1 TIMƆTI 4

Tɛ̃̀ yãnɔ

1Luda Nini ò swáswa kũ gɔrɔ kpɛde gbɛ̃kenɔ ni pã kpá Yesu zɛ́i, ò tɛ́ yã kũ tãnanɔ dì ɛ́kɛdenɔ da a onanyĩ ò ń sãtɛ. 2Manafikide pìnɔ a mana dɔ̃kɔ̃nɛ kũ a vãnioro, ń nɛ̀sɛ gana lákũ ò pi gɛ̃ wãnan ò kɛ̃̀o bà. 3Òdi gbɛ̃nɔ dãdã nɔsɛnaai kũ zãkɛnaao, akũsɔ̃ òdi pɔ́ble tɛ̃̀bona ditɛ gbɛ̃nɔnɛ, pɔ́ble kũ Luda kɛ̀ a náanikɛri kũ ò yãpura dɔ̃nɔ yãi, kũ à de ò ble kũ sáabukpanaao. 4Pɔ́ kũ Luda kɛ̀ sĩnda pínki manamɛ. Òsun a ke tɛ̃̀ boro, ò ble kũ sáabukpanaao, 5zaakũ Luda yã kũ ó aduakɛnaao gbãsĩ bòn.

Kirisi Yesu zĩkɛri mana

6Tó n yã pìnɔ dà n gbɛ̃nɔnɛ, ĩnigɔ̃ de Kirisi Yesu zĩkɛri mana ũ kũ ò gwà kũ ó donyĩzɛ yãnɔ kũ yãdannɛ mana kũ ń tɛ́iio. 7Ǹ mì kɛ̃ futɛokaragara kũ àdi kɔ̃ sí kũ Luda yãoroa. Ǹ n zĩda tùtu kɛ de ǹgɔ̃ de ludayãmari ũ. 8Mɛ̀tutukɛnaa àre vĩ fíti, ama dena ludayãmari ũ àre vĩ yã sĩnda pínki gũn, zaakũ abire dì su kũ wɛ̃̀ndiio gbãra kũ ziao. 9Yã díkĩna bi yãpuramɛ, à kà ò sí ɔplapla. 10Òdi zĩ kɛ òdi ɔsi ká a musu, zaakũ ó wɛ́ dɔ Luda Wɛ̃̀ndidei. Àkũmɛ gbɛ̃ sĩnda pínki Surabari ũ, atɛ̃nsa a náanikɛrinɔ.

11Ǹ yã pìnɔ ditɛńnɛ ǹ dadańnɛ. 12Ǹsun tó ò n kɛfɛnnakɛna gya boro. Ǹ tó n kunna zɛ́ mɔ Yesu náanikɛrinɔnɛ yã'onaa gũn kũ yãkɛnaao kũ yenyĩo kũ ludanaanikɛnaao kũ kunna gbãsĩ sario. 13Ari màgɔ̃ su ǹ wɛ́ tã ǹ Luda yã kyó kɛ gbɛ̃nɔnɛ, ǹ dańnɛ ǹ lɛ́ daoḿma. 14Gba kũ Luda dànnɛ gɔrɔ kũ ò annabikɛyã ò n yã musu, akũsɔ̃ gbɛ̃ zɔ̃kɔ̃nɔ ɔ nànamma, ǹsun pã kpáiro. 15Ǹ laakari dɔ yã pìnɔa ǹ mɛ̀ kpáa, de gbɛ̃ sĩnda pínki n gɛna arɛ e. 16Ǹ n zĩda yã kũ n yãdannɛnaaoo tàasi ká. Ǹgɔ̃ gɛ́ arɛ kũ yã pìnɔ. Tó n kɛ̀ lɛ, ĩni n zĩda sura ba kũ gbɛ̃ kũ òtɛn sã kpá n yãinɔomɛ.

Currently Selected:

1 TIMƆTI 4: BB2005

Highlight

Copy

Compare