2 KƆRINTIDENƆ 3

1O ɛra ótɛni ó zĩda sáabu kpán yá? Ó bàka kú kũ sèeda takada kũ ò kɛ̃̀árɛ ke kũ a kɛ̃̀ńnɛo lán gbɛ̃kenɔ bàn yá? 2Ákɔ̃nɔmɛ ó takada pì ũ kũ à kɛ̃na ó swɛ̃̀ɛa. Gbɛ̃ sĩnda pínki ni fɔ̃ à dɔ̃ à a kyó kɛ. 3Átɛn mɔńnɛ gupuraa kũ ákɔ̃nɔmɛ takada kũ Kirisi kɛ̃̀ à nàwɛrɛ ó ɔĩ ũ. Adi takada pì kɛ̃ kũ tawadaaoro, à kɛ̃̀ kũ Luda Wɛ̃̀ndide Niniomɛ. Adi kɛ̃ gbɛ̀ anloaro, à kɛ̃̀ á swɛ̃̀ɛamɛ.

4Yã kũ ó a náani vĩn gwe Luda arɛ Kirisi gãi. 5Adi kɛ o ka ó zĩdanɛ ò pi, yã pìi bò ó kĩnaanlo, Ludamɛ ó gbãna ũ. 6Àkũ mɛ́ à ó káa, akũ ó de a bàka kunna kũ gbɛ̃nɔo dufu zĩkɛrinɔ ũ. Adi kɛ doka kũ à kɛ̃nanlo, Luda Nini yãmɛ. Zaakũ doka dì ga ińnɛ, Nini pì sɔ̃, àdi wɛ̃̀ndi ińnɛ.

7Kũ Luda doka kɛ̃̀ gbɛ̀ anloa, a gakuri bò Musa ãnnwa. Bee kũ a tɛ́kɛna dí gì kɛro, Isarailanɔ dí fɔ̃ ò gwàro. Tó zɛ́ kũ àdi ga ińnɛ pìi bò kũ gakuri bire takao, 8oni Nini pì zɛ́ gakuri yã o dɔ yá? 9Tó zɛ́ kũ àdi yã dańla gakuri vĩ, zɛ́ kũ àdi tó yã bo kũńwo nna gakuri deala zã̀. 10Pɔ́ kũ à gakuri vĩ yã gakuri vĩ doro, gakuri kũ à deala pì yãi. 11Tó pɔ́ kũ adi gì kɛro bò kũ gakurio, pɔ́ kũ àdigɔ̃ kun gakuri deala zã̀.

12Zaakũ ó tãmaa bire taka vĩ, odì yã o kũ swɛ̃̀gbãnao, 13adi kɛ lán Musa bàro, kũ à fáta kù a ãnnwa de Isarailanɔ sún a ãn tɛ́kɛna kũ àdi gì kɛro lakana ero yãi. 14Ama ń sã gbãna, zaakũ ari gbãra tó òtɛn Luda bàka kunna kũńwo takada kyó kɛ, fáta dokɔ̃nɔ pìi dìgɔ̃ kú ń laasunlamɛ. Àdi goro, séto gbɛ̃ kú Kirisi gũn baasiro. 15Ari kũ a terao tó òtɛn Musa takada kyó kɛ, fáta pìi dìgɔ̃ kú ń laasunlamɛ. 16Ama tó gbɛ̃ arɛ dɔ̀ Dikiria, fáta pìi dì goa. 17Dikiri pìimɛ Luda Nini ũ, akũsɔ̃ gu kũ Dikiri Nini pì kún, àdi tó ò gɔ̃ ń zĩdanɛ. 18Ókɔ̃nɔ kũ pɔ́ gò ó ãnnwanɔ, ótɛn Dikiri gakuri mɔńnɛ lán dígi bà, odìgɔ̃ li lán a bà gakuri gɔ̃ kara gakurila. Dikiri kũ à de Luda Nini ũ pì kɛnaan gwe.

Currently Selected:

2 KƆRINTIDENƆ 3: BB2005

Highlight

Copy

Compare