Aliro̍om 5

Ode lɛ kpakpa ba̍la Ɔwɔ

1Wu̍chē lɔkɔ nīi Ɔwɔ ya̍ nīi alɔ de lɛ kpakpa ba̍la anu̍ ɔlɔjā bū la ɔtū ode che ɔ̍ ochōche ma̍, alɔ hɔ̄ la ogbodɔ̍dɔ̍ ba̍la Ɔwɔ gala abɔ̄ yī Iji̍sɔ̄ɔsi Ikra̍yisi nīi - Ādādā yī alɔ ma̍ bɛ̍ɛ̄nɛ̄. 2Bū la ɔtū nīi alɔ de che ɔ̍ ma̍, Ikra̍yisi bī alɔ wā ge̍ ma̍ uhwa ɔnɛ̄ɛhɛhi nūma̍ nīi Ɔwɔ de ma̍ mɛ̍; anu̍ nīi alɔ tū ma̍ la anu̍ u̍ma̍ama a̍nɛ. Alɔ yɛ ē wɔ̄wīyā bɛ̍ɛ̄nɛ̄, wu̍chē lɔkɔ nīi alɔ deyīche ge̍ē nāa rīgā yī Ɔwɔ ba̍la anu̍ ma̍. 3Alɔ ē wɔ̄wīyā i̍ngi̍ngɔ̍ɔ wu̍chē akanya wa̍a̍ nīi ē hɔ̄ de alɔ ma̍. Wu̍chē oji̍ nɛ, alɔ jo̍ōkū hīka, akanya ē ta̍tu̍tu̍ nīi ɔ̄chɛ ē mlɔtū hɔ̄ kpɔ̍ɔ̍ a̍nɛ. 4Ɔmlɔtū hɔ̄ kpɔ̍ɔ̍ ɔla̍ā chī ya̍ nīi Ɔwɔ ē ka ɔnɛ̄ɛhɛhi yī ɔ̄chɛ. Ɔka ɔnɛ̄ɛhɛhi yī ɔ̄chɛ i̍ngɔ̍ɔ chī ya̍ nīi ɔ̄chɛ ē deyīche Ɔwɔ a̍nɛ. 5Eyī ode chōche nūma̍ i̍ ē mwajɛ ē mɛ ni̍. Wu̍chē oji̍ nɛ, Ɔwɔ de ɔhɔtū yī nū mwɛbɛ mwɛbɛ tū alɔ la ūkpɔ̄tū bū la Uhu Ɔnɛ̄ɛhɛhi yī nū nīi - ɔjā nīi o̍ kɔ̄kɔ̄ de alɔ ke̍e̍ ji ma̍.

6Wu̍chē oji̍ nɛ, yɛ̄grāa nīi wɔbɔ̄ otōtū ɔha̍lɔha̍ i̍ hɔ̄ de alɔ ni̍ cha̍ka̍ra̍ ma̍, Ikra̍yisi wā ge̍ pīyaku̍ de alɔ wu̍chē yī wɔbi̍ lɛlā yī alɔ. Ikra̍yisi ya̍ i̍ngɔ̍ɔ yɛ̄grāa pi̍i̍ nīi Ɔwɔ ɔlɔjā de lā ma̍. 7O̍ lichi̍ gba̍a̍ o̍bū nīi ɔ̄chɛ ge̍ē pīyēku̍ ē de ɔ̄chɛ nīi ē yɛ̍ɛ̄lā ɔlɛkpakpa ma̍. Ɔ̄chɛ nīi ē yɛ̍ɛ̄lā ɔnɛ̄ɛhɛhi ɔnɛ̄ɛhɛhi ma̍ nīi ɔ̄chɛ ka̍a ge̍ē bɔ̍ɔ̄tū pīyēku̍ ē de ɔ̍ a̍nɛ oo. 8Mɔ̍ɔkɔ nīi Ɔwɔ chī de ɔhɔtū yī nū chabɔ̄ hu̍ alɔ ɔ̄kū gɛ! Yɛ̄grāa nīi alɔ e̍e re̍ka āchɛ ɔyɛ̍ɛ̄lā ɔdwɔ̄bi̍ we̍ ma̍ nīi Ikra̍yisi pīyaku̍ de alɔ a̍nɛ. 9Bū la ɔpīyaku̍ yī nū nīi Ɔwɔ ya̍ nīi alɔ de lɛ kpakpa ke̍e̍ ba̍la Ɔwɔ ɔlɔjā a̍nɛ. Ɔla̍ā lɛ i̍ngɔ̍ɔ ma̍, alɔ jo̍ōkū hwɔhi hwɔhi bɛ̍ɛ̄nɛ̄ hīka Ikra̍yisi ge̍ē de alɔ ē hɛ̍ta̍ hī ɔtū ngurangura yī lɛpɔ̄ ɔhɔ̍ɔ̄hɛ̍ yī Ɔwɔ. 10Alɔ - aluji yī Ɔwɔ o̍bū nɛ, Ɔwɔ chī de alɔ pīya aɛ̍ɛya anu̍ bū la ɔpīyaku̍ yī Ɔyi̍ yī nū ke̍e̍ mɛ̍. U̍ma̍ama nīi alɔ - aɛ̍ɛya yī Ɔwɔ bɛ̍ɛ̄nɛ̄ nɛ ma̍, ɔla̍ā kpɛ̍ɛ nīi o̍ ge̍ē de alɔ hɛ̍ta̍ bū la ɔhɔ̄leyī yī Ikra̍yisi bɛ̍ɛ̄nɛ̄ a̍nɛ. 11I̍ ɔla̍ā ɔla̍ā ke̍e̍ ni̍. Alɔ yɛ ē wɔ̄wīyā wu̍chē yī Ɔwɔ bɛ̍ɛ̄nɛ̄. Ɔwɔ̄wīyā ɔla̍ā bū la abɔ̄ yī Ādādā yī alɔ Iji̍sɔ̄ɔsi Ikra̍yisi nīi de alɔ pīya aɛ̍ɛya yī Ɔwɔ bɛ̍ɛ̄nɛ̄ ma̍.

