2 KƆRINTIDENƆ 11
11
Pɔlu kũ zĩ̀ri ɛ́kɛnɔ
1À mɛna kũmao kũ ma yɔ̃nkɔkɛo fíti. Ama átɛn mɛna kɔ̀. 2Lákũ Luda dì gɔ̃ba kpá nà, lɛn matɛn kpá lɛ se á yã musu. Ma á kpá Kirisia á gɔ̃ mɛ̀n do ũ, de mà á kpãzãa lákũ nɔkpare lési bà. 3Lákũ mlɛ̃̀ ɔ̃ndɔ̃ kɛ̀ Awaunɛ nà, à a sã̀tɛ, vĩna tɛni ma kũ kũ ani á laasun likaraárɛ lɛ se, de à á nana Kirisia gbãsĩ sari kũ nɛ̀sɛdoo tó. 4Tó gbɛ̃ke sù à Yesu yã kũ à bò ado kũ ó pɔ́o waazi kɛ̀árɛ, adì sí araga. Adì nini kũ à bò ado kũ pɔ́ kũ a sìo sí, adì baaru nna kũ à bò ado kũ pɔ́ kũ a mào ma. 5Matɛn da má kĩana zĩ̀ri kũ a ń dítɛ zɔ̃kɔ̃ kũ̀nɔi yãke gũnlo. 6Bee tó má lɛ́nnaro, má dɔ̃na vĩ. O mɔ̀árɛ á pínki súsu yã sĩnda pínki gũn.
7Kũ ma baaru nna kũ à bò Luda kĩnaa waazi kɛ̀árɛ pɔ́sinaáwa sari, akũ ma a zĩda bùsa á karana yãi, ma taari kɛ̀n yá? 8Ma sɔsi pãndenɔ gbɛ̃nɔ taki kɛ̀, ma a bakaa lèḿma, de mà le mà zĩ kɛo á tɛ́ yãi. 9Gɔrɔ kũ má kú kãáo, tó pɔ́ tɛn kĩama, madì wari dɔ gbɛ̃kearo. Ó gbɛ̃ kũ ò bò Masedonia bùsunnɔ sùmɛnɛ kũ pɔ́ kũ àtɛn kĩamao. Matɛn we mà kɛ á gbɛ̃kenɛ aso ũro, akũsɔ̃ mani we mà kɛ á gbɛ̃kenɛ aso ũro. 10Kũ Kirisi yãpura kũ à kú ma gũnwo, gbɛ̃ke ni kpámɛnɛ mà lɛ́ pìi gbɛ̃ Girisi bùsunlo. 11Bɔ́yãin ma ò lɛɛ? Luda dɔ̃ kũ má yeái.
12Yã kũ matɛn kɛ, manigɔ̃ kɛmɛ, de mà gbɛ̃ kũ òtɛni ń zĩ lɛkɔ̃a kũ ó pɔ́onɔ zĩni zɔ̃zɔ̃ kũ ń lɛ́gbɛ̃nanɔ. 13Gbɛ̃ bire takanɔ bi zĩ̀ri ɛ́kɛnɔmɛ! Zĩkɛri manafikidenɔmɛ! Òdi li Kirisi zĩ̀rinɔ ũ. 14Yã bonsarɛnlo. Bee Setan pìi dì li gupura malaika ũ se. 15Zaakũ lɛmɛ, tó a zĩkɛrinɔ lì yã mana zĩkɛrinɔ ũ, yãbonsarɛnlo. Kpɛkpɛ oni ń yãkɛnaa gbɛ̀ le.
