BONAA 12
12
Vĩnla dikpɛ
1Dikiri yã ò Musanɛ kũ Harunao Misila à pì: 2Mɔ díkĩna nigɔ̃ deárɛ mɔ káaku ũ wɛ̃̀ kũ wɛ̃̀ɛo. 3À o Isarailanɔnɛ ń pínki, mɔ díkĩna gɔrɔ kuride zĩ ò sã bobo mɛ̀n dodo ɔn kũ ɔnnwo pínki. 4Tó ɔn gbɛ̃nɔ dasi dí ká ò sã mɛ̀n do só sɔ̃ro, ò kpàatɛ kũ ɔn kũ ò kú kɔ̃ sarɛo a gbɛ̃nɔ lɛ́n, de a kpara sún gɔ̃ro yãi. 5À sãkaro ke blèkofĩni fíti kũ à mamberu vĩro bo. 6Isarailanɔ pínki, baadi a pɔ́ gwa ari mɔ díkĩna gɔrɔ gɛ̃ro donsaride zĩ. Ɔkɔsin oni dɛ, 7oni a aru má kpɛ́ kũ oni a nɔ̀bɔ són kpɛ́lɛlɛ gbĩ̀nɔa, ɔplai kũ ɔzɛo kũ musuo. 8Gwãani dokɔ̃nɔ pìia oni nɔ̀bɔɔ pì kpá tɛ́a, oni só kũ burodi futɛnasario kũ lá kyã̀kyãao. 9Àsun só búsu ke fùfukɛnaro. À kpá tɛ́a kũ a mìio kũ a gbánɔ kũ a pɔ́gũnnɔ. 10Àsun tó gu dɔ a kparaaro. Tó a kpara gɔ̃̀, à a kpáta à tɛ́ kũ. 11Tó átɛn só, à asa dɔáwa à kyate kpá, á gò gɔ̃ nana á ɔĩ. À só likalika, zaakũ Dikiri Vĩnla sa'opɔmɛ.
12Gwãani pìia mani vĩ Misilala mà daudunɔ dɛdɛ bùsuu pì gu pínkia kũ pɔ́kãde nɛ́ sà káakunɔ ń pínki, mani wé'i da Misila tãnanɔa. Makũmɛ Dikiri ũ. 13Aru pì nigɔ̃ de sèeda ũ kpɛ́ kũ á kú a gũnnɔwa. Tó matɛn ɔ tɔ̃ Misilanɔa, tó ma aru pìi è, mani gɛ̃ála, gaga pì ni á lero. 14À gɔrɔ pì ditɛ ma dikpɛ gɔrɔ ũ dɔngu yãi, àgɔ̃ dikpɛ pì kɛ kɛ̀otokɔ̃nɛ ũ ari á buria.
Burodi Futɛnasari dikpɛ
15Gɔrɔ suppla gũn à burodi futɛnasari só. A gɔrɔ káaku zĩ à lùbɛnɛ kũ à kú á kpɛ́ gũnnɔ kɔ́tɛ, zaakũ gbɛ̃ kũ à pɔ́futɛnaa sò gɔrɔ suppla pìi gũn, oni a bo Isarailanɔ tɛ́ ò a dɛmɛ. 16A gɔrɔ káaku zĩ kũ a gɔrɔ suppladeo à kɔ̃ kakara à donyĩ kɛmɛnɛ. Àsun zĩ ke kɛ gɔrɔ kũ̀nɔaro, sé pɔ́blekɛna gbɛ̃ sĩnda pínkinɛ baasiro, a lɛ́n gwe. 17À Burodi Futɛnasari dikpɛ kɛ, zaakũ zĩ birean ma á bɔ́tɛ Misila lán zĩ̀karinɔ bà. Á burinɔ gɔ̃ dikpɛ pì kɛ kɛ̀otokɔ̃nɛ ũ. 18Mɔ káaku gɔrɔ gɛ̃ro donsaride zĩ ɔkɔsi, àgɔ̃ burodi futɛnasari só ari a gɔrɔ baro awɛɛdode zĩ ɔkɔsi. 19Gɔrɔ suppla gũn lùbɛnɛ sún gɔ̃ kú á bɛaro, zaakũ gbɛ̃ kũ à pɔ́futɛnaa sò, gbɛ̃ zĩ̀tɔɔn yòo, beden yòo, oni a bo Isarailanɔ tɛ́ ò a dɛmɛ. 20Àsun pɔ́futɛna só gɔrɔ pìiaro. Gu kũ á kun pínki, àgɔ̃ burodi futɛnasari só.
Vĩnla dikpɛ káaku
21Musa Isaraila gbɛ̃ zɔ̃kɔ̃nɔ sìsi ń pínki à pìńnɛ: À gɛ́ à á ɔn sã kũ à dɛ Vĩnla dikpɛkɛpɔ ũ. 22À sɛ̃̀sɔ̃vlã sɛ́ à zɔ̃ aru kũ à kú ta gũnwa à máma á kpɛ́lɛlɛ gbĩ̀nɔa, ɔplai kũ ɔzɛo kũ a musuo. Á gbɛ̃ke sún bo bàairo ari gu dɔ. 23Tó Dikiri tɛn pã bùsula àtɛn Misilanɔ dɛdɛ, tó à aru è kpɛ́lɛlɛ gbĩ̀nɔa, ani gɛ̃alamɛ. Ani tó gbɛ̃dɛdɛri gɛ̃ái à á dɛdɛro. 24Ákɔ̃nɔ kũ á burinɔ àgɔ̃ yã pì kũna kɛ̀otokɔ̃nɛ ũ ari á buria. 25Tó a gɛ̃ bùsu kũ Dikiri ni á gban lákũ à a lɛ́ sɛ̀árɛ nà, àgɔ̃ donyĩyã pì kũna. 26Tó á nɛ́nɔ donyĩyã pìi mìi gbɛ̀kaáwa, 27à ońnɛ kũ Vĩnla sa kũ òdi o Dikiriaamɛ, zaakũ kũ à Misilanɔ dɛ̀dɛ, à gɛ̃̀ ó Isarailanɔ kpɛ́la, adi ó dɛdɛro. Akũ gbɛ̃nɔ kùtɛ ò donyĩ kɛ̀ Dikirinɛ. 28Kũ ò tà, ò kɛ̀ lákũ Dikiri ò Musa kũ Harunaoonɛ nà.