Ɔhɔ̄ɔ̄hɔ̄ yī A̍dāam ba̍la Ikra̍yisi

12Lɛlā ɔdwɔ̄bi̍ wā la yɛchɛ nūma̍ gala abɔ̄ yī ɔngrɔ̄ɔ ūkpo̍he. Lɛlā ɔdwɔ̄bi̍ yī nū ɔla̍ā bī ɔpīyaku̍ ku iyī nū wā. Wu̍chē yī ɔla̍ā, ɔpīyaku̍ hɔ̄ de ɔ̄chɛmɔ̄chɛ wa̍a̍ bɛ̍ɛ̄nɛ̄. Wu̍chē oji̍ nɛ, ɔ̄chɛmɔ̄chɛ ē yɛ̍ɛ̄lā ɔdwɔ̄bi̍. 13Lɛlā ɔdwɔ̄bi̍ hɔ̄ la yɛchɛ o̍bū nīi Ɔwɔ de Lihɔ ɔla̍ā de Imo̍sīisi a̍nɛ. Ɛbɛ nīi lihɔ ɔha̍lɔha̍ i̍ ge̍ chī hɔ̄ ni̍, ɔka hīka ɔ̄chɛ ya̍ dwɔ̄bi̍ mɛ̍ i̍ hɔ̄ ni̍. 14Bū la yɛ̄grāa yī A̍dāam kpɛɛ ge̍ chɛ̄ yɛ̄grāa yī Imo̍sīisi, ɔpīyaku̍ bī wɔhu̍ yī āchɛ̄ɛchɛ wa̍a̍ a̍nɛ. Gɔ̄ga la āchɛ nīi i̍ yɛ̍ɛ̄lā ɔdwɔ̄bi̍ bāa A̍dāam nīi tɔ̍ɔkɔ yī lɛlā yī Ɔwɔ ma̍ ni̍ ma̍, ɔpīyaku̍ bī wɔhu̍ yī wā titi.

A̍dāam nūma̍ re̍ka īgbla yī ɔ̄chɛ nīi yeēwā ma̍ a̍nɛ. 15Lɛlā yī aa̍ āchɛ ɛpɛpa nūma̍ chī hɔ̄ɔ̄hɔ̄ hɔ̄ɔ̄hɔ̄. Wu̍chē oji̍ nɛ, lɛlā yī ɔjā nīi Ɔwɔ ē kɔ̄kɔ̄ ke̍e̍ ji ē de ɔ̄chɛ ma̍ hɔ̄ɔ̄hɔ̄ hi̍ iyī lɛlā ɔdwɔ̄bi̍ yī A̍dāam. Lēchi̍ nɛ, āchɛ̄ɛchɛ wa̍a̍ pīyaku̍ wu̍chē yī lɛlā ɔdwɔ̄bi̍ nīi ɔngrɔ̄ɔ ūkpo̍he ɔla̍ā ya̍ ma̍. Lɛlā yī uhwa ɔnɛ̄ɛhɛhi yī Ɔwɔ chī gɔ̄ga pɛtɛpɛtɛ. I̍ngi̍ngɔ̍ɔ nīi Ɔwɔ kɔ̄ ɔjā ɔkɔ̄kɔ̄ ke̍e̍ ji de āchɛ̄ɛchɛ wa̍a̍ bū la uhwa ɔnɛ̄ɛhɛhi nīi ɔngrɔ̄ɔ ūkpo̍he ē de ma̍ a̍nɛ. Ɔngrɔ̄ɔ ūkpo̍he ɔla̍ā re̍ka Iji̍sɔ̄ɔsi Ikra̍yisi. 16Lɛlā yī ɔjā nīi Ɔwɔ ē kɔ̄kɔ̄ ke̍e̍ ji ē de ɔ̄chɛ ma̍ chī hɔ̄ɔ̄hɔ̄ hi̍ lɛlā ɔdwɔ̄bi̍ nīi ɔngrɔ̄ɔ ūkpo̍he ta̍tu̍tu̍ ma̍. Wu̍chē oji̍ nɛ, lɛlā ɔdwɔ̄bi̍ ūkpo̍he ɔla̍ā nīi A̍dāam ya̍ ma̍, Ɔwɔ hɛ̍ ɔ̄ lɛpɔ̄, de lɛpɔ̄ ku̍ ɔ̄. Lɛlā ɔdwɔ̄bi̍ wa̍a̍ nīi āchɛ ya̍ bɛ̍ɛ̄nɛ̄ ma̍, Ɔwɔ chī ya̍ wā lɛhi ka anɔ̍lɔ de lɛlā ngma̍ la ɛ̍lɛ ke̍e̍ mɛ̍. 17Lēchi̍ nɛ, bū lɛlā ɔdwɔ̄bi̍ yī ɔngrɔ̄ɔ ūkpo̍he ɔla̍ā nīi ɔpīyaku̍ wu̍tu yɛ ē bī wɔhu̍ yī āchɛ wa̍a̍ a̍nɛ. O̍ lɛ i̍ngɔ̍ɔ wu̍chē yī ɔngrɔ̄ɔ ūkpo̍he ɔla̍ā ma̍, ɔjā nīi bū la lɛlā nīi ɔngrɔ̄ɔ nīi re̍ka Iji̍sɔ̄ɔsi Ikra̍yisi ya̍ ma̍ ge̍ gɔ̄ga pɛtɛpɛtɛ kana̍ ma̍ ēēe! Lēchi̍, āchɛ nāa uhwa ɔnɛ̄ɛhɛhi yī Ɔwɔ mwɛbɛ mwɛbɛ, de lɛ kpakpa la eyī yī Ɔwɔ ɔlɔjā bū la ɔjā nīi Ɔwɔ kɔ̄kɔ̄ de wa̍ ke̍e̍ ji ma̍ mɛ̍. Wu̍chē yī ɔla̍ā, aa̍ wa̍a̍ ge̍ē lwɔhɔ̍hu̍ brii la ɔhɔ̄leyī nīi e̍ ge̍ē hɔ̄ gala abɔ̄ yī Ikra̍yisi ma̍.

