BONAA 13
13
Burodi Futɛnasari dikpɛ kũ daudunɔ kpana Ludaaao
1Dikiri yã ò Musanɛ à pì: 2Àgɔ̃ Isaraila daudunɔ kũ pɔ́kãde nɛ́ sà káakunɔ kpáma, zaakũ ma pɔ́nɔmɛ ń pínki.
3Musa pì Isarailanɔnɛ: Á bona Misila zɔ̀blen gɔrɔ díkĩna yã gɔ̃ dɔágu, zaakũ Dikiri mɛ́ à á bɔ́tɛ Misila kũ a ɔ gbãnao. Àsun pɔ́futɛna só gɔrɔ pìiaro. 4Átɛn bɔtɛ Misila gbãramɛ mɔ káaku kũ òdi pi Abibu gũn. 5Dikiri lɛ́ sɛ̀ á dizinɔnɛ à pì áni bùsu kũ à vĩ kũ zɔ́'io din, kũ Kanaanɔ kũ Itinɔ kũ Amɔrinɔ kũ Ivinɔ kũ Yebusinɔn kun kpááwa. Tó à tò a ka, à dikpɛ pì kɛ mɔ dín. 6Àgɔ̃ burodi futɛnasari só ari gɔrɔ suppla. A gɔrɔ supplade pì zĩ nigɔ̃ deárɛ Dikiri dikpɛ gɔrɔ ũ. 7Àgɔ̃ burodi futɛnasari só ari gɔrɔ suppla pì papa. Pɔ́futɛna ke lùbɛnɛ ke súngɔ̃ kú ɔn ke gũn á bùsunlo. 8Zĩ pìia àgɔ̃ o á nɛ́gɔ̃gbɛ̃nɔnɛ átɛn kɛ lɛ yã kũ Dikiri kɛ̀árɛ kũ à á bɔ́tɛ Misila yãimɛ. 9Dikpɛ pì nigɔ̃ deárɛ sèeda ũ lán pɔ́ dana ɔaa bà, ke lán dɔngu pɔ́ yĩna mì'arɛaa bà, de Dikiri doka gɔ̃ kú á lɛ́n, zaakũ àkũ mɛ́ à á bɔ́tɛ Misila kũ a ɔ gbãnao. 10Àgɔ̃ dokayã pì kɛ a gɔrɔa wɛ̃̀ kũ wɛ̃̀ɛo.
11Tó Dikiri tò a ka Kanaanɔ bùsun, akũ à kpàáwa lákũ à a lɛ́ sɛ̀árɛ nà kũ á dizinɔ, 12àgɔ̃ á daudunɔ kpáa ń pínki. Á pɔ́kãde nɛ́ sà káakunɔ dìgɔ̃ de a pɔ́ ũ ń pínki. 13Àgɔ̃ á zaaki nɛ́ sà káaku tɔrɔma bo kũ sãnɛo. Tó ádi boro, à a waka fĩ. Àgɔ̃ á daudunɔ tɔrɔma bo ń pínki. 14Tó á nɛ́gɔ̃gbɛ̃nɔ á lá a mìii zia ò pì, bɔ́ yãn gwee, à pińnɛ Dikiri á bɔ́tɛ zɔ̀blen Misila yã kũ a ɔ gbãnao yãimɛ. 15Kũ Firi'auna kùgbãna kɛ̀ à gì ó gbarɛi, akũ Dikiri Misila daudunɔ dɛ̀dɛ ń pínki kũ pɔ́kãde nɛ́ sà káakunɔ ń pínki. A yã mɛ́ à tò odì sa oa kũ pɔ́kãde nɛ́ sà káakunɔ pínki, odì ó daudunɔ tɔrɔma bo. 16Adikĩna nigɔ̃ de sèeda ũ lán pɔ́ dana ó ɔaa bà ke pɔ́ yĩna ó mì'arɛaa bà, zaakũ Dikiri mɛ́ à ó bɔ́tɛ Misila kũ a ɔ gbãnao.
Isarailanɔ bona Misila
17Kũ Firi'auna Isarailanɔ gbàrɛ, Luda dí bo kũńwo Filisitini bùsu zɛ́ kparo, bee kũ a kãnikɛo, zaakũ à pì: Tó ò fùtɛńyĩ kũ zĩ̀io, oni ǹ nɛ̀sɛ litɛ ò ɛra Misila. 18Luda pã̀ zɛ́ pìinɛ, akũ à gbáranna zɛ́ sɛ̀ kũńwo Isira Tɛ̃ra kpa. Isarailanɔ bɔ̀tɛ Misila ò ń zĩ̀kabɔnɔ kũna.
19Musa Yusufu wánɔ sɛ̀ àtɛn táo, zaakũ Yusufu tò Isarailanɔ lɛ́ sɛ̀arɛ yã à pì, tó Luda sù ń bo, oni a wánɔ sɛ́tɛ ò boo gwe.
20Kũ ò bò Suko, ò gɛ̀ɛ ò bùraa kàtɛ gbáranna lɛ́a zaa Etamu. 21Dikiri dìgɔ̃ dońnɛ arɛ tɛ́luku gũn fãnantɛ̃ de àgɔ̃ zɛ́ mɔńnɛ. Gwãani sɔ̃ àdigɔ̃ dońnɛ arɛ tɛ́nɛnɛ gũn, de àgɔ̃ gu puńnɛ ògɔ̃ táa o fãnantɛ̃ kũ gwãanio. 22Tɛ́luku pìi dì go ń arɛ fãnantɛ̃ro, tɛ́nɛnɛ pìi dì go ń arɛ gwãaniro.
Currently Selected:
BONAA 13: BB2005
Highlight
Copy
Compare
Share
Want to have your highlights saved across all your devices? Sign up or sign in
Bisã Bible © SIM International, 2005.
