ƐFESUDENƆ 3

Pɔlu zĩkɛna buri pãndenɔ tɛ́

1Abire mɛ́ à tò makũ Pɔlu, má de purusuna ũ Kirisi Yesunɛ ákɔ̃nɔ buri pãndenɔ yãi. 2Ádi ma lákũ Luda a gbɛ̃kɛkɛnnɛna zĩ dàmɛnɛ mà kɛ á tɛ́roo? 3Luda a asiriyã mɔ̀mɛnɛ, ma kɛ̃̀árɛ fíti kɔ̀. 4Tó a a kyó kɛ̀, áni fɔ̃ à dɔ̃ lákũ ma wɛ́ kɛ̃̀ nà Kirisi asiriyã musu. 5Luda dí yã pì o gbɛ̃kenɛ yãro, akũ tera sà à mɔ̀ a zĩ̀rinɔ kũ a annabinɔnɛ kũ a Nini gbãnao. 6Yã kũ à utɛna yã pìn dí: Kirisi Yesu gũn baaru nna mana yãi buri pãndenɔ gɔ̃̀ Luda túbiblerinɔ ũ lɛɛlɛ kũ Yudanɔ, ò gɔ̃̀ kũńwo mɛ̀dokɔ̃nɔdenɔ ũ. Ń baka kú lɛ́ kũ Luda sɛ̀ɛ gũn. 7Ma gɔ̃ baaru nna pìi kpàri ũ gba kũ Luda dàmɛnɛ, a gbãna tɛ́n zĩ kɛ ma gũn yãi. 8Makũ kũ má kĩana Luda gbɛ̃nɔ tɛ́, Luda gba pìi dàmɛnɛ, akũ matɛn Kirisi aruzɛkɛ lakanasari baaru kpá buri pãndenɔnɛ, 9matɛn asiriyã kũ Luda tɛn wɛtɛ gbɛ̃ sĩnda pínkinɛ bońnɛ gupuraa. Asiriyã pì utɛna Luda kũ à pɔ́ sĩnda pínki kɛ̀ kĩnaa zaa káaku, 10akũ tera sà à tò kpatablerinɔ kũ ikode kũ ò kú musunɔ a ɔ̃ndɔ̃ buri dasinɔ dɔ̃̀ sɔsi gbɛ̃nɔ gãi. 11Luda pɔyenyĩna kũ à kun zaa káaku pì lɛ́ pàpa Kirisi Yesu ó Dikiri gãi. 12A gũn ó zɛ́ vĩ ò na Ludai kũ swɛ̃̀ɛo kpatɛna a náanikɛna yãi. 13Abire yãi ma wɛ́ kɛ̀áwa, àsun tó á nɛ̀sɛ yaka wari kũ matɛn kɛ á musu yãiro. Á kpetana yãimɛ.

Kirisi yenyĩ

14Abire yãi madì kútɛ De Ludanɛ. 15A kĩnaa a bede kũ ò kú musu kũ zĩtɛonɔ ń tɔ́ lèn ń pínki. 16Madì wɛ́ kɛa à á gba gbãna á nɛ̀sɛɛ gũn kũ a Nini gbãnao a aruzɛkɛ gakuride lɛ́n, 17de Kirisi vutɛ á swɛ̃̀n a náani kũ átɛn kɛ yãi, á zĩnipɛtɛna gɔ̃ gbãna yenyĩ gũn, 18de à le à a yenyĩ yàasa kũ a gbã̀nao kũ a leio kũ a lòkotooo gbá dɔ̃ kũ Luda gbɛ̃nɔ pínki, 19de à le à a yenyĩ kũ oni fɔ̃ ò a lɛ́ dɔ̃ pínkiro dɔ̃, Luda papana pínki pɛkɛrɛáwa.

20Luda zɔ̃kɔ̃! Ani fɔ̃ à kɛwɛrɛ de lákũ odì a wɛ́ kɛ ke odì a laasun lɛ́ nàla manamana kũ gbãna kũ àtɛn zĩ kɛ ó gũnwo. 21Ògɔ̃ a tɔ́ kpá sɔsi gbɛ̃nɔ kũ Kirisi Yesuoo gũn wɛ̃̀ kũ wɛ̃̀ɛo ari gɔrɔ sĩnda pínki! Aami.

Currently Selected:

ƐFESUDENƆ 3: BB2005

Highlight

Copy

Compare