18Ma̍ gɛ! Lɛlā ɔdwɔ̄bi̍ yī ɔngrɔ̄ɔ ūkpo̍he ɔla̍ā hu̍ nīi Ɔwɔ hlɛ̍ɛ̄pɔ̄ de ku̍ āchɛ wa̍a̍. Gala ɔgɔgu ɔla̍ā, lɛlā ɔlɛkpakpa ɔyɔ̍ɔ̄ya̍ yī ɔngrɔ̄ɔ ūkpo̍he hu̍ nīi Ɔwɔ de lɛlā ngma̍ la āchɛ wa̍a̍ gba̍a de ɔhɔ̄leyī de wa̍. 19Lɛlā ɔdwɔ̄bi̍ ūkpo̍he yī A̍dāam nīi o̍ i̍ pɔ̍ɔkɔ yī Ɔwɔ ni̍ ma̍ - ohu̍ nīi āchɛ wa̍a̍ de pīya āchɛ ɔyɛ̍ɛ̄lā ɔdwɔ̄bi̍ a̍nɛ. Gala ɔgɔgu ɔla̍ā, Iji̍sɔ̄ɔsi Ikra̍yisi ɔ̄chɛ ūkpo̍he nīi pɔ̍ɔkɔ yī Ɔwɔ ma̍ - ohu̍ nīi āchɛ wa̍a̍ de lɛ kpakpa ba̍la Ɔwɔ a̍nɛ.

20Lihɔ yī Imo̍sīisi wā hɛ̄ɛbɛ nīi lɛlā ɔdwɔ̄bi̍ ge̍ē mwɛbɛ ē gāa iyɔ̄bū iyɔ̄bū. Lɛlā ɔdwɔ̄bi̍ ge̍ chī mwɛbɛ ga iyɔ̄bū iyɔ̄bū, uhwa ɔnɛ̄ɛhɛhi nīi Ɔwɔ ē de ma̍ ge̍ē mwɛbɛ ē gāa iyɔ̄bū iyɔ̄bū gɔ̄ga pɛtɛpɛtɛ bɛ̍ɛ̄nɛ̄. 21Bū la ɛbɛ ɔla̍ā, lɔkɔ nīi lɛlā ɔdwɔ̄bi̍ bī wɔhu̍ yī ɔpīyaku̍ odōde de āchɛ̄ɛchɛ wa̍a̍ ma̍, i̍ngi̍ngɔ̍ɔ nīi uhwa ɔnɛ̄ɛhɛhi yī Ɔwɔ titi bī wɔhu̍ yī ɔya̍ nīi alɔ de lɛ kpakpa ba̍la Ɔwɔ bɛ̍ɛ̄nɛ̄ a̍nɛ. Anu̍ ge̍ē bī alɔ ē gāa ɔhɔ̄leyī i̍mɔ̄mɛni̍ nīi hɔ̄ gala abɔ̄ yī Iji̍sɔ̄ɔsi Ikra̍yisi Ādādā yī alɔ ma̍ a̍nɛ.

Currently Selected:

Aliro̍om 5: YBASR

Highlight

Copy