Aliro̍om 6

Alɔ hɔ̄leyī bū la otū ngmo̍tu̍chɛ̄ ba̍la Ikra̍yisi

1Alɔ ge̍ē ka kana̍ bɛ̍ɛ̄nɛ̄ ma̍? O̍ re̍ka alɔ ge̍ē hɔ̄ la lɛlā ɔdwɔ̄bi̍ gāa iyɔ̄bū hɛ̄ɛbɛ nīi uhwa ɔnɛ̄ɛhɛhi nīi Ɔwɔ ē de ma̍ ge̍ē mwɛbɛ gba̍a̍ ē gāa iyɔ̄bū iyɔ̄bū kɛ̄ɛ? 2Īchāha̍ īchāha̍! Je̍ka aa̍ alɔ ko̍ōku̍ tunutunu de lɛlā ɔdwɔ̄bi̍ mɛ̍? Kana̍ nīi alɔ ge̍ē gba̍a ē hɔ̄ la lɛlā ɔdwɔ̄bi̍ ē mɛ we̍ ma̍ gɛ? 3Je̍ka aa̍ ala̍ jo̍ōkū yī lɛlā nūma̍? E̍ hu alɔ yenyi nīi alɔ tū ngmo̍tu̍chɛ̄ ba̍la Iji̍sɔ̄ɔsi Ikra̍yisi ma̍, e̍ hu alɔ yenyi ɔla̍ā i̍ngi̍ngɔ̍ɔ la ɔpīyaku̍ ba̍la anu̍. 4Bū la yenyi ohōhu nīi e̍ hu alɔ ma̍, o̍ re̍ka e̍ de alɔ nyi ba̍la anu̍ mɛ̍. Ɔla̍ā re̍ka alɔ titi pīyaku̍ bāa anu̍ ma̍. Ɔla̍ā lɛ i̍ngɔ̍ɔ wa̍a̍ hɛ̄ɛbɛ nīi alɔ ge̍ē hɔ̄ la ɔhɔ̄leyī onīpīpɛ̄ gala ɔgɔgu lɔkɔ nīi Ɔwɔ A̍dā yī alɔ de Ikra̍yisi hye̍ēyī la okū ke̍e̍ bū la wɔhu̍ ɔlɛbɛ̍bi̍ yī nū ma̍.

5Wu̍chē oji̍ nɛ, o̍ ge̍ re̍ka alɔ tū ngmo̍tu̍chɛ̄ ba̍la Ikra̍yisi, pīyaku̍ bɔ̄ɔkɔ nīi anu̍ ku̍ ma̍, i̍ngi̍ngɔ̍ɔ nīi alɔ ge̍ē tū ngmo̍tu̍chɛ̄ ba̍la anu̍; hye̍ēyī la okū bɔ̄ɔkɔ nīi anu̍ hye̍ēyī ma̍ a̍nɛ. 6Alɔ wa̍a̍ jo̍ōkū hīka ɔ̄chɛ nīi alɔ nūma̍ wɛ o̍bū ma̍, e̍ de ɔ̍ ngmo̍ yɛ̄gɛ̄grāa nīi e̍ de Ikra̍yisi gwōba̍ la ɔchi̍ ɔhrɛ̍ɛpa ma̍ mɛ̍. O̍ lɛ i̍ngɔ̍ɔ hɛ̄ɛbɛ nīi Ɔwɔ ge̍ē de ɔ̄chɛ ɔdwɔ̄bi̍ ɔla̍ā nīi alɔ wɛ o̍bū ma̍ ē chāajɛ. Bū la ɛbɛ ɔla̍ā, alɔ i̍ ge̍ē hɔ̄ bāa afiyɛ yī lɛlā ɔdwɔ̄bi̍ ma̍ ē gɛ ni̍. 7Wu̍chē oji̍ nɛ, ɔ̄chɛ ge̍ ko̍ōku̍ mɛ̍, ɔlɔjā i̍ tū la abwɔ̄hu̍ yī lɛlā ɔdwɔ̄bi̍ gɛ ni̍ lachi̍lachi̍. 8Alɔ ge̍ pīyaku̍ i̍ngɔ̍ɔ ba̍la Ikra̍yisi, alɔ de ɔtū che hīka alɔ ge̍ē lɛ ɔhɔ̄leyī i̍ngi̍ngɔ̍ɔ bāa anu̍ ma̍. 9Wu̍chē oji̍ nɛ, alɔ jo̍ōkū hīka Ɔwɔ de Ikra̍yisi hye̍ēyī la okū mɛ̍. O̍ i̍ chī ge̍ē pīyaku̍ ge̍ē gbo̍ mɛ ē gɛ ni̍. Ɔpīyaku̍ i̍ lwɔhu̍ ɔha̍lɔha̍ wā la lɛhu̍ yī nū gɛ ni̍. 10Ɔpīyaku̍ nīi o̍ ku̍ ma̍, o̍ de ko̍ōku̍ tunutunu de lɛlā ɔdwɔ̄bi̍ i̍ngɔ̍ɔ kpɛɛ ku yɛ̄grāa ɔha̍lɔha̍ bɛ̍ɛ̄nɛ̄. Ɔhɔ̄leyī nīi o̍ hɔ̄ u̍ma̍ama ma̍, Ɔwɔ nīi o̍ hɔ̄ de ɔ̍ bɛ̍ɛ̄nɛ̄ a̍nɛ. 11Gala ɔgɔgu ɔla̍ā, ala̍ titi ge̍ē gbɛri̍ya̍ ē tū iyī ala̍ hīka ala̍ ko̍ōku̍ tunutunu de lɛlā ɔdwɔ̄bi̍ mɛ̍. Ala̍ hɔ̄leyī de Ɔwɔ bū la otū ngmo̍tu̍chɛ̄ ba̍la Ikra̍yisi Iji̍sɔ̄ɔsi bɛ̍ɛ̄nɛ̄.

