11 ALITƐSALONA̍YĪKA 3
3
Ala̍ ā jɔhā de alɔ
1La ɔchlɛhu̍ yī lɛlā wa̍a̍, aɛ̍nɛ̍ yī u, ala̍ ā jɔhā de alɔ. Ala̍ ā ya̍ i̍ngɔ̍ɔ hɛ̄ɛbɛ nīi ɛrɔ̄ yī Ādā ge̍ ngrāa pa̍pa̍pa̍ ga iyɔ̄bū iyɔ̄bū nīi o̍ ge̍ lɛ ɔkɔ̄kā i̍ngi̍ngɔ̍ɔ lɔkɔ nīi o̍ lɛ la owu̍tu la olo̍ōlo̍ yī ala̍ ma̍. 2Ala̍ ā gba̍a jɔhā i̍ngi̍ngɔ̍ɔ hɛ̄ɛbɛ nīi Ɔwɔ ge̍ de alɔ wu̍ ngmɛ̍ɛchɛ hī alwɔbi̍ lɛlā ba̍la āchɛ ɔdwɔ̄bi̍ wa̍a̍. Wu̍chē oji̍ nɛ, i̍ āchɛ wa̍a̍ chɛ̄ku ɛrɔ̄ yī Ɔwɔ a̍ni̍.
3Ādā ɔlɔjā ma̍, ɔ̄chɛ nīi e̍ ē de ɔtū che ɔ̍ nɛ. O̍ ge̍ē ya̍ nīi ala̍ ē hwɔhi hwɔhi ē hī anu̍ Ɔdwɔ̄bi̍ ɔla̍ā. 4Ādā ɔlɔjā ya̍ nīi alɔ de ɔtū che ala̍ hwɔhi hwɔhi hīka ala̍ yɛ abɔ̍ɔ ē ya̍ ɔjā nīi alɔ ka de ala̍ ma̍. Ala̍ chī ge̍ē ya̍ i̍ngɔ̍ɔ ē gāa iyɔ̄bū iyɔ̄bū nīi alɔ jo̍ōkū.
5Ādā ge̍ bī ūkpɔ̄tū yī ala̍ ɔtū lɛbɛ nīi ala̍ ge̍ ywɔ̍ɔnyɛ yī Ɔwɔ. O̍ ge̍ bī ala̍ ga ɔmlɔtū hɔ̄ kpɔ̍ɔ̍ nīi Ikra̍yisi ē de ma̍.
Ɔjā nīi ala̍ ge̍ē ya̍ pi̍i̍ ma̍
6Aɛ̍nɛ̍ yī u, bū la riyī yī Ādā Iji̍sɔ̄ɔsi Ikra̍yisi nīi alɔ yɛ ma̍ ge̍ē ka ē de ala̍ a̍nɛ: Ala̍ ā gwō gbo̍o̍ hī aɛ̍nɛ̍ yī alɔ ɛha̍ ɛla̍ā nīi gblāa la ɔhɔ̄leyī yī ɔdwɔbɔ̄ ma̍. Aa̍ ɛla̍ā nīi i̍ ē gala ɔgɔgu yī lɛlā nīi alɔ ngū wā ni̍ ma̍ nɛ. 7Je̍ka aa̍ ala̍ ɛlɛjā jo̍ōkū hwɔhi hwɔhi hīka o̍ ngma̍ nīi ala̍ ē ya̍ ɔhɔ̄leyī lɔkɔ nīi alɔ ē ya̍ ma̍! Alɔ i̍ dwɔbɔ̄ yɛ̄grāa nīi alɔ hɔ̄ abɔ̍ɔ ba̍la ala̍ ma̍ ni̍. 8Alɔ i̍ nāa wɔbɔ̄ otōtū ɔha̍lɔha̍ la abɔ̄ yī ala̍ ji ni̍, ɔ̍chi̍kpa̍kpa̍ onīi alɔ kla̍ ure̍ o̍bū ma̍. Ɔkɔkɔ ɔla̍ā, alɔ ē ya̍ u̍ku̍rɔ̍ i̍ngɔ̍ɔ gba̍a̍ ē nyiya gba̍a̍. Alɔ ē ya̍ u̍ku̍rɔ̍ la yɛnɔ la otu̍ hɛ̄ɛbɛ nīi alɔ i̍ ge̍ē hɔ̄ ji nīi ɔ̄chɔ̄chɛ ē bī alɔ ni̍. 9I̍ owu̍chē hīka o̍ ngma̍ nīi alɔ ē nāa wɔbɔ̄ otōtū la abɔ̄ yī ala̍ ni̍ - ohu̍ nīi alɔ ē ya̍ i̍ngɔ̍ɔ a̍ni̍. Alɔ ya̍ i̍ngɔ̍ɔ hɛ̄ɛbɛ nīi ala̍ ge̍ē ma̍ bī gbla alɔ. 10Olo̍ nīi alɔ hɔ̄ abɔ̍ɔ ba̍la ala̍ ma̍, alɔ ē ka ē de ala̍ hīka, “Ɔ̄chɛ nīi i̍ ē chikpo̍ ge̍ē ya̍ u̍ku̍rɔ̍ ni̍ ma̍, ɔlɔjā i̍ ngma̍ la ore̍ ojōre̍ ni̍.”
