ƐFESUDENƆ 6
6
Nɛ́nɔ yã
1Ákɔ̃nɔ nɛ́nɔ, Dikiri gũn àgɔ̃ á de kũ á dao yã ma, zaakũ abire mɛ́ à mana. 2-3À bɛ̀ɛrɛ lí á de kũ á daonɛ, de àgɔ̃ aafia à gì kɛ andunia gũn. Yã kũ Luda dìtɛ káaku kũ lɛ́sɛnaaon gwe.
4Ákɔ̃nɔ denɔ sɔ̃, àsun á nɛ́nɔ pɔ yakaro. À ń tùtu kɛ à lɛ́ daḿma Yesude nɛ́gwana ũ.
Zɔ̀nɔ yã
5Ákɔ̃nɔ zɔ̀nɔ, àgɔ̃ á andunia dí dikirinɔ yã ma kũ nɛ̀sɛdoo kũ vĩnao kũ lukanaao lákũ Kirisin átɛn kɛnɛɛ bà. 6Àsun zĩ kɛńnɛ ń wɛ́ yãiro. Àgɔ̃ Luda pɔyenyĩna kɛ kũ yãpurao kũ ákɔ̃nɔmɛ Kirisi zɔ̀nɔ ũ yãi. 7Àgɔ̃ zĩ kɛ kũ kokario lákũ Dikirin átɛn kɛnɛɛ bà, adi kɛ bisãsirinlo. 8Àgɔ̃ dɔ̃ kũ Dikiri ni baadi yãmanakɛna fĩna bonɛ, zɔ̀ kesɔ̃ zĩdade.
9Ákɔ̃nɔ dikirinɔ sɔ̃, àgɔ̃ kɛńnɛ lɛ se. À yã pãsĩ ońnɛna tó. Àgɔ̃ dɔ̃ kũ mɔ́kɔ̃nɔ kũ ákɔ̃nɔo pínki, á Dikiri kú musu, àdi yã kɛ gbɛ̃ke wɛ́ yãiro.
Gɔ̃kɛbɔ kũ Luda kpàwánɔ
10Yã kũ à gɔ̃̀n dí: Àgɔ̃ gbãna Dikiri gũn kũ a iko gbãna zɔ̃kɔ̃ɔo. 11À gɔ̃kɛbɔ kũ Luda kpàáwanɔ da pínki, de à le à zɛ gíngin à Ibilisi ɔ̃ndɔ̃ fɔ̃. 12Zaakũ adi kɛ bisãsirinɔn ótɛn ɔsi ká kũńworo, sé nini vãni kũ ò kú musunɔ. Ò de andunia díkĩna gusira kíblerinɔ ũ kũ ń mìdenɔ kũ ń ikodenɔ. 13Abire yãi à gɔ̃kɛbɔɔ pìnɔ sɛ́tɛ à da pínki, de à fɔ̃ à zɛ à gí gɔrɔ vãnia, gbasa à gɔ̃ zɛna gíngin a pínki kɛnaa gbɛra. 14Àgɔ̃ zɛna gbãna, à yãpura dɔ á pi asa ũ, à yãzɛdekɛ da mɔ̀ uta ũ. 15À kɛna nna kũ Ludao baaru nna kpá kyate ũ, de àgɔ̃ kú kũ soruo. 16Àgɔ̃ ludanaanikɛna kũna sɛ̃gbako ũ gɔrɔ sĩnda pínki, de à fɔ̃ à Setan kà tɛ́denɔ dɛ pínki. 17À surabana sɛ́ à kú mɔ̀ fùra ũ, àgɔ̃ Luda yã kũ à de a Nini fɛ̃nɛda ũ kũna. 18Àgɔ̃ adua kɛ gɔrɔ sĩnda pínki, àgɔ̃ Luda kpányĩ gbɛka yã sĩnda pínki gũn kũ a Nini donnɛna arɛo. Àgɔ̃ itɛ̃ kɛ kũ mɛna zɔ̃kɔ̃ɔo, àgɔ̃ adua kɛ Luda gbɛ̃nɔnɛ ń pínki. 19À adua kɛmɛnɛ dɔ, de tó matɛn yã o, Luda ma gba lɛ́ mà a baaru nna asiri ońnɛ vĩna sari. 20Baaru nna pì yãi má de Luda wɛ́de kũ ò dà kpɛ́siran ũ. Àgɔ̃ adua kɛmɛnɛ, de mà baaru nna kpá vĩna sari lákũ à kũ̀ mà kpá nà.
Lɛ́zammanaa
21Ó gbɛ̃ndo yenyĩde Tikiku, Dikiri zĩkɛri náanide ni ma baaru kpáárɛ pínki, de à le àgɔ̃ ma kunna dɔ̃ kũ pɔ́ kũ matɛn kɛo. 22Ma a zĩ̀áwa de à ó kunna oárɛmɛ, á nɛ̀sɛ le à yĩda kũ.
23Ó gbɛ̃nɔ, De Luda kũ Dikiri Yesu Kirisio á gba aafia, à á yena kɔ̃i karaárɛ kũ á ludanaanikɛnaao. 24Luda gbɛ̃kɛ kɛ gbɛ̃ kũ ò ye ó Dikiri Yesu Kirisii lakanaa sarinɔnɛ ń pínki.
Currently Selected:
ƐFESUDENƆ 6: BB2005
Highlight
Copy
Compare
Share
Want to have your highlights saved across all your devices? Sign up or sign in
Bisã Bible © SIM International, 2005.