Misila daudunɔ gaganaa
29Gwãani lizãndo Dikiri Misila daudunɔ dɛ̀dɛ ń pínki, sɛna zaa Firi'auna kũ à vutɛna kpataa nɛ́a ari à gɛ̀ɛ pɛ́ purusunanɔ nɛ́nɔa kũ pɔ́kãde nɛ́ sà káakunɔ ń pínki. 30Firi'auna fùtɛ gwãani kũ a ìbanɔ kũ Misilanɔ ń pínki, akũ wɛ̃nda ɔ́ dà Misilala, zaakũ ɔn ke kun gɛ̀ɛ sariro. 31Gwãanin Firi'auna Musa kũ Harunao sìsi à pìńnɛ: À futɛ kũ Isarailanɔ à bɔtɛ ma gbɛ̃nɔ tɛ́. À gɛ́ donyĩ kɛ Dikirinɛ lákũ a ò nà. 32À á blènɔ kũ á sãnɔ kũ á zùnɔ sɛ́tɛ lákũ a ò nà. À gɛ́ à sa mana omɛnɛ se.
33Misilanɔ nàkara gbɛ̃ pìnɔa ò bɔtɛńnɛ ń bùsun likalika, zaakũ ò pì: Óni gaga ó pínkimɛ. 34Isarailanɔ ń flawadɛnanɔ kà tanɔ gũn lùbɛnɛɛ sari, ò ń utanɔ fĩ̀fĩa ò dàda ń gã̀n. 35Ò kɛ̀ lákũ Musa òńnɛ nà, ò andurufu pɔ́nɔ kũ wura pɔ́nɔ kũ pɔ́kasanɔ gbɛ̀ka Misilanɔa. 36Dikiri tò Misilanɔ ń wɛ́ gwà, akũ ò kpàḿma. Lɛmɛ ò Misilanɔ pɔ́nɔ sìḿma lɛ.
Isarailanɔ dana zɛ́n
37Isarailanɔ dà zɛ́n gɛ̀sɛ, ò bɔ̀tɛ kũ Ramɛsɛo ò tà Suko. Gɔ̃gbɛ̃nɔ gbɛ̃nɔn dúbu wàa aakɔ̃mɛ, nɛ́nɔ kũ nɔgbɛ̃nɔ baasi. 38Buri zĩ̀tɔnɔ tà kũńwo dasi dɔ. Blènɔ kũ sãnɔ kũ zùnɔn dasi manamana. 39Ò burodi futɛnasari kɛ̀ kũ flawadɛna kũ ò bòo Misilao. Ò kɛ̀ lùbɛnɛɛ sari, zaakũ ò pɛ̀ḿma Misila kãntomɛ. Odi le ò pɔ́ble kɛ̀ ò sɛ̀ zãna ũro.
40Isarailanɔ kunna Misila kɛ̀ wɛ̃̀ wàa pla kũ baraakurio. 41Wɛ̃̀ wàa pla kũ baraakurio pì papanaa gbɛra, dikpɛ pì zĩn Dikiri zĩ̀karii pìnɔ bɔ̀tɛ Misila ń pínki. 42Gwãani pì kun Dikiri pɔ́ ũmɛ. Isarailanɔ nigɔ̃ ibɛ̃nɛ kɛa ari ń buria, zaakũ gwãani pìin Dikiri Isarailanɔ bona Misila ibɛ̃nɛ kɛ̀.
Vĩnla dikpɛ
43Dikiri pì Musanɛ kũ Harunao: Vĩnla yã kũ ma dìtɛn dí. Buri zĩ̀tɔ ke sún a nɔ̀bɔ sóro, 44ama zɔ̀ kũ a lù, tó a tɔ̃̀ zɔ̃na, ani só. 45Nibɔ ke gbasekɛri sún sóro. 46À só kpɛ́n, àsun bo kũ a nɔ̀bɔɔ pìio bàairo. Àsun sã pì wá ke ɛ́ro. 47Isarailanɔ pínki gɔ̃ dikpɛ pì kɛ. 48Tó gbɛ̃ zĩ̀tɔ kú á tɛ́, tó à ye à Vĩnla dikpɛ kɛ Dikirinɛ, à a bɛ gɔ̃gbɛ̃nɔ tɔ̃̀ zɔ̃ ń pínki à gɔ̃ bede ũ gbasa à kɛ. Gyɔfɔrɔde sún sóro. 49Bede kũ gbɛ̃ zĩ̀tɔ kũ à kú kãáo, doka dokɔ̃nɔ pìimɛ. 50Akũ Isarailanɔ kɛ̀ lákũ Dikiri ò Musanɛ nà kũ Harunao ń pínki. 51Zĩ birean Dikiri Isarailanɔ bɔ̀tɛ Misila gã̀ kũ gã̀ao.
Currently Selected:
BONAA 12: BB2005
Highlight
Copy
Compare
Share
Want to have your highlights saved across all your devices? Sign up or sign in
Bisã Bible © SIM International, 2005.
