BONAA 14
14
Misilanɔ pɛtɛna Isarailanɔi
1Dikiri pì Musanɛ: 2Ǹ o Isarailanɔnɛ ò litɛ ò gɛ́ bùra kátɛ Pi'airo sarɛ Migidolu kũ ísirao dagura, arɛdɔkɔ̃ana kũ Baali Zɛfɔ̃o. À bùra kátɛ ísira sarɛ gwe. 3Firi'auna nigɔ̃ da a sãtɛ, gbáranna á kũkũmɛ. 4Mani a kùgbãna kũ, ani pɛ́tɛái, mani tɔ́ bo Firi'auna kũ a zĩ̀karinɔ yã sabai, Misilanɔ nigɔ̃ dɔ̃ kũ makũmɛ Dikiri ũ. Akũ Isarailanɔ kɛ̀ lɛ.
5Kũ ò ò Misilanɔ kína Firi'aunanɛ gbɛ̃ pìnɔ bàa lɛ̀, akũ àpii kũ a ìbanɔ nɛ̀sɛ lìtɛ Isarailanɔ yã musu ò pì: Bɔ́n o kɛ̀, akũ o tò ò bò zɔ̀blenawɛrɛnn? 6Akũ Firi'auna gó dɔ̀ a sɔ̃nɛ à a zĩ̀karinɔ kàkara. 7À sɔ̃go mananɔ sɛ̀ mɛ̀n wàa aakɔ̃ kũ Misila sɔ̃gonɔ pínki kũ zĩ̀kari gbɛ̃ zɔ̃kɔ̃nɔo ká ń gũn. 8Dikiri Misilanɔ kína Firi'auna kùgbãna kũ̀, akũ à pɛ̀tɛ Isaraila kũ òtɛn bɔtɛ kũ swɛ̃̀gbãnaonɔi. 9Akũ Misilanɔ pɛ̀tɛńyĩ kũ Firi'auna sɔ̃nɔ kũ a sɔ̃gonɔ kũ a sɔ̃denɔ kũ a zĩ̀karinɔ ń pínki, akũ òtɛn su ń le ń bùran ísira sarɛ kãni kũ Pi'airoo arɛdɔkɔ̃ana kũ Baali Zɛfɔ̃o.
10Kũ Firi'auna kà kãni, Isarailanɔ wɛ́ sɛ̀, akũ ò Misilanɔ è tɛ́ ń kpɛ. Vĩna ń kũ manamana, akũ ò wiki lɛ̀ Dikiria. 11Ò pì Musanɛ: Miranɔn kú Misilanloo? Bɔ́ yã mɛ́ à tò n su kũoo gbárannan la ò gagaa? À kɛ̀ dera n bo kũoo Misilai? 12Asa o ònnɛ Misila ò pì ǹ ó tó tɛɛnɛ ò zɔ̀ ble Misilanɔnɛ! Zɔ̀blennɛna manawɛrɛ de gagana gbáranna dínla. 13Musa pìńnɛ: Àsun tó vĩna á kũro. À zɛ tɛɛnɛ áni e lákũ Dikiri ni á sura ba nà gbãra, zaakũ Misila kũ átɛni ń e gbãra dínɔ, áni ń e ziki doro. 14Dikiri mɛ́ ani zĩ̀ káárɛ. Àgɔ̃ yĩtɛna kítikiti dé!
Isarailanɔ bikũna Isira Tɛ̃rala
15Dikiri Musa là à pì: Bɔ́ wikin ntɛn lɛ́maa? Ǹ o gbɛ̃nɔnɛ ò futɛ ò bo kũ táo. 16Ǹ n gò dɔ ísirala à zɔ̃kɔ̃rɛ, de Isarailanɔ le ò gɛ̃tɛ a dagura gukoria. 17Makũ, mani Misilanɔ kùgbãna kũ, oni gɛ̃n ń gbɛra, mani tɔ́ bo Firi'auna kũ a zĩ̀karinɔ kũ a sɔ̃gonɔ kũ a sɔ̃denɔ yã sabai. 18Tó ma tɔ́ bò Firi'auna kũ a sɔ̃gonɔ kũ a sɔ̃denɔ yã sabai, Misilanɔ nigɔ̃ dɔ̃ sà kũ makũmɛ Dikiri ũ. 19Luda Malaika kũ à do Isarailanɔnɛ arɛ ɛ̀ra à gɛ̀ɛ ń kpɛ kpa, akũ tɛ́luku kũ à kú ń arɛ ɛ̀ra à gɛ̀ɛ ń kpɛ dɔ 20mɔ́kɔ̃nɔ kũ Misilanɔ dagura. Tɛ́luku pì gu pù Isarailanɔnɛ à gusira kpà Misilanɔnɛ, akũ ń gbɛ̃ke dí le à nà a dakei gwãani kũ̀aro.
21Kũ Musa a ɔ dɔ̀ ísirala, akũ Dikiri bò kũ ĩa gbãnao ifãboki kpa. À kàka ari gu gɛ̀ɛ a dɔ̀o à ísira lɛ̀ à kpàatɛkɔ̃rɛ, akũ gukori bò. Kũ í zɔ̃̀kɔ̃rɛ, 22akũ Isarailanɔ táa ò gukoria ò bikũ̀. Í bĩni bò ń ɔplai kũ ɔzɛo. 23Akũ Misilanɔ pɛ̀tɛńyĩ. Firi'auna sɔ̃nɔ kũ a sɔ̃gonɔ kũ a sɔ̃denɔ pínki tɛ́ ń kpɛ ísira gũn. 24Gudɔnaao Dikiri Misila zĩ̀karinɔ gwà zaa tɛ́nɛnɛ gũn, akũ à tò ò lìkara. 25À tò ń sɔ̃gonɔ vlɛ̃̀, à tò ń táa'onaa kɛ̀ zĩ'ũ, akũ ò pì: Ò bàa lɛ́ Isarailanɔnɛ, zaakũ Dikiri tɛn zĩ̀ káńnɛ kũoomɛ.
26Dikiri pì Musanɛ: Ǹ n ɔ dɔ ísirala, í ni da Misilanɔla kũ ń sɔ̃gonɔ kũ ń sɔ̃denɔ. 27Akũ Musa a ɔ dɔ̀ ísirala, akũ í tɛn su a gbɛ̀n gudɔnaao. Lákũ í tɛn su nà, akũ Misilanɔ bàa sì ò ye ò bɔtɛ. Gwen Dikiri tò ísira dàńlan. 28Í sù a dà sɔ̃gonɔla kũ sɔ̃denɔ kũ Firi'auna zĩ̀kari kũ ò gɛ̃̀ ísira gũn Isarailanɔ gbɛranɔ ń pínki. Ń gbɛ̃ke dí boro, bee mɛ̀n do. 29Isarailanɔ sɔ̃ ò táa ò í dagura gu koriamɛ. Í bĩni bò ń ɔplai kũ ɔzɛo. 30Zĩ birean Dikiri Isarailanɔ sì Misilanɔa, akũ Isarailanɔ Misila pìnɔ gɛ̀nɔ è ísira bara. 31Kũ Isarailanɔ Dikiri gbãna zɔ̃kɔ̃ kũ à mɔ̀ Misilanɔnɛɛ è, ò vĩna kɛ̀nɛ, akũ ò a náani kɛ̀ kũ a zɔ̀bleri Musao.
Currently Selected:
BONAA 14: BB2005
Highlight
Copy
Compare
Share
Want to have your highlights saved across all your devices? Sign up or sign in
Bisã Bible © SIM International, 2005.
