2 PITA 3

Dikiri sugɔrɔ zĩ

1Ma gbɛ̃ yenyĩdenɔ, takada plade kũ ma kɛ̃̀árɛn dí. Takada mɛ̀n pla pínki pìnɔ gũn ma yã dɔ̀águ de à vu in kũ laasun manaomɛ. 2Má ye yã kũ Luda annabinɔ ò yãnɔ dɔágu kũ yã kũ ó Dikiri ó Surabarii dìtɛ a zĩ̀rinɔnɛ ò òárɛo. 3Àgɔ̃ dɔ̃ zaa káaku kũ gɔrɔ kpɛde zĩ zĩdapɔyeinakɛrinɔ ni su ò á fobo 4ò pi: Adi a suna lɛ́ sɛ́roo? À kú máa? Ó denɔ gà, ama pɔ́ sĩnda pínki kú a gbɛ̀n zaa lákũ Luda andunia kàtɛ nàmɛ. 5Kũ Luda yã ò yã à musu kũ anduniao kɛ̀, ò yã pìi kpà sãkoto. À zĩtɛ bò ín, à a kɛ̀ í pìi gãimɛ, 6akũ í pìi dà andunia káakupɔla, à a kàkatɛ. 7Luda yã'ona dokɔ̃nɔ pì mɛ́ à tò musu kũ andunia tera dío ditɛna tɛ́ pɔ́ ũ ari gɔrɔ kũ ani yãkpatɛ kɛ kũ a yãdarisarinɔ, à ń kakatɛ.

8Ma gbɛ̃ yenyĩdenɔ, àsun tó yã díkĩna sãáguro: Gɔrɔ do de Dikirinɛ lán wɛ̃̀ wàa sɔɔro bàmɛ, wɛ̃̀ wàa sɔɔro sɔ̃ denɛ lán gɔrɔ do bàmɛ. 9Dikiri mɛ̀fɛ̃ vĩ kũ yã kũ à a lɛ́ sɛ̀ kɛnaao lákũ gbɛ̃kenɔ tɛn da nàro, àtɛn mɛna kɛ kãáomɛ. À ye gbɛ̃ke kakatɛro, à ye gbɛ̃ sĩnda pínki nɛ̀sɛ litɛmɛ. 10Dikiri sugɔrɔ nigɔ̃ de lán kpãni suna bàmɛ. Zĩ birea musu ni gɛ̃tɛ fìoo, a pɔ́nɔ ni tɛ́ kũ ò pia, zĩtɛ kũ pɔ́ kũ ò kú a gũnnɔ nigɔ̃ kun doro. 11Zaakũ pɔ́ sĩnda pínki ni kakatɛ lɛ, gbɛ̃ kpate burin ánigɔ̃ de a ũu? À tó á kunna gɔ̃ adona ludayãmarinɔ ũ 12wɛ́dɔna a sugɔrɔi, à wɛ́ tã gɔrɔ pì ká likalika. Zĩ pìia musu ni tɛ́ kũ, a puusu wãna ni a pɔ́nɔ yɔ́. 13Ókɔ̃nɔ sɔ̃, ó wɛ́ dɔ ludambɛ dufu kũ zĩtɛ dufuooi kũ Luda a lɛ́ sɛ̀wɛrɛ. Gwen manakɛna nigɔ̃ kún.

14Abire yãimɛ ma gbɛ̃ yenyĩdenɔ, á wɛ́dɔna gɔrɔ pìii gũn à kokari kɛ àgɔ̃ kun mamberu sari taari sari, àgɔ̃ nna kũ Ludao. 15À ó Dikiri mɛnakɛ ditɛ surabana ũ, lákũ ó gbɛ̃ yenyĩde Pɔlu takada kɛ̃̀árɛ nà kũ ɔ̃ndɔ̃ kũ Luda a gbào. 16Yã pìnɔn Pɔlu ò takada kũ à kɛ̃̀nɔ gũn pínki. A takada pì gukenɔ dɔ̀rɔ dɔ̃na zĩ'ũ. Wɛ́siradenɔ kũ gbɛ̃ kũ ń zɛna gbãnaronɔ dì yã pìnɔ litɛ kpɛdangara, lákũ òdi kɛ nà kũ Luda yã takada kparanɔ. Lɛn òdi ń zĩda da kakatɛnan lɛ.

17Ákɔ̃nɔ sɔ̃ ma gbɛ̃ yenyĩdenɔ, lákũ á yã pì dɔ̃ nà kɔ̀, à laakari kɛ, de dokadarisarinɔ sún á sãtɛ kũ ń ɛ́kɛoro. Àsun bo á zɛna gbãnan à lɛ́tɛro. 18Àgɔ̃ gbã ó Dikiri ó Surabari Yesu Kirisi gbɛ̃kɛ kũ a dɔ̃naaoo gũn. Àkũ mɛ́ à gakuri vĩ tera ari gɔrɔ sĩnda pínki! Aami.

Currently Selected:

2 PITA 3: BB2005

Highlight

Copy

Compare