11 ALITƐSALONA̍YĪKA 2
2
Ɔngūwɛ̄gā ɔdwɔ̄bi̍ lɛlā
1U̍ma̍ama, lɛlā yī ɔwɔ̄wā yī Ādādā yī alɔ, Iji̍sɔ̄ɔsi Ikra̍yisi ba̍la otu̍ grēeyī ngmo̍tu̍chɛ̄ ba̍la anu̍ ɔlɔjā nīi alɔ ge̍ē ka bɛ̍ɛ̄nɛ̄ a̍nɛ: Ala̍ chu̍chu̍u aɛ̍nɛ̍ yī u! 2Ala̍ e̍e hli̍kpa̍ de ya̍ chu̍chuchu̍ la ɛri̍ya̍ ogbōgbo kɛ̄ɛ de hi̍yɛ̄ngura bū la opo̍ la oko̍o yī āchɛ ɛha̍ hīka Ɔ̄chī Ɔwɔ̄wā yī Ādā ɔ̍lɔ gbajɛ mɛ̍ ni̍. Ɔ̄chɛ ɔha̍ nīi ka̍a yɛ ē mwɔ̍ɔmu ma̍ kɛ̄ɛ ɔ̄chɛ nīi yɛ ē kɛlā yī Ɔwɔ ma̍ ka̍a ka i̍ngɔ̍ɔ a̍nɛ oo! Kɛ̄ɛ e̍ ka̍a ka hīka aɛ̍lɛ ta̍ tū la īpū i̍ngɔ̍ɔ tɛ̄rɔ̄ a̍nɛ oo! 3Ala̍ e̍e chɛ̄ nīi ɔ̄chɔ̄chɛ ge̍ gwi̍bobo tū ala̍ la ɔpɔ̄pū ɔha̍lɔha̍ ni̍ lachi̍lachi̍. Wu̍chē oji̍ nɛ, Ɔ̄chī ɔla̍ā i̍ ge̍ē wā ni̍ kpɛɛ gbo̍ yɛ̄grāa nīi āchɛ ɛha̍ ge̍ē hi̍hi̍yo̍ yī Ɔwɔ ka ɔ̍lɔ i̍ ɔchwɔ̄lɛ̍ yī aa̍ gɛ ni̍ ma̍. Anu̍ Ɔdwɔ̄bi̍ Lɛlā ɔla̍ā nīi Ɔwɔ ge̍ē nū ɔ̄ ta̍tū la ayekū oli̍gba̍o̍ ma̍ ge̍ē wā i̍ngi̍ngɔ̍ɔ o̍bū. 4Wu̍chē oji̍ nɛ, anu̍ Ɔdwɔ̄bi̍ Lɛlā ɔla̍ā ge̍ē hi̍hi̍yo̍ yī lɛlāha̍ ɛlāha̍ wa̍a̍ nīi āchɛ ē nāa bāa lɛlā yī Ɔwɔ ma̍. O̍ ge̍ē nāa iyī anu̍ ɔlɔjā ke̍ke̍ni̍ ē hi̍ ɔjā ɛla̍ā wa̍a̍. O̍ ge̍ē nōnuni̍ ē chɛ̄ ge̍ē hyāhɔ̄ la u̍nu̍ yī Ɔwɔ ē nāa iyī nū ka anɔ̍lɔ - Ɔwɔ nɛ.
5Ala̍ i̍ bla gɛ ni̍? Je̍ka n koko̍o de ala̍ i̍ngɔ̍ɔ yɛ̄grāa nīi n hɔ̄ abɔ̍ɔ ba̍la ala̍ ma̍? 6Ɔjā ɔha̍ chī hɔ̄ abɔ̍ɔ nīi hu nīi lɛlā nūma̍ wa̍a̍ ya̍ we̍ ni̍ ma̍. Je̍ka aa̍ ala̍ je̍ ɔjā nīi hu̍ ma̍? Yɛ̄grāa ɔ̍lɔma̍ ge̍ de gbajɛ kpakpa o̍bū mɛ̍, Ɔdwɔ̄bi̍ Lɛlā ɔla̍ā ge̍ē bīyɛchɛ bɛ̍ɛ̄nɛ̄. 7Wɔbi̍ Lɛlā Ɔdwɔ̄bi̍ Ɔdwɔnyɛ ɔ̍lɔma̍ nīi ɔ̄chɛ i̍ jo̍ōkū ni̍ ma̍ yɛ ē ya̍ u̍ku̍rɔ̍ u̍ma̍ama mɛ̍. Ɔjā nīi ge̍ē ya̍ ma̍ i̍ chī ge̍ē ya̍ ni̍ kpɛɛ nīi e̍ ē de ɔ̄chɛ nīi ku̍ ɔ̄ bī ma̍ ē gwō gbo̍o̍ ē hī ɔpɔ̄pū o̍bū. 8Bɛ̍ɛ̄nɛ̄ ma̍, Ɔdwɔ̄bi̍ Lɛlā ɔla̍ā ge̍ē bīyɛchɛ. Ādā Iji̍sɔ̄ɔsi ge̍ē wā bɛ̍ɛ̄nɛ̄ ge̍ē de ɔ̍ ē ngmo̍ la owu ɔhɔ̍ɔ̄hɛ̍ nīi ge̍ē bū la oko̍o yī nū ma̍. Iji̍sɔ̄ɔsi ge̍ē de ɔ̍ ē chāajɛ la rīgā yī ɔwɔ̄wā yī nū yɛ̄grāa ɔla̍ā nīi o̍ ge̍ē wā ma̍. 