ísiran.
Í kyã̀kyãa
22Musa dà zɛ́n kũ Isarailanɔ, ò kɛ̃̀kɔ̃a kũ Isira Tɛ̃rao ò gɛ̃̀ Suru gbárannan. Ò táa ò gɔrɔ aakɔ̃ gbáranna pìn odi í ero. 23Kũ ò kà gu kũ òdi pi Mara, odi fɔ̃ ò a í mìro kũ à kɛ̀ kyã̀kyã yãi. A yã mɛ́ à tò ò tɔ́ kpà gu pìinɛ Mara. 24Akũ gbɛ̃nɔ zuka kà Musai ò pì: Bɔ́n óni mii? 25Musa wiki lɛ̀ Dikiria, akũ Dikiri lí mɔ̀nɛ. Kũ Musa lí pìi zù ín, akũ í pìi kɛ̀ nna. Gwen Dikiri yã dìtɛńnɛ kũ dokao à ń yɔ̃ à ń gwá 26à pì: Tó a laakarii dɔ̀ makũ Dikiri á Luda yãa átɛn yã kũ má yei kɛ, tó a yã kũ ma dìtɛnɔ mà, akũ á ma dokanɔ kũna pínki, mani gyã kũ ma kà Misilanɔn ke kááguro, zaakũ makũmɛ Dikiri kũ àdi á gba aafia ũ. 27Abire gbɛra ò kà Ɛlimu, gu kũ ísɛ̃boki mɛ̀n kuri awɛɛplanɔn kun kũ domina lí mɛ̀n baaakɔ̃ akurinɔo. Akũ ò bùraa kàtɛ í pìi sarɛ gwe.
Currently Selected:
BONAA 15: BB2005
Highlight
Copy
Compare
Share
Want to have your highlights saved across all your devices? Sign up or sign in
Bisã Bible © SIM International, 2005.