12O̍ lɛ i̍ngɔ̍ɔ ma̍, lɛlā ɔdwɔ̄bi̍ ge̍ e̍e bī wɔhu̍ yī ibi̍īyē yī ala̍ ɛla̍ā nīi ē ko̍ōku̍ mɛ ma̍ gɛ ni̍, lɛbɛ nīi ala̍ ge̍ e̍e hɔ̄ po̍ ɔkɔlɛ̄lā a̍hla̍ nīi ala̍ ɛlɛjā hla̍ ma̍ gɛ ni̍. 13Ala̍ e̍e tu̍ hī ɛbɛbɛ yī ala̍ lā de lɛlā ɔdwɔ̄bi̍ obī yɔ̍ɔ̄ya̍ ni̍. Ɔkɔkɔ ɔla̍ā, ala̍ ā tu̍ hī iyī ala̍ wa̍a̍ de Ɔwɔ. Ala̍ ā ya̍ i̍ngɔ̍ɔ bāa āchɛ nīi Ɔwɔ de wa̍ hye̍ēyī bū la ɔpīyaku̍ wā la ɔhɔ̄leyī ma̍. Ala̍ ā tu̍labɔ̄ hī iyī ala̍ wa̍a̍ ligbo̍ ligbo̍ lā de Ɔwɔ nīi o̍ ge̍ bī ala̍ yɛ̍ɛ̄lā ɔlɛkpakpa yī nū. 14Ala̍ e̍e chɛ̄ nīi lɛlā ɔdwɔ̄bi̍ ge̍ bī wɔhu̍ yī ala̍ gɛ ni̍. Wu̍chē oji̍ nɛ, ala̍ i̍ hɔ̄ la ɔya̍ lɔkɔ nīi lihɔ ka ɔ̄chɛ ɔ̍lɔ ge̍ ya̍ ma̍ gɛ ni̍. Uhwa ɔnɛ̄ɛhɛhi nīi Ɔwɔ ē de ma̍ nīi ala̍ hɔ̄ la anu̍ a̍nɛ.

