2 KƆRINTIDENƆ 12

Pɔlu wɛ́gupu'enaa

1À kũ̀ tilasi mà lɛ́ gbɛ̃. Bee kũ à àre vĩro, mani lɛ́ pá wɛ́gupu'enanɔa kũ yã kũ Dikiri mɔ̀mɛnɛnɔo sà. 2Má gbɛ̃ke dɔ̃ Kirisi gũn, ò a sɛ̀ ò gɛ̀ɛ kãao ari ludambɛ aakɔ̃den, a wɛ̃̀ gɛ̃ro donsarin dí. À gɛ̀ɛ kũ mɛ̀ɛon yá, mɛ̀ɛ sarin yá, má dɔ̃ro, sé Luda. 3Má dɔ̃ kũ ò ade pìi sɛ̀ ò gɛ̀ɛ kãao aruzennammɛ. À gɛ̀ɛ kũ mɛ̀ɛon yá, mɛ̀ɛ sarin yá, Luda mɛ́ à dɔ̃. 4À yã kũ àdi sí oro mà, kũ bisãsiri ni fɔ̃ à babaro. 5Mani lɛ́ gbɛ̃ ade yã musu, mani gbɛ̃ ma zĩda yã musuro, sé ma gbãnasarikɛ yã. 6Bee tó mani lɛ́ gbɛ̃, adi kɛ má yɔ̃nkɔnlo, zaakũ yãpuran mani o. Ama mani lɛ́ gbɛ̃ro, de gbɛ̃ke sún ma ditɛ de pɔ́ kũ à èma ke yã kũ à mà ma lɛ́nlaro. 7De màsun ĩa dã yã zɔ̃kɔ̃ kũ Luda mɔ̀mɛnɛnɔ musuro yãi, à pɔ́ sɔ̀tɔ ma mɛ̀ɛ gũn Setan zĩ̀ri ũ, àgɔ̃ wɛ́ tãma, de màsun ĩa dãro yãi. 8Ma wɛ́ kɛ̀ Dikiria gɛ̃̀n aakɔ̃ yã pìi musu de à pɔ́ pì bo ma mɛ̀n, 9akũ à pìmɛnɛ, a gbɛ̃kɛ kũ adì kɛmɛnɛ mɔ̀ma. Gbãnasarikɛ gũnn a gbãna papana dì bon. Abire yãi mani lɛ́ gbɛ̃ kũ pɔnnao ma gbãnasarikɛ musu, de Kirisi gbãna gɔ̃ kú ma gũn. 10Abire yã mɛ́ à tò madì pɔnna kɛ kũ gbãnasarikɛo kũ wé'idammanaao kũ wario kũ takasio kũ wɛ́tãmmanaao Kirisi yãi, zaakũ gɔrɔ kũ gbãna kĩ̀aman madìgɔ̃ gbãna.

Kɔrintidenɔ yã Pɔlu kũna gbãna

11Ma yɔ̃nkɔyã kɛ̀, ákɔ̃nɔ mɛ́ a ma dan. Ákɔ̃nɔmɛ à de yã à ma sáabu kpá. Bee tó má kun pɔ́ke ũro, má kĩana zĩ̀ri kũ a ń dítɛ zɔ̃kɔ̃ɔ kũ̀nɔi yãke gũnlo. 12Ma a kunna zĩ̀ri ũ mɔ̀árɛ kũ mɛnao manamana sèedakɛnanɔ kũ yãbonsarɛnɔ kũ daboyãnɔ gũn. 13Bɔ́ mɛ́ à á kĩa sɔsinɔ gbɛ̃ kparanɔaa? Ke kũ mádi gɔ̃ á gbɛ̃kenɛ aso ũro yãii? À sùru kɛ kũmao kũ taari dio! 14Tera sà ma soru kɛ̀ mà su á kĩnaa a gɛ̃̀n aakɔ̃deo, akũsɔ̃ mani gɔ̃ á gbɛ̃kenɛ aso ũro. Ákɔ̃nɔ matɛni á wɛtɛ, adi kɛ á pɔ́nɔn matɛn wɛtɛro. Zaakũ denɔ mɛ́ òdi aruzɛkɛ ditɛ ń nɛ́nɔnɛ, adi kɛ nɛ́nɔ mɛ́ òdi ditɛńnɛro. 15Mani fɔ̃ mà pɔ́ kũ má vĩ deárɛ pínki, mà a zĩda kpááwa kũ pɔnnao. Tó ma yenaái tɛn kara, á yenamai ni lagon yá? 16Bee kũ a we kũ mádi gɔ̃árɛ aso ũro, gbɛ̃nɔ dì pi, wɛ́zɛ̃rin ma ũ, ma pɔ́ sìáwa kũ ɔ̃ndɔ̃o. 17Ma á blé gbɛ̃ kũ ma ń zĩáwanɔ ke gãi yá? 18Ma kútɛ kɛ̀ Titunɛ à gɛ́ á kĩnaa, akũ ma ó gbɛ̃ndo dànɛ. Titu á blén yá? Ó nɛ̀sɛ dokɔ̃nɔnloo? Ó ágba dokɔ̃nɔnloo?

19Átɛn da yã ótɛn boki wɛtɛn yá? Lɛnlo! Ótɛn yã o kũ Luda dɔ̃naao kunna Kirisi gũmmɛ. Ma gbɛ̃ yenyĩdenɔ, ma abire òárɛ pínki á zĩni pɛtɛna yãimɛ. 20Vĩna tɛni ma kũ kũ tó ma su á kĩnaa, mani á le lákũ má ye nàro, akũsɔ̃ áni ma e lákũ á ye nàro. Matɛn vĩna kɛ fìtiinɛ kũ nɛ̀sɛgɔ̃baao kũ pɔfɛ̃o kũ ania pãsĩo kũ kɔ̃yakanaao kũ kɔ̃pinaao kũ ĩadãnaao kũ zukakanaao. 21Vĩna tɛni ma kũ kũ tó ma ɛra ma su á kĩnaa, ma Luda ni tó wé'i ma kũ á arɛ. Gbɛ̃ kũ ò durunna kɛ̀ yã, ò gbãsĩ kɛ̀, ò pãpã kɛ̀, ò wé'isariyã kɛ̀nɔ, tó odi nɛ̀sɛ litɛ ò mìi kɛ̃̀ yã pìnɔaro, mani pɔsira kɛ kũńwo.

Currently Selected:

2 KƆRINTIDENƆ 12: BB2005

Highlight

Copy

Compare