Pɔlu warikɛna a zĩ̀rikɛ gũn
16Ma ɛra matɛn o dɔ, gbɛ̃ke sún ma gwa yɔ̃nkɔ ũro. Tó lɛn sɔ̃ro, àgɔ̃ ma ditɛ lán yɔ̃nkɔ bà, de mà le mà lɛ́ gbɛ̃ fíti. 17Yã kũ matɛn o, Dikiri mɛ́ à ma danlo. Lɛ́ kũ matɛn gbɛ̃ ma zĩda náanikɛnaa gũn, matɛn gbɛ̃ yɔ̃nkɔkɛ gũmmɛ. 18Lákũ gbɛ̃nɔ tɛn lɛ́ gbɛ̃ ń zĩda yã musu dasi nà, makũ se mani gbɛ̃. 19Zaakũ ákɔ̃nɔ ɔ̃ndɔ̃rinɔ adì mɛna fɔ̃ kũ mìsaridenɔ kũ pɔnnao. 20Tó òtɛni á kɛ zɔ̀nɔ ũ, tó òtɛni á aru mi, tó òtɛni á taki kɛ, tó òtɛn deńla mɔárɛ, tó òtɛni á sãn kɛ, adì mɛna fɔ̃. 21Yãpuramɛ, ó busɛ kũ yã pìnɔ kɛnaao! Abire kɛ̀mɛnɛ wé'iyã ũ! Ama pɔ́ kũ gbɛ̃ náanikɛna, àtɛni a lɛ́ gbɛ̃, má a náanikɛna se. Matɛn abire o yɔ̃nkɔkɛ gũmmɛ. 22Eberunɔmɛ ń ũ yá? Àkũ ma ũ se. Isarailanɔmɛ ń ũ yá? Àkũ ma ũ se. Ibrahĩ burinɔmɛ ń ũ yá? Àkũ ma ũ se. 23Kirisi zĩkɛrinɔmɛ ń ũ yá? Má a zĩkɛri ũ deńla. Matɛn o lán ĩade bàmɛ. Ma zĩ kɛ̀ deńla, ma dana kpɛ́siran deńla, má a gbɛ̃na lɛ́ dɔ̃ro, ma kunna ga lɛ́i lɛ́ vĩro. 24Yudanɔ ma gbɛ̃ kũ flã̀ao lɛ́ bupla mɛ̀n donsari ari gɛ̃̀n sɔɔro. 25Ò ma lɛlɛ kũ gòoo gɛ̃̀n aakɔ̃. Ò ma papa kũ gbɛ̀ɛo gɛ̃̀n do. Gó'itɛ kpàtɛ kũmao gɛ̃̀n aakɔ̃, ma kɛ gɔrɔ do ísira gũn fãnantɛ̃ kũ gwãanio. 26Ma wɛ̃tɛgɛna dasinɔ gũn madìgɔ̃ kú karii gũn: Swa karii, kpãni wɛ́dewɛnɔ karii, Yudanɔ karii, buri pãndenɔ karii, wɛ̃tɛ gũn karii, sɛ̃̀ntɛ karii, ísira karii, Yesude ɛ́kɛnɔ karii. 27Ma zĩ gbãna kɛ̀ kũ wãwão, ma itɛ̃ kɛ̀ a lɛ́ vĩro, nà ma dɛ, ími ma kũ, madìgɔ̃ kun pɔ́blenaa sari gɛ̃̀n baaakɔ̃, má tɛ́ punsi ĩa gũn. 28A kparanɔ onaa baasi sɔsinɔ gbɛ̃nɔ sĩnda pínki laasun dì tɔ̃ma lákũ gu dìgɔ̃ dɔ nà. 29Dí mɛ́ ani busa, mà gí busaii? Dín oni kɛ̃ zɛ́a à gí ũmaa?
30Tó à kũ̀ mà lɛ́ gbɛ̃, mani gbɛ̃ ma gbãnasarikɛ musumɛ. 31Luda ó Dikiri Yesu Kirisi De dɔ̃ kũ matɛn ɛ́kɛ toro. Ògɔ̃ a sáabu kpá gɔrɔ sĩnda pínki! 32Gɔrɔ kũ má kú Damasuku, akũ kína Areta asakpa pì ò wɛ̃tɛ pì bĩnilɛnɔ dãkpã, de ò le à ma kũ yãi, 33akũ ò ma bo wondoo gũn, ò ma kipa kũ bàao tãnko gũn bĩni kpɛ, akũ ma bàa sì.
Currently Selected:
2 KƆRINTIDENƆ 11: BB2005
Highlight
Copy
Compare
Share
Want to have your highlights saved across all your devices? Sign up or sign in
Bisã Bible © SIM International, 2005.