Ala̍ - afiyɛ yī lɛlā ɔlɛkpakpa ɔyɔ̍ɔ̄ya̍ nɛ

15Ɔkana̍ bɛ̍ɛ̄nɛ̄ nɛ? O̍ re̍ka alɔ i̍ hɔ̄ gɔgu lihɔ gɛ ni̍ nīi alɔ hɔ̄ la uhwa ɔnɛ̄ɛhɛhi nīi Ɔwɔ ē de ma̍, alɔ ge̍ē yɛ̍ɛ̄lā ɔdwɔ̄bi̍ kpɔ̍ɔ̍ wu̍chē yī ɔla̍ā? Īchāha̍ īchāha̍! 16Je̍ka aa̍ ala̍ jo̍ōkū hīka ala̍ ge̍ tu̍labɔ̄ hī iyī ala̍ bāa afiyɛ yī ɔ̄chɛ ɔha̍ yɛ ē pɔ̍ɔkɔ yī nū mɛ̍, o̍ re̍ka ala̍ - afiyɛ yī abābā ɔla̍ā nīi ala̍ ē pɔ̍ɔkɔ yī nū ma̍ ichɛ̄ɛhi nɛ. O̍ ge̍ - lɛlā ɔdwɔ̄bi̍ nīi ala̍ ē pɔ̍ɔkɔ yī nū a̍nɛ, ɛpiyabuna yī nū - ɔpīyaku̍ nɛ. O̍ ge̍ chī - ɔya̍ lɔkɔ nīi Ɔwɔ ka ma̍ nīi ala̍ yɛ ē pɔ̍ɔkɔ yī nū a̍nɛ, ɛpiyabuna yī nū - ode lɛ kpakpa ba̍la Ɔwɔ nɛ. 17O̍gbo̍ ge̍ iyī Ɔwɔ! Wu̍chē oji̍ nɛ, ala̍ - afiyɛ yī lɛlā ɔdwɔ̄bi̍ īchāha̍ o̍bū nɛ; ala̍ chī chōo̍chē wā ge̍ yɛ ē po̍ ɔkɔlɛ̄lā olēchi̍ lēchi̍ nīi bū la lɛlā ongōngū nīi ala̍ nāa po̍ ma̍ bɛ̍ɛ̄nɛ̄. 18Bū la ɛbɛ ɔla̍ā, Ɔwɔ de ala̍ hīya lɛfiyɛ hī wɔhu̍ yī lɛlā ɔdwɔ̄bi̍. Ala̍ de pīya afiyɛ yī lɛlā ɔlɛkpakpa ɔyɔ̍ɔ̄ya̍ bɛ̍ɛ̄nɛ̄. 19N yɛ ē bī igbla yī lɛlā ɔlamu yī alɔ āchɛ̄ɛchɛ ē kɛlā oli̍ngɛ̍ɛ̄nɛ̄ wu̍chē yī ɔlɛkwīkwī yī ala̍ ɛlɛjā bāa āchɛ̄ɛchɛ ma̍. Īchāha̍ ɔla̍ā, ala̍ tu̍labɔ̄ hī iyī ala̍ wa̍a̍ lā bāa afiyɛ yī lɛlā ya̍chi ɔyɔ̍ɔ̄ya̍ ba̍la wɔbi̍ lɛlā ɔdɔ̄dɛ̄ ɔha̍lɔha̍ wa̍a̍ nīi ala̍ yɛ ē chikpo̍ ma̍. Gala ɔgɔgu ɔla̍ā, ala̍ ā tu̍labɔ̄ hī iyī ala̍ wa̍a̍ lā u̍ma̍ama bāa afiyɛ yī lɛlā ɔlɛkpakpa ɔyɔ̍ɔ̄ya̍ ma̍ la obī yɛ̍ɛ̄lā ɔnɛ̄ɛhɛhi gɛ.

20Olo̍ nīi ala̍ e̍e wɛ afiyɛ yī lɛlā ɔdwɔ̄bi̍ ma̍, lɛlā ɔlɛkpakpa ɔyɔ̍ɔ̄ya̍ i̍ lwɔhu̍ ɔha̍lɔha̍ wā la ibi̍īyē yī ala̍ ni̍. 21Ma̍, oji̍ nīi ala̍ chī lɛ bū la lɛlā ɛla̍ā nīi ala̍ yɛ ē ya̍ o̍bū nīi chī chōo̍chē de ya̍ ala̍ liwēyī iwēyī u̍ma̍ama hɔ̄ ma̍ ma̍? Ɛpiyabuna yī lɛlā ɛla̍ā wa̍a̍ - ɔpīyaku̍ nɛ. 22U̍ma̍ama ma̍, Ɔwɔ chī de ala̍ hīya lɛfiyɛ hī lɛlā ɔdwɔ̄bi̍ mɛ̍; ala̍ de pīya afiyɛ yī Ɔwɔ bɛ̍ɛ̄nɛ̄. Ɔjā nīi ala̍ ge̍ē lɛ ē bū la onūma̍ ma̍ - ode ɔhɔ̄leyī yī ala̍ kwɔbɔ̄ de Ɔwɔ la ɔgɔ̄grāa, nīi ɛpiyabuna yī nū re̍ka ɔhɔ̄leyī i̍mɔ̄mɛni̍ ma̍ nɛ. 23Wu̍chē oji̍ nɛ, ɔpīyaku̍ re̍ka ɛpiyabuna nīi ɔ̄chɛ ē nāa la lɛlā ɔdwɔ̄bi̍ a̍nɛ. Ɔjā nīi Ɔwɔ chī ē kɔ̄kɔ̄ de ɔ̄chɛ ke̍e̍ ji ma̍ - ɔhɔ̄leyī i̍mɔ̄mɛni̍ bū la otū ngmo̍tu̍chɛ̄ ba̍la Ikra̍yisi Iji̍sɔ̄ɔsi nīi - Ādādā yī alɔ ma̍ nɛ.

Currently Selected:

Aliro̍om 6: YBASR

Highlight

Copy