11Alɔ ka i̍ngɔ̍ɔ wu̍chē oji̍ nɛ, alɔ po̍ hīka āchɛ ɛha̍ ɛ̍lɛ hɔ̄ abɔ̍ɔ lipu̍ yī ala̍ nīi - ɛ̍lɛ dwɔbɔ̄ kpɛ̍ɛji. Ɛlɛjā ɛ̍lɛ i̍ ē ya̍ ɔjɔ̄jā wɔ̄bɔ̄bɔ̄ yī ɛ̍lɛ ni̍, chōo̍chē chikpo̍ yī ode u̍ku̍rɔ̍ yī āchɛ ti̍yatū. 12Alɔ ge̍ē koko̍o ē de āchɛ nūma̍ bū la riyī yī Ādā Iji̍sɔ̄ɔsi Ikra̍yisi gba̍a ē ta̍ wā ɔna: E̍ ge̍ ya̍ ɔhɔ̄leyī nīi lɛ kpakpa ma̍. E̍ ge̍ ya̍ u̍ku̍rɔ̍ lɛ ɔjā bī bī iyī wā.
13Aɛ̍nɛ̍ yī u! Lɛlā ɔnɛ̄ɛhɛhi ɔyɔ̍ɔ̄ya̍ ge̍ e̍e de jɛ̄ ala̍ ni̍. 14Ɔha̍ni̍ ɔ̄chɛ ɔha̍ ē hɔ̄ abɔ̍ɔ nīi i̍ chikpo̍ ge̍ ya̍ lɔkɔ nīi alɔ ka tū la īpū tɛ̄rɔ̄ hu ala̍ ma̍ ni̍ oo! O̍ ge̍ lɛ i̍ngɔ̍ɔ, ɔ̍lɔma̍ ala̍ ā du̍mɔ̍-du̍mɔ̍ ba̍la ɔ̄chɛ oli̍ngɔ̍ɔ ɔla̍ā. Ala̍ e̍e tābɔ̄ yī lɛlā ɔyɔ̍ɔ̄ya̍ ba̍la anu̍ ni̍, hɛ̄ɛbɛ nīi liwēyī ge̍ ya̍ ɔ̄. 15Ala̍ e̍e chī yɛ̍ɛ̄lā tāa anu̍ bāa oluji ma̍ ni̍. Ala̍ ā ta̍ ɔ̄ ɔna yī lɛlā ji bāa ɔɔ̍nɛ̍ yī ala̍ ma̍.
Ɔchlɛhu̍ yī lɛlā
16Ādā ɔlɔjā nīi ɔhɔ̄leyī yī alɔ bū la abɔ̄ yī nū ma̍ ge̍ de ogbodɔ̍dɔ̍ la olo̍ ɔha̍lɔha̍ ba̍la ɔpɔ̄pū ɔha̍lɔha̍ wa̍a̍ de ala̍. Ādā ge̍ hɔ̄ ba̍la ala̍ wa̍a̍!
17Ɛbɛ nūma̍ ma̍, n ge̍ē ta̍ īpū la abɔ̄ yī u: AMI IPƆ̍ƆLI NƐ, N DA ALA̍ O̍BE WA̍A̍. I̍ngɛ̍ɛ̄nɛ̄ nīi n ē ta̍ riyī yī u la īpū yī u ɔha̍lɔha̍ wa̍a̍ a̍nɛ. I̍ngɔ̍ɔ nīi n ē ta̍ ɔjā a̍nɛ.
18Ɔpiyɛ yī Ādā Iji̍sɔ̄ɔsi Ikra̍yisi ge̍ hɔ̄ ba̍la ala̍ wa̍a̍.
Currently Selected:
11 ALITƐSALONA̍YĪKA 3: YBASR
Highlight
Share
Copy
Want to have your highlights saved across all your devices? Sign up or sign in
© 2020 Bible Society of Nigeria (second edition)
