ƐFESUDENƆ 5

Kunna gupuran

1Lákũ á de Luda nɛ́ yenyĩdenɔ ũ nà, à a ágba sɛ́. 2Lákũ Kirisi yewái nà à gì a wɛ̃̀ndiii ó yãi sa'obɔ kũ a gbĩ nna Ludanɛ ũ, à tó yekɔ̃i doárɛ arɛ lɛ se.

3Lákũ á de Luda gbɛ̃nɔ ũ nà, adi kũ ò pãpãkɛna ke dà vãni buri sĩnda pínki ke wãkũ yã ma á tɛ́ sero. 4Wé'isariyã'ona kũ yã dɔ̀rɔ sari onaao kũ fàai bɛ̃̀nɛ bonaao mana kãáoro dɔ, sé sáabukɛna yã. 5Àgɔ̃ dɔ̃ sãnsãn kũ pãpãkɛri ke kesɔ̃ dàvãnide ke kesɔ̃ wãkũde ke ni kpata kũ à bò Luda kĩnaa ble lɛɛlɛ kũ Kirisioro. Pɔ́ kũ gbɛ̃ dì a wãkũ kɛ gɔ̃̀ a dikiri ũmɛ. 6Àsun tó gbɛ̃ke á sãtɛ kũ yã pã korioro. Yã bire takanɔ mɛ́ ani tó Luda pɔfɛ̃ kipa a yãdarisarinɔa. 7Àsun tó á bàka gɔ̃ kú kũńworo. 8Á kú gusiran yã, tera sà Dikiri gũn á kú gupuran. Àgɔ̃ kun gupura gbɛ̃nɔ ũ, 9zaakũ gupura dì mana buri sĩnda pínki ińnɛ kũ yãzɛdeo kũ yãpurao. 10À yã kũ àdi ká Dikirigu dada. 11Á bàka súngɔ̃ kú kũ gusira yãkɛna kũ à karana vĩrooro. À yã birenɔ bobo gupurai. 12Bee yã kũ gbɛ̃ pìnɔ dì kɛ asiri gũn ona bi wé'iyãmɛ. 13Tó ò bò kũ yão gupurai, òdi a súsu dɔ̃, 14zaakũ gupura dì tó ò pɔ́ sĩnda pínki e. Abire yãi òdi pi:

I'ori ǹ vu ǹ futɛ bona gan,

Kirisi ni gu punnɛ.

15Àgɔ̃ á táa'ona dɔ̃ manamana. Àsungɔ̃ de yɔ̃nkɔnɔ ũro, sé ɔ̃ndɔ̃rinɔ. 16Àgɔ̃ yã kũ Luda a zɛ́ bòárɛ kɛ, zaakũ gɔrɔ díkĩnanɔn vãni. 17Abire yãi àsungɔ̃ de yɔ̃nkɔnɔ ũro, àgɔ̃ dɔ̃ lákũ Dikiri pɔyenyĩna de nà. 18Àsungɔ̃ kú kũ wɛ̃dɛkɛnaaoro, àdi pãpã zĩḿmamɛ, ama à tó Luda Nini gɔ̃ zĩ kɛ á guu papana, 19gbasa à fàai bo kũ kɔ̃o kũ zaburao kũ Luda tɔ́kpanaao kũ lɛ̀ kũ Luda Nini dì daárɛo. À lɛ̀ sí, à Dikiri tɔ́ kpá á swɛ̃̀ɛ gũn, 20àgɔ̃ De Luda sáabu kɛ gɔrɔ sĩnda pínki yã sĩnda pínki gũn kũ ó Dikiri Yesu Kirisi tɔ́o. 21À mì natɛkɔ̃nɛ Kirisi vĩna kũ á vĩ yãi.

Gɔ̃gbɛ̃ kunna kũ a nanɔo

22Ákɔ̃nɔ nɔgbɛ̃nɔ, á baadi gɔ̃ mì natɛ a zãnɛ lákũ Dikirin átɛn kɛnɛ bà. 23Zaakũ gɔ̃gbɛ̃mɛ nɔgbɛ̃ mì ũ, lákũ Kirisi de sɔsi gbɛ̃ kũ ò de a mɛ̀ ũnɔ mì ũ nà kũ ń Surabariio. 24Lákũ sɔsi gbɛ̃nɔ dì mì natɛ Kirisinɛ nà, lɛmɛ se nɔgbɛ̃nɔ gɔ̃ mì natɛ ń zãnɔnɛ lɛ yã sĩnda pínki gũn.

25Ákɔ̃nɔ gɔ̃gbɛ̃nɔ sɔ̃, á baadi gɔ̃ ye a nanɔi lákũ Kirisi ye sɔsi gbɛ̃nɔi nà, à gì a wɛ̃̀ndiii a yãi. 26À gbã̀ bònɛ kũ ío a yã gãi de àgɔ̃ de a pɔ́ ũ, 27de à ń kpan'arɛ kɛ kũ gakurio sãa sari yitorokũnaa sari mamberu sari gbãsĩ sari taari sari. 28Lɛn à kũ̀ gɔ̃gbɛ̃ sĩnda pínki gɔ̃ ye a nanɔi lɛ lán a zĩda mɛ̀ɛ bà. Gbɛ̃ kũ à ye a nanɔi ye a zĩdaimɛ. 29Gbɛ̃ke dì gí a zĩda mɛ̀ɛiro. Àdi pɔ́ble kpáa, àdi laakari dɔa lákũ Kirisi dì kɛ sɔsi gbɛ̃nɔnɛ nà, 30kũ ó de a mɛ̀gunɔ ũ yãi. 31Abire yãi gɔ̃gbɛ̃ ni bo a de kũ a dao bɛa, oni nakɔ̃a kũ a nanɔo, ń gbɛ̃nɔn pla ni gɔ̃ mɛ̀ do ũ. 32Asiri zɔ̃kɔ̃ kú yã pìi gũn, ma è à de lɛ Kirisi dagura kũ sɔsi gbɛ̃ɔo. 33Bee kũ abireo à de á yã ũ se dɔ. Á baadi gɔ̃ ye a nanɔi lán a zĩda bà. Nɔgbɛ̃ sɔ̃, à a zã yã da.

Currently Selected:

ƐFESUDENƆ 5: BB2005

Highlight

Copy

Compare