ƐFESUDENƆ 2
2
Vu à bona gan gɛ̃na wɛ̃̀ndin
1Á de yã gɛ̀nɔ ũ Ludanɛ á taarinɔ kũ á durunnanɔ yãi. 2Á tɛ́ andunia díkĩna ágbai, a mìi nàtɛ ĩa gbãnadenɔ kínanɛ, Setan kũ à kpɛ́ dona ludayãdarisarinɔnɛ arɛ pìi. 3Ó pínki ó de lán ń bà yã se. Odì pɔ́ kũ ó mɛ̀ yeii kũ yã kũ à ó pɔ gbào kɛ. Ó inaa gũn ó de gbɛ̃ kũ Luda ni pɔfɛ̃ kipaḿmanɔ ũ lán dakenɔ bà, 4ama Luda sùru zɔ̃kɔ̃, à yenyĩ vĩwɛrɛ manamana. 5Gɔrɔ kũ ó de gɛ̀nɔ ũ ó taarinɔ yãi, à ó fútɛ kũ Kirisio lɛɛlɛ. À á sura bà a gbɛ̃kɛ gũn. 6Kirisi Yesu gũn à ó sɛ́ à ó vútɛ kãao zaa musu, 7de à le à a gbɛ̃kɛ zɔ̃kɔ̃ bonsarɛ mɔńnɛ andunia kũ ani su gũn yãi yã mana kũ à kɛ̀wɛrɛ Kirisi Yesu gũn musu. 8Luda á sura bà a gbɛ̃kɛ gũn Yesu náani kũ a kɛ̀ yãi. Abire dí bo á kĩnaanlo, Luda mɛ́ à á gbá. 9Á surabana dí bo á yãkɛna gãinlo, de gbɛ̃ke sún ĩa dãoro yãi. 10Luda ɔgbɛn ó ũ. Kirisi Yesu gũn à ó kɛ́ de ògɔ̃ kú kũ yã mana kũ à gĩnakɛ à dìtɛwɛrɛ kɛnaao.
Gɔ̃na mɛ̀ dokɔ̃nɔ ũ Kirisi gũn
11Ákɔ̃nɔ kũ á de buri pãndenɔ ũ inaa gũn, à laasun lɛ́ á kunna yãa. Tɔ̃̀zɔ̃nadenɔ dì á sísi gyɔfɔrɔdenɔ, ama ń tɔ̃̀zɔ̃na de bisãsiri ɔgbɛ ũmɛ. 12Gɔrɔ birea á kun Kirisi sari, á de gbɛ̃ zĩ̀tɔnɔ ũ Isarailanɔnɛ. Á baka kú Luda bàka kunna kũńwo kũ a lɛ́sɛnnɛnaaoo gũnlo. Á kú andunia gũn tãmaa sari ludadɔ̃naa sari. 13Kirisi Yesu gũn tera, ákɔ̃nɔ kũ á zã̀ kũ Ludao yãnɔ a nai kãni kũ Kirisi aru gbãnao. 14Àkũmɛ ó kunna kũ kɔ̃o nna ũ, à tò Yudanɔ kũ buri pãndenɔ gɔ̃̀ mɛ̀ dokɔ̃nɔ ũ. A mɛ̀ɛ gũn à ibɛrɛ kũ à da ń dagura bĩni ũ gbòro, 15à Musa doka nà gui kũ a yãditɛnanɔ de à tó ń pla ń pínki gɔ̃ kãao gbɛ̃ dufu mɛ̀n do ũ. Lɛn à tò ò kɛ̀ kũ kɔ̃o nna lɛ. 16À ibɛrɛ làka, à ń pla ń pínki kɛ̀ nna kũ Ludao mɛ̀ dokɔ̃nɔ pìi gũn a gana lía yãi. 17À sù à kɛna nna kũ Ludao baaruu kpà ákɔ̃nɔ kũ á zã̀ kũ Ludaonɔnɛ kũ gbɛ̃ kũ ò kãni kãaonɔ dɔ. 18Kirisi yãi ó pínki ó zɛ́ vĩ ò na De Ludai kũ a Nini dokɔ̃nɔ gbãnao.
19Abire yãi á de gbɛ̃ zĩ̀tɔnɔ ke bòasunɔ ũ doro, a gɔ̃ bedenɔ ũ kũ Luda gbɛ̃nɔ, a ɔndenɔ ũmɛ. 20Ákɔ̃nɔmɛ kpɛ́ kũ Luda bò ɛ̃ kũ zĩ̀rinɔ kũ annabinɔ nàaa ũ, akũsɔ̃ Kirisi Yesumɛ à ɛ̃pɛtɛgbɛ ũ. 21A gũnn kpɛ́ pɔ́ sĩnda pínki dì kɔ̃ kũn, àdigɔ̃ gbã Luda kpɛ́ ũ Dikiri gũn. 22A gũn ákɔ̃nɔ se, á de kpɛ́ pì bobɔnɔ ũ, ákɔ̃nɔmɛ Luda Nini kúki ũ.
Currently Selected:
ƐFESUDENƆ 2: BB2005
Highlight
Copy
Compare
Share
Want to have your highlights saved across all your devices? Sign up or sign in
Bisã Bible © SIM International, 2005.
