ƐFESUDENƆ 1
1
Gbɛ̃kɛ kũ Luda kɛ̀wɛrɛ Kirisi gũn
1Makũ Pɔlu, Kirisi Yesu zĩ̀rii Luda pɔyenyĩnaa gũn, makũ mɛ́ ma takada dí kɛ̃̀ Luda gbɛ̃ kũ òtɛn Kirisi Yesu náani kɛ zaa Ɛfesunɔnɛ. 2Ó De Luda kũ Dikiri Yesu Kirisio gbɛ̃kɛ kɛárɛ, à á gba aafiaa.
3Ò Luda ó Dikiri Yesu Kirisi De sáabu kpá! Ó kunna Kirisi gũn Luda a Nini arubarika sĩnda pínki dàógu zaa musu. 4À ó sɛ́ a gũn andunia katɛna ã, de ó kunna gɔ̃ denɛ adona mamberu sari. Yenyĩ gũn 5à gĩnakɛ à ó dítɛ a nɛ́nɔ ũ Yesu Kirisi gãi, lákũ àtɛn wɛtɛ a pɔyenyĩnaa gũn nà, 6de à tɔ́ bo a gbɛ̃kɛ gakuride kũ à kɛ̀wɛrɛ a Nɛ́ yenyĩde gũn yãi. 7A gũn à ó bó kũ a aruo. À ó taarinɔ kɛ̃̀wá a gbɛ̃kɛ zɔ̃kɔ̃ 8kũ à kɛ̀wɛrɛ à gɛ̃̀ ɔla yãi. Ɔ̃ndɔ̃ sĩnda pínki kũ wɛ́zɛ̃ sĩnda pínkioo gũn 9à tò o a pɔyenyĩna asiri dɔ̃̀, lákũ à zɛ̀o à kɛ Kirisi gãi nà. 10Tó a pɔyenyĩnaa pì kɛgɔrɔ kà, ani pɔ́ sĩnda pínki kakara Kirisi ń Mìdenɛ, pɔ́ kũ à kú musu kũ zĩtɛo pínki. 11Luda kũ àdi yã sĩnda pínki kɛ lákũ à zɛ̀o a pɔyenyĩnaa gũn nà gĩnakɛ à ó dítɛ lákũ àtɛn wɛtɛ nà, à ó sɛ́ a pɔ́ ũ Kirisi gũn, 12de ókɔ̃nɔ kũ ó wɛ́ dɔ Kirisii zaa káakunɔ ògɔ̃ de a tɔ́ gakuride kpàrinɔ ũ. 13Ákɔ̃nɔ sɔ̃, a yãpura yã mà, a baaru nna kũ à á sura bàa pìi sì. A gũn Luda a zĩda sèedaa kɛ̀áwa a Nini kũ à a lɛ́ sɛ̀ ũ. 14Àkũmɛ túbi kũ óni le zɛnkpɛkɛ ũ ari Luda gɔ̃ gɛ́ a gbɛ̃nɔ bo, de ò a tɔ́ gakuride kpá yãi.
Pɔlu aduakɛna Ɛfesudenɔnɛ
15Abire yãi zaa gɔrɔ kũ ma á Dikiri Yesu náanikɛnaa mà kũ yenyĩ kũ á vĩ kũ Luda gbɛ̃nɔ ń pínki, 16mádi kámma bo kũ Luda sáabukpanaao á yã musuro. Á yã dìgɔ̃ dɔmagu wɛ́kɛ kũ madì kɛ Ludaaa gũn. 17Madì wɛ́ kɛ De gakuride, ó Dikiri Yesu Kirisi Ludaa, de à á gba ɔ̃ndɔ̃, à á wɛ́ kɛ̃árɛ kũ a Nini gbãnao de à le à a dɔ̃ swáswa. 18Madì wɛ́ kɛa à á nɛ̀sɛ wɛ̃árɛ de à le à tãmaa kũ à á sísia dɔ̃. À a túbi gakuride aruzɛkɛ pìnɔ dìtɛ a gbɛ̃nɔnɛ 19kũ a gbãna zɔ̃kɔ̃ bonsarɛ kũ àtɛn zĩ kɛ ókɔ̃nɔ kũ odì a náani kɛnɔ gũnwo. Gbãna zɔ̃kɔ̃ɔ pì zĩ kɛ̀ Kirisi gũn 20gɔrɔ kũ Luda a vù gan, à a vùtɛ a ɔplai zaa musu. 21Gwen Kirisi de kpatablerinɔ kũ ikodenɔ kũ gbãnadenɔ kũ dikirinɔla ń pínki kũ tɔ́ kũ òdi mì natɛńnɛnɔ pínki. Adi kɛ andunia tera díkĩna adonlo, kũ a pɔ́ kũ ani suomɛ dɔ. 22Luda tò à iko vĩ pɔ́ sĩnda pínkia, akũ à a dìtɛ pɔ́ sĩnda pínki mìde ũ sɔsi gbɛ̃nɔnɛ. 23Sɔsi gbɛ̃ pìnɔmɛ Kirisi mɛ̀ ũ, à de Kirisi kũ àdi pɔ́ sĩnda pínki papa gu sĩnda pínkia papana ũ.
Currently Selected:
ƐFESUDENƆ 1: BB2005
Highlight
Copy
Compare
Share
Want to have your highlights saved across all your devices? Sign up or sign in
Bisã Bible © SIM International, 2005.
