2 PITA 2

Ɛ́kɛyãdannɛrinɔ

1Annabi ɛ́kɛnɔ bò yã Isarailanɔ tɛ́. Lɛmɛ ɛ́kɛyãdannɛrinɔ ni bo á tɛ́ lɛ se. Oni ɛ́kɛ kũ àdi tó ò kakatɛ ká Luda yãdannɛnan, ò ledi kpá Dikiri kũ à ń bói, oni ń zĩda kakatɛ kãnto. 2Onigɔ̃ tɛ́ńyĩ dasi ń wé'isariyãkɛnaa gũn, oni yãpura zɛ́ vãni bo ń yãi. 3Ń wãkũkɛnaa gũn oni á ble kũ ɛ́kɛ kũ òdi bleao. Yãkpatɛ vùtɛḿma à gìi kɛ̀, i dì na ń Kakatɛri wɛ́nlo.

4Zaakũ Luda dí malaika kũ ò durunna kɛ̀nɔ tóro, à ń ká tɔ̃̀nɔwɛɛ sira kũ à kú zĩtɛzĩtɛ gũn, àgɔ̃ ń kũna ari yãkpatɛkɛgɔrɔ zĩ. 5Adi andunia zĩ kũ a yãdarisari kũ ò kú a gũnnɔ tóro, à tò í dàńla. Ama à Nuhu kũ àdi manakɛna waazi kɛ bò kũ gbɛ̃nɔn suppla pãndenɔ. 6À yã dà Sɔdɔmu kũ Gɔmɔraola à ń kákatɛ ò gɔ̃̀ túbu ũ, à ń kɛ́ lɛ yã kũ ani ludayãdarisarinɔ le sèeda ũ. 7Ama à Lutu bò, gbɛ̃ mana kũ a nɛ̀sɛɛ yàka dokadarisari pìnɔ wé'isariyãkɛna yãi. 8Gbɛ̃ mana pì kú ń tɛ́, yã vãni kũ àtɛn e akũsɔ̃ àtɛn ma lákũ gu dìgɔ̃ dɔ nà ũ̀a kũ a nɛ̀sɛmana yãi. 9Lɛmɛ dɔ Dikiri gbɛ̃ kũ ò naainɔ bona yɔ̃ogwanaa gũn zɛ́ dɔ̃, akũsɔ̃ à gbɛ̃ vãni kũna dɔ̃ de à wɛ́ tãa yãkpatɛkɛgɔrɔ zĩ. 10A pãsĩn sà gbɛ̃ kũ òdi iko gya bonɔ ũ, ń mɛ̀ dà vãninɔ mɛ́ àdi dońnɛ arɛ gbãsĩkɛnaa gũn.

Ɛ́kɛyãdannɛrii pìnɔ bi kùgbãnade karambaanidenɔmɛ. Dɔkɛna kũ malaika gakuridenɔ dì ń gba vĩnaro. 11Malaika kũ ń gbãna kũ ń ikoo de gbɛ̃ pìnɔlanɔ dì we ò ń tɔ́ bɛ̃̀nɛ sí ò yã diḿma Dikiri arɛro. 12Gbɛ̃ pìnɔ dì yã kũ ò a gbá dɔ̃ro bɛ̃̀nɛ bomɛ. Bisãsiri bára mɛ́ à kúḿma, ò laasun vĩro. Ò ń í, de ò ń kũkũ ò ń dɛdɛ yãimɛ. Oni kakatɛ lán nɔ̀bɔnɔ bà, 13oni a vãni kũ ò kɛ̀ fĩna bońnɛ. Dàvãnikɛna fãnantɛ̃ dì kɛńnɛ nna. Gɔrɔ kũ òtɛn pɔ́ ble kãáo, òdi pɔnna kɛ kũ ń pɔ́nidɛnanɔ. Ń kunna á tɛ́ bi mamberumɛ kũ gbãsĩo. 14Zinakɛna kú ń wɛ́a, durunnakɛna dì mɔḿmaro. Òdi manafiki kɛ gbɛ̃ kũ Luda yã dí zĩni pɛ́tɛ ń gũnlonɔnɛ. Wãkũ ń swɛ̃̀ɛ blè. Luda lɛ́ kɛ̀ńnɛmɛ. 15Ò sã̀tɛ, ò kɛ̃̀ zɛ́ súsua, ò zɛ́ dokɔ̃nɔ sɛ̀ kũ Bɛɔ nɛ́ Balamu kũ à ye ɔgɔ vãni lenaai. 16Zaaki pɔ́lɛbũnu'ina yã ònɛ lán bisãsiri bà, à kpã̀kɛ̃i a vãnikɛna yã musu, à gìnɛ kũ a yɔ̃nkɔkɛnaao. 17Gbɛ̃ abirenɔn de lán ísɛ̃boki kũ ń í bàbanɔ bàmɛ, lán luku kũ à gɛ̃̀tɛ kũ ĩao bà. Gusira níkinikin Luda dìtɛńnɛ yàri ũ. 18Òdi ĩa kori zɔ̃kɔ̃ dã, òdi ɔ̃ndɔ̃ kɛ gbɛ̃ kũ ò bò sãtɛna zɛ́n dufunɔnɛ kũ dàvãniyão kũ wé'isariyão. 19Yã kũ àdi ń yaka zɔ̀nɔmɛ ń ũ, akũ òdi gɔ̃na zĩdadenɔ ũ lɛ́ sɛ́ńnɛ. Zaakũ gbɛ̃ sĩnda pínki bi yã kũ à a swɛ̃̀ɛ blèe zɔ̀ɔmɛ.

20Tó ò bò andunia yãgbãsĩkɛnan ó Dikiri ó Surabari Yesu Kirisi dɔ̃naa gãi, akũ ò tò yã pìi ɛ̀ra à ń daguraa kɛ̀, à ń swɛ̃̀ɛ blè, ń kunna kpɛde vãni de a káakupɔla. 21Tó odi yãpura zɛ́ dɔ̃ yãro, de abirekũ manańnɛ de kũ ò dɔ̃̀, gbasa ò kpɛ lì Luda yã kũ ò dàńnɛnɛla. 22Yáasi kũ ò kɛ̀ díkĩnanɔ pàpa ń musu yãpura: Gbɛ̃da dì ɛra a pisii. Lɛmɛ dɔ: Alɛdɛ kũ ò a zú ò dì ɛra à mátɛmatɛ bɔkɔtɔmmɛ.

Currently Selected:

2 PITA 2: BB2005

Highlight

Copy

Compare