1 PITA 2
2
Gbɛ̀ wɛ̃̀ndide
1Abire yãi à yã vãni sĩnda pínki tó kũ ɛ́kɛtona sĩnda pínkio kũ manafikio kũ nɛ̀sɛgɔ̃bao kũ kɔ̃yakanaao. 2Lákũ nɛ́kpãntɛ̃nɔ dìgɔ̃ yɔ̃'i ni dɛ nà, àgɔ̃ Luda yã kũ à de lán vĩ'ipu swáswa bà ni dɛ lɛ se, de à le à gbã á surabana zɛ́ gũn, 3tera sà kũ a dɔ̃̀ kũ Dikiri mana. 4À nai, àkũmɛ gbɛ̀ wɛ̃̀ndide kũ ò gìi ũ, ama Luda a sɛ̀ bɛ̀ɛrɛde ũ. 5Ákɔ̃nɔ sɔ̃ á gbɛ̀ wɛ̃̀ndide kũ Luda tɛni a kpɛ́ ɛ̃ boonɔ ũ. Ákɔ̃nɔmɛ a gbàgbarinɔ ũ, adì sa kũ àdi káagu o kũ a Nini gbãnao Yesu Kirisi gãi. 6Zaakũ ò kɛ̃̀ Luda yãn ò pì:
Ǹ gwa, matɛn gbɛ̀ ditɛ Zaiɔ̃,
ɛ̃pɛtɛna gbɛ̀ bɛ̀ɛrɛde kũ ma sɛ̀ ũ.
Wé'i ni gbɛ̃ kũ àtɛni a náani kɛ kũro.
7À de gbɛ̀ bɛ̀ɛrɛde ũ ákɔ̃nɔ kũ átɛni a náani kɛnɔnɛ, ama à de lɛ gbɛ̃ kũ òtɛni a náani kɛronɔnɛro.
Gbɛ̀ kũ kpɛ́borinɔ pã kpài
mɛ́ à gɔ̃̀ kpɛ́ kusuru gbɛ̀ mìde ũ.
8Lɛn dɔ à de:
Gbɛ̀ kũ òdi gɛ̃̀ sía ũ,
gbɛ̀si kũ òdi kpáala ò lɛ́tɛ ũ.
Ò gɛ̃̀ɛ sìa, kũ odi Luda yã daro yãi. Lɛn Luda dìtɛńnɛ lɛ.
9Ákɔ̃nɔmɛ buri kũ Luda ń sɛ́nɔ ũ, kínanɔ kũ sa'orinɔ ũ, a gbɛ̃ kũ ò kú adonanɔ ũ, de à Luda kũ à á sisi a bo gusiran, à gɛ̃̀ kãáo a gupura bonsarɛde gũn sáabu kpá.
10Á de Luda gbɛ̃nɔ ũ yãro,
ama tera sà a gɔ̃ ń ũ.
Luda dí sùru kɛ kãáo yãro,
ama tera à kɛ̀ kãáo.
Kunna ludanaanikɛrisarinɔ tɛ́
11Ma gbɛ̃ yenyĩdenɔ, lákũ á de nibɔ kũ bòasunɔ ũ nà andunia dí gũn, matɛn lɛ́ daáwa, à mì kɛ̃ á dà vãni kũ òdi zĩ̀ ká kãáonɔa. 12Àgɔ̃ kun gbɛ̃ bɛ̀ɛrɛdenɔ ũ kifirinɔ tɛ́. Lɛmɛ dɔ bee tó ò á dítɛ yãvãnikɛrinɔ ũ, tó ò yã mana kũ átɛn kɛnɔ è, oni Luda sáabu kpá gɔrɔ kũ ani suńyĩ.
13À mì natɛ ikode kũ bisãsiri dìtɛnɔnɛ ń pínki Dikiri yãi, kína kũ à gbãna vĩ deńlan yá, 14ke gbãnade kũ à dìtɛ à wɛ́ tã yãvãnikɛrinɔa à yãmanakɛrinɔ sáabu kpá. 15Luda pɔyenyĩnaan dí: Á yãmanakɛnaa gũn, áni yɔ̃nkɔ wɛ́siradenɔ lɛ́ yĩtɛńnɛ. 16Àgɔ̃ zĩdadenɔ ũ, ama àsun tó á gɔ̃na zĩdadenɔ ũ gɔ̃árɛ vãnikɛna zɛ́ ũro. Àgɔ̃ kun Luda zɔ̀blerinɔ ũ. 17À bɛ̀ɛrɛ li gbɛ̃ sĩnda pínkinɛ. Àgɔ̃ ye á Yesude dakenɔi. À vĩna kɛ Ludanɛ. À bɛ̀ɛrɛ lí kínanɛ.
18Zĩkɛrinɔ, à mì natɛ á dikirinɔnɛ, à zɔ̃kɔ̃kɛ dɔ̃ńnɛ yã sĩnda pínki gũn. Adi kɛ dikiri mana nɛ̀sɛdodenɔnɛ ńtɛ̃nɛnlo, ama kũ ń gbɛ̃ pãsĩnɔomɛ se. 19Tó ò wɛ́ tã̀áwa pã, tó a mɛna fɔ̃̀o Luda yãi, abirekũ sáabu vĩárɛ. 20Tó ò á gbɛ̃ á taari yãi, tó a mɛna fɔ̃̀o, abirekũ tɔ́ nna vĩ máa? Ama tó a wari kɛ̀ yã mana kũ a kɛ̀ yãi, tó a mɛna fɔ̃̀o, Luda ni á sáabu kpá. 21Abire yãin Luda á sisi à á sɛ́. Kirisi wari kɛ̀árɛ, à zɛ́ mɔ̀árɛ de àgɔ̃ tɛ́ a gɛ̀sɛgbɛɛi yãi.
22Adi durunna kɛro,
odi ma à ɛ́kɛ tòro.
23Kũ ò a sɔ̃̀sɔ̃, adi yã síńlaro. Kũ à wari kɛ̀, adi yã pãsĩ ke ońnɛro, à zɛ̀ kũ Luda yãkpatɛkɛri manaomɛ. 24Àkũ mɛ́ à ó durunnanɔ dì a mìia, à gào lía, de ó bàka súngɔ̃ kú kũ durunnanɔ doro, ògɔ̃ kú yãmanakɛnaa gũn. A flã̀gbɛnɔ mɛ́ ò ó gbá aafia. 25Zaakũ a sãtɛ lán sãnɔ bà yã, akũ a arɛ dɔ̀ á Dã̀ri kũ á Dãkpãriiooa tera sà.
Currently Selected:
1 PITA 2: BB2005
Highlight
Copy
Compare
Share
Want to have your highlights saved across all your devices? Sign up or sign in
Bisã Bible © SIM International, 2005.
