1 TIMƆTI 3
3
Sɔsi gbɛ̃ zɔ̃kɔ̃nɔ
1Yã díkĩna bi yãpuramɛ: Tó gbɛ̃ ye à kɛ gbɛ̃ zɔ̃kɔ̃ ũ, àtɛn zĩ mana ni dɛ. 2Gbɛ̃ zɔ̃kɔ̃ gɔ̃ kun taari sari, nɔmɛndode ũ, laakaride ũ. Àgɔ̃ a zĩda kũna dɔ̃ gbɛ̃ fayade ũ, nibɔkũri ũ, gbɛ̃ kũ ani fɔ̃ à yã dańnɛ ũ. 3Àsungɔ̃ de wɛ̃dɛri ke gbɛ̃ pãsĩ ũro. Àgɔ̃ de nɛ̀sɛdode yãketesaride ũ. Ɔgɔ sún donɛ arɛro. 4Àgɔ̃ a ɔn kũna dɔ̃, a nɛ́nɔ gɔ̃ mì natɛnɛ ògɔ̃ a ɔdɔki gwa. 5Zaakũ tó gbɛ̃ a ɔn kũna dɔ̃ro, ani kɛ dera à fɔ̃ à Luda sɔsi gbɛ̃nɔ gwaa? 6Àsungɔ̃ de Yesude dufu ũro, de àsun ĩa dã à a zĩda da yãn lán Ibilisi bàro yãi. 7Àgɔ̃ tɔ́ nna vĩ Yesusaridenɔ kĩnaa dɔ, de òsun a tɔ́ ĩni sí, à zu Ibilisi tankutɛnlo yãi.
Sɔsi kpanyĩrinɔ
8Lɛmɛ dɔ kpanyĩrinɔ gɔ̃ de gbɛ̃ bɛ̀ɛrɛdenɔ ũ. Òsungɔ̃ de lɛ́pladenɔ ũro. Wɛ̃ yã sún dońnɛ arɛro. Òsungɔ̃ de ɔgɔ vãni wɛtɛrinɔ ũro. 9Ògɔ̃ Yesu yã asirinɔ kũna kũ nɛ̀sɛpurao. 10Ò ń yã gwa gĩa, tó ódi yãke leḿmaro, gbasa ò ń ditɛ kpanyĩrinɔ ũ. 11Lɛmɛ dɔ ń nɔnɔ gɔ̃ de nɔgbɛ̃ bɛ̀ɛrɛdenɔ ũ, laakaridenɔ ũ, ògɔ̃ náani vĩ yã sĩnda pínki gũn. Òsungɔ̃ de kɔrɔmɔtɔdenɔ ũro. 12Kpanyĩri gɔ̃ de nɔmɛndode ũ, àgɔ̃ a ɔn kũ a nɛ́nɔ kũna dɔ̃. 13Gbɛ̃ kũ ò ń zĩ kɛ̀ a zɛ́anɔ gwena nigɔ̃ mana, ń laakari nigɔ̃ kpatɛna ń Kirisi Yesu náanikɛnaa gũn manamana.
Ó donyĩzɛ asiri zɔ̃kɔ̃
14Bee kũ matɛn yã dínɔ onnɛ, ma dìtɛ mani su n gwa saa. 15Tó ma suna sù à gìi kɛ̀, má ye ǹgɔ̃ dɔ̃ lákũ à kũ̀ ògɔ̃ kun Luda ɔndenɔ ũ nà. Ɔnde pìnɔmɛ Luda Wɛ̃̀ndide sɔsi ũ, yãpura pɛ́tɛki ũ kũ a gbãnalekio. 16Ó donyĩzɛ asiri kũ à bò gupuraa zɔ̃kɔ̃ yãpuramɛ:
À bò à sù bisãsiri ũ,
Luda Nini yãpura kpàa,
malaikanɔ a è.
Ò a yã waazi kɛ̀ burinɔ tɛ́,
ò a náani kɛ̀ andunia gũn,
Luda a sɛ̀ à tà kãao gakuri gũn.
Currently Selected:
1 TIMƆTI 3: BB2005
Highlight
Copy
Compare
Share
Want to have your highlights saved across all your devices? Sign up or sign in
Bisã Bible © SIM International, 2005.