9Ɔdwɔ̄bi̍ Lɛlā ɔla̍ā ge̍ē bī wɔhu̍ yī Isa̍tan ē wā ge̍ē yɛ̍ɛ̄lā ɔlɛbɛ̍bi̍ ba̍la obūdeyī ba̍la i̍mamachi̍ ita ɔha̍lɔha̍ wa̍a̍. 10O̍ ge̍ē bī yɛ̍gra̍ ɔdwɔ̄bi̍ ɔha̍lɔha̍ wa̍a̍ ē gla̍ āchɛ nīi gbɔma ge̍ē chāajɛ ma̍. E̍ ge̍ē chāajɛ wu̍chē oji̍ nɛ, e̍ i̍ nāa lɛlā olēchi̍ lēchi̍ ba̍ ɔgɛgɛ, ywɔ̍ɔnyɛ yī nū hɛ̄ɛbɛ lɛ ɔhɛ̍ta̍ ke̍e̍ ni̍. 11Wu̍chē yī ɔla̍ā, Ɔwɔ de wɔhu̍ yī lɛlā ɔdwɔ̄bi̍ tɛ̄rɔ̄ ge̍ ya̍ u̍ku̍rɔ̍ la ibi̍īyē yī wā. Ɔla̍ā ya̍ nīi e̍ de ɔtū che lɛlā arīmɛ̄ arīmɛ̄ bɛ̍ɛ̄nɛ̄. 12Ɔjā nīi hɔ̄ abɔ̍ɔ la anu̍ ma̍, ɔ̄chɛ nīi i̍ ge̍ de ɔtū che lɛlā olēchi̍ lēchi̍ ni̍, chōo̍chē jwɔ̍ɔnyɛ yī lɛlā ɔdwɔ̄bi̍ ɔyɔ̍ɔ̄ya̍, Ɔwɔ ge̍ē hɛ̍ ɔ̄chɛ ɔlɔjā lɛpɔ̄ ɔdwɔ̄bi̍.
Ɔwɔ hu ala̍ ohōhu nīi ala̍ ge̍ē lɛ ɔhɛ̍ta̍
13Aɛ̍nɛ̍ yī u! Alɔ ge̍ē da Ɔwɔ o̍be myɛ̄grāa-myɛ̄grāa ē de ala̍, ala̍ nīi Ādā yɔ̍ɔhɔtū yī ala̍ ma̍. Wu̍chē oji̍ nɛ, Ɔwɔ hu ala̍ bāa āchɛ nīi o̍ ge̍ē hɛ̍ta̍ rāarāa ma̍. Ɔla̍ā bū la wɔhu̍ yī Uhu Ɔnɛ̄ɛhɛhi yī Ɔwɔ nīi ya̍ nīi ala̍ de pīya āchɛ ɛnɛ̄ɛhɛhi yī Ɔwɔ ma̍. O̍ gba̍a bū la ɔtū nīi ala̍ de che lɛlā olēchi̍ lēchi̍ ma̍. 14Ɔwɔ hī ala̍ ɛra̍ ohōhī wā lɛlā nūma̍ bū la Wɔ̄kā Ɔlwɔnyɛ nūma̍ nīi alɔ ka de ala̍ ma̍. O̍ hī ala̍ ɛra̍ hɛ̄ɛbɛ nīi ala̍ ge̍ē wā ge̍ē nāa rīgā lipu̍ yī rīgā nīi - iyī Ādādā yī alɔ Iji̍sɔ̄ɔsi Ikra̍yisi ma̍. 15Aɛ̍nɛ̍ yī u! O̍ lɛ i̍ngɔ̍ɔ ma̍, ala̍ ā yarɛ brii ta̍ābɔ̄ ku̍ lɛlā olēchi̍ lēchi̍ ɔla̍ā wa̍a̍ nīi alɔ ngū ala̍ la lɛlā yī Ɔwɔ ɔkɔ̄ka de ala̍ ba̍la īpū ɔta̍ tɛ̄rɔ̄ hu ala̍ ma̍ gɛ.
16Ɔwɔ A̍dā yī alɔ yɔ̍ɔhɔtū yī alɔ. Bū la lɛhi ɔyɔ̍ɔ̄ya̍ yī nū, o̍ de ūkpɔ̄tū yī yɛngrɔ̄ɔ i̍mɔ̄mɛni̍, ba̍la eyī ode chōche nīi ɔnɛ̄ɛhɛhi ma̍ de alɔ! Anu̍ ba̍la Ādādā yī alɔ, Iji̍sɔ̄ɔsi Ikra̍yisi ɔlɔjā 17ge̍ de yɛngrɔ̄ɔ mu ala̍ ūkpɔ̄tū, ya̍ nīi ala̍ ge̍ lwɔhu̍ brii yɛ̍ɛ̄lā, gba̍a kɛlā nīi - ɔnɛ̄ɛhɛhi ke̍e̍ ma̍!
Currently Selected:
11 ALITƐSALONA̍YĪKA 2: YBASR
Highlight
Share
Copy
Want to have your highlights saved across all your devices? Sign up or sign in
© 2020 Bible Society of Nigeria (second edition)
