2 PITA 1
1
Yãpurakpana sísina kũ Luda ó sísia
1Makũ Simɔ Pita, Yesu Kirisi zɔ̀blerii, a zĩ̀rii, makũmɛ ma takada dí kɛ̃̀ gbɛ̃ kũ ó Luda ó Surabari Yesu Kirisi ń gbá zɛ́ ò a náani kɛ̀ lán ó bà à manakɛ gãinɔnɛ. 2Gbɛ̃kɛ kũ aafiaao gɔ̃ papanaáwa Luda kũ ó Dikiri Yesuo dɔ̃naa gũn.
3Luda ó sɛ́ ògɔ̃ kú a gakuri kũ a manakɛo gũmmɛ, à tò ó a dɔ̃, akũ a Ludakɛgbãna ó gbá pɔ́ kũ à kũ̀ ògɔ̃ vĩ, de ó kunna le à kɛ lɛɛlɛ kũ a yão. 4Lɛn à yã zɔ̃kɔ̃ bɛ̀ɛrɛde kũ à a lɛ́ sɛ̀wɛrɛnɔ kɛ̀ lɛ, de a yãi ò bo andunia dà vãni kũ àdi ń yaka gũn ò Luda kunna taka sɛ́. 5Yã bire yãi à kokari kɛ manamana, à Luda náani kɛ manakɛnaa gũn, à yã mana kɛ dɔ̃naa gũn, 6àgɔ̃ dɔ̃na vĩ á zĩda kũnaa gũn, àgɔ̃ á zĩda kũna dɔ̃ mɛna gũn, àgɔ̃ mɛna vĩ nana Ludaii gũn, 7àgɔ̃ nana Ludai kɔ̃gbɛ̃kɛ gũn, àgɔ̃ gbɛ̃kɛ vĩ kɔ̃o yenyĩ gũn. 8Zaakũ tó á yã birenɔ kũna, akũ òtɛn kara, ánigɔ̃ kun pã karanaa sariro ó Dikiri Yesu Kirisi dɔ̃naa gũn. 9Gbɛ̃ kũ à yã birenɔ kũna sɔ̃ro, à a wɛ́ nàkɔ̃a, à gɔ̃̀ vĩ̀na ũmɛ. À sã̀n kũ Luda durunna kũ à kɛ̀ yãnɔ kɛ̃̀arɛ. 10Abire yãi ma gbɛ̃nɔ, à kokari kɛ à yãpura kpá sísina kũ Luda á sísi à á sɛ́a. Tó átɛn yã birenɔ kɛ, áni fu zikiro. 11Lɛmɛ oni gbãnakɛ kpáái manamana lɛ, ánigɔ̃ kú kũ ó Dikiri ó Surabari Yesu Kirisio a kpata kũ àdi lákaro gũn.
12Abire yãimɛ, bee kũ á yã birenɔ dɔ̃, akũsɔ̃ á zĩni pɛtɛna yãpura kũ á kũnaa gũn, manigɔ̃ yã pìnɔ dɔágumɛ. 13Gɔrɔ kũ má kpɛ́ kú ma sɔ̀ɔ gũn, matɛn da à mana màgɔ̃ tɛ́ káágu yã pìnɔ dɔnaágu yãi. 14Má dɔ̃ kũ ma bona ma sɔ̀n gɔrɔ ni ká tera, lákũ ó Dikiri Yesu Kirisi gĩnakɛ à òmɛnɛ nà. 15Mani kokari kɛ, de yã pìnɔ le àgɔ̃ dɔágu gɔrɔ sĩnda pínki ma ga gbɛra.
Kirisi gakuri sèedadenɔ
16Kũ o ó Dikiri Yesu Kirisi suna kũ gbãnao òárɛ, ódi tɛ́ gara kũ ò dà kũ ɔ̃ndɔ̃ooiro. O wɛ́ kɛ̀ pla kũ a zɔ̃kɔ̃kɛomɛ, 17gɔrɔ kũ De Luda bɛ̀ɛrɛɛ lìnɛ à a tɔ́ bò. À Luda zɔ̃kɔ̃ gakuride kòtoo mà à pì a Nɛ́ mɛ̀n do légelege yenyĩden a ũ, a yã dì káagu. 18O kòto kũ à bò ludambɛ pìi mà gɔrɔ kũ ó kú kãao kpi kũ à kú adona musu. 19Abirekũ mɔ̀wɛrɛ kũ yã kũ annabinɔ ò bi yãpuramɛ. À mana à laakari dɔ yã pìia fitila kũ àtɛn gu bùruburu pu ũmɛ ari gudɔo susunɛ gɔ̃ gɛ́ futɛ á swɛ̃̀n, de gu le à dɔáwa. 20À kũ à deńla sà àgɔ̃ dɔ̃ kũ gbɛ̃ke dì fɔ̃ à yã kũ annabii kɛ̃̀ Luda yãn bɔkɔtɛ a zĩdaro. 21Annabinɔ yãke dì bo bisãsiri pɔyeinaa gũnlo, ò Luda yã ò lákũ a Nini dòńnɛ arɛ nàmɛ.
Currently Selected:
2 PITA 1: BB2005
Highlight
Copy
Compare
Share
Want to have your highlights saved across all your devices? Sign up or sign in
Bisã Bible © SIM International, 2005.
