2 KƆRINTIDENƆ 9

1Adi kũ mà takada kɛ̃árɛ Luda gbɛ̃nɔ kɔ̃ kámaza kɛnaa pì yã musuro, 2zaakũ má dɔ̃ kũ a nɛ̀sɛmana dà, akũ ma lɛ́ gbɛ̃̀ Masedonia gbɛ̃nɔnɛ ma pì, Girisi gbɛ̃nɔ soru mà zaa muniyã. Á aniakɛnaa pì ń gbɛ̃nɔ mɛ̀ɛ fùtɛ dasi. 3Akũ ma ó gbɛ̃ pìnɔ zĩ̀áwa de àgɔ̃ kú soru gũn lákũ ma ò nà, de lɛ́ kũ o gbɛ̃̀ yã pìi musu sún kɛ pãro. 4Tó Masedonia gbɛ̃kenɔ sù kũmao, tó ò è á soru dí manaro, wé'i ni ó kũ, kũ o á náanikɛna yãi., Oni á pɔ́ o dɔ yá? 5Abire yãi ma dìtɛ à mana mà o gbɛ̃ pìnɔnɛ ò domɛnɛ arɛ, ò gba kũ a gĩnakɛ a a lɛ́ sɛ̀ yã kɛkɛ káaku, de á soru gɔ̃ mana, àgɔ̃ de nɛ̀sɛdo gba ũ, adi kɛ gba tilasinlo.

Gbadana kũ nɛ̀sɛdoo

6Àgɔ̃ yã díkĩna dɔ̃:

Tó n tɔ̃̀ fíti, ĩni kɛ̃ fíti,

tó n tɔ̃̀ zɔ̃kɔ̃, ĩni kɛ̃ zɔ̃kɔ̃.

7Baadi kpá lákũ à dà a swɛ̃̀ɛ gũn nà ãnsisinaa sari tilasii sari. Luda ye gbɛ̃ kũ àdi gba da kũ pɔnnaooi. 8Luda ni fɔ̃ à tó arubarika sĩnda pínki likaái, de gɔrɔ sĩnda pínki pɔ́ sĩnda pínki mɔ́áwa yã sĩnda pínki gũn ari à fɛ̃̀ kãáo à yã mana sĩnda pínki kɛo. 9Lákũ à kɛ̃na Luda yãn nà ò pì:

Àdi pɔ́ fã takasidenɔnɛ,

a yãmanakɛna lakana vĩro.

10Lákũ Luda dì pɔ́buri kpá pɔ́tɔ̃riia nà kũ pɔ́ kũ òdi bleo, ani pɔ́buri kpááwa, à karaárɛ, de á manakɛna ɔgbɛ le à ɔ tá. 11Ani á kɛ pɔ́denɔ ũ yã sĩnda pínki gũn de àgɔ̃ gba da dasidasi gɔrɔ sĩnda pínki, gbɛ̃nɔ Luda sáabu kpá gba kũ a dàńnɛ ó gãi yãi. 12Zaakũ Luda gbɛ̃nɔ pɔ́kĩammana bɔkɔtɛn kámaza zĩ pì tɛn kɛ adoro, ani tó Luda sáabukpana dagula manamanamɛ dɔ. 13Gbɛ̃nɔ ni Luda tɔ́ bo, zaakũ kámaza kũ a kɛ̀ɛ pì ni mɔńnɛ, kũ a mìi nàtɛ Kirisi baaru nna kũ a zɛoonɛ, akũsɔ̃ a gbɛ̃kɛ kɛ̀ńnɛ kũ gbɛ̃ sĩnda pínkio kũ nɛ̀sɛ doo. 14Oni adua kɛárɛ kũ á yão dana ń swɛ̃̀n Luda gbɛ̃kɛ kũ à pìsiáwa yãi. 15À Luda sáabu kpá a gba kũ à gɛ̃̀ onala yãi.

Currently Selected:

2 KƆRINTIDENƆ 9: BB2005

Highlight

Copy

Compare