Aliro̍om 7

Lɛlā ɔnāa kwichi̍ la lihɔ yī lɛba̍ ɔbɔ̍ɔ̄ba̍

1Aɛ̍nɛ̍ yī u! N jo̍ōkū hwɔhi hwɔhi hīka ala̍ je̍ ochi̍chi̍ yī ɔjā nīi n yɛ ma̍ ge̍ē ka ma̍. Wu̍chē oji̍ nɛ, ala̍ jo̍ōkū lɔkɔ nīi lihɔ lɛ ma̍. Yɛ̄grāa wa̍a̍ nīi ɔ̄chɛ e̍e hɔ̄leyī ma̍ nīi lihɔ ē bī wɔhu̍ yī ɔ̄chɛ a̍nɛ. 2O̍ lɛ bāa lɛlā yī ɔnyā ɔblɛ̍ba̍ ma̍. Kpɛɛ nīi ɔbu̍ūnū e̍e hɔ̄leyī we̍ ma̍, ɔnyā ɔla̍ā hɔ̄ la ɔkɔkɔ yī ɔbu̍ūnū ke̍e̍ gala ɔgu yī lihɔ. Ɔbu̍ūnū ge̍ chī pīyaku̍ mɛ̍, o̍ re̍ka o̍ i̍ gblɛfiyɛ yī lihɔ ɔla̍ā nīi o̍ hɔ̄ la ɔkɔkɔ yī ɔbu̍ūnū ma̍ gɛ ni̍. 3Ɔnyā ɔblɛ̍ba̍ ɔla̍ā ge̍ chī pīya ge̍ hɔ̄ tāa ɔngrɔ̄ɔ ɔha̍ yɛ̄grāa nīi ɔbu̍ūnū e̍e hɔ̄leyī ma̍, ɔ̍lɔma̍ o̍ re̍ka ɔnyā ɔla̍ā la̍ ɔ̍bɔ̍ɔ̄nyā. Ɔbu̍ūnū ge̍ chī pīyaku̍ mɛ̍, o̍ re̍ka o̍ i̍ gblɛfiyɛ yī lihɔ ɔla̍ā gɛ ni̍ lachi̍lachi̍. O̍ ge̍ pɔ̄pīya ge̍ bla̍a ɔngrɔ̄ɔ ɔha̍ o̍ i̍ la̍ ɔ̍bɔ̍ɔ̄nyā gɛ ni̍. 4I̍ngɛ̍ɛ̄nɛ̄ nīi lɛlā yī ala̍ titi lɛ a̍nɛ, aɛ̍nɛ̍ yī u. Gala ɔgɔgu yī Lihɔ yī Imo̍sīisi ala̍ wa̍a̍ titi ko̍ōku̍ mɛ̍. Ichɛ̄ɛhi nɛ, wu̍chē oji̍ nɛ, alɔ - ɛbɛha̍ yī ibi̍īyē yī Ikra̍yisi nɛ. U̍ma̍ama, alɔ - āchɛ yī anu̍ nīi Ɔwɔ de ɔ̍ hye̍ēyī la okū ma̍ bɛ̍ɛ̄nɛ̄ nɛ. O̍ ya̍ hɛ̄ɛbɛ nīi alɔ ge̍ē hwɔhi hwɔhi la ɔhɔ̍chɛ̍ yī Ɔwɔ. 5Wu̍chē oji̍ nɛ, yɛ̄grāa nīi alɔ hɔ̄ lɔkɔ nīi ɔchɔ̍ɔwɔ yī ɔ̄chɛ̄ɛchɛ chikpo̍ ma̍, a̍hla̍ yī lɛlā ɔdwɔ̄bi̍ ɔyɔ̍ɔ̄ya̍ nīi Lihɔ yī Imo̍sīisi ta̍tu̍tu̍ yī nū ma̍ yɛ ē ya̍ u̍ku̍rɔ̍ la ibi̍īyē yī alɔ a̍nɛ. Yɛ̄grāa ɔla̍ā, alɔ hwɔhi hwɔhi yɛ ē hɔ̍chɛ̍ yī ɔpīyaku̍. 6U̍ma̍ama nūma̍, alɔ i̍ gblɛfiyɛ yī Lihɔ yī Imo̍sīisi gɛ ni̍. Wu̍chē oji̍ nɛ, gala ɔgɔgu yī Lihɔ yī Imo̍sīisi nīi ku̍ alɔ tū bāa aligbakɔbɔ o̍bū ma̍, alɔ ko̍ōku̍ mɛ̍. Alɔ i̍ hɔ̍chɛ̍ yī ɔpɔ̄pū ɔnɛ̄chɛ̄ ɔla̍ā nīi - iyī lihɔ nīi e̍ de tɔ̍ɔ̄ta̍ gblāa ma̍ gɛ ni̍. Ɔkɔkɔ ɔla̍ā, ɔpɔ̄pū onīpīpɛ̄ nīi - iyī Uhu yī Ɔwɔ ma̍ nīi alɔ hɔ̍chɛ̍ yī nū bɛ̍ɛ̄nɛ̄ a̍nɛ.

Lihɔ ba̍la lɛlā ɔdwɔ̄bi̍

7Alɔ ge̍ē ka kana̍ ma̍ gɛ? O̍ re̍ka Lihɔ yī Imo̍sīisi ɔjā ɔdwɔ̄bi̍ nɛ? Īchāha̍ īchāha̍! Je̍ka Lihɔ yī Imo̍sīisi ɔla̍ā ohu̍ nīi n jo̍ōkū yī lɛlā ɔdwɔ̄bi̍ a̍nɛ? O̍ ge̍ re̍ka Lihɔ yī Imo̍sīisi nīi ka hīka, “A ā hla̍ ɔjā ɔhɔ̍ɔ̄hla̍ ni̍” ma̍, kana̍ nīi n ke̍ ge̍ jo̍ōkū yī lɛlā yī ɔjā ɔhɔ̍ɔ̄hla̍ ma̍? 8Lɛlā ɔdwɔ̄bi̍ ta̍tu̍tu̍ ya̍ nīi a̍hla̍ ita ɔha̍lɔha̍ wa̍a̍ hɔ̄ de u bɛ̍ɛ̄nɛ̄ a̍nɛ. O̍ ya̍ i̍ngɔ̍ɔ bū la lɛlā nīi Ɔwɔ ka āchɛ ɛ̍lɛ ge̍ ya̍ ma̍. Ɛbɛ nīi lihɔ ɔha̍lɔha̍ i̍ ge̍ hɔ̄ ni̍, lɛlā ɔdwɔ̄bi̍ i̍ ē ya̍ ɔjɔ̄jā wɔ̄bɔ̄bɔ̄ yī nū mɛ ni̍. 9Ami ma̍, yɛ̄grāa nīi lihɔ ɔha̍lɔha̍ i̍ hɔ̄ ge̍ē kɛlɛ̄lā de u lɔkɔ nīi n ge̍ē ya̍ ma̍ ni̍ ma̍, n hɔ̄leyī. N wā ge̍ jo̍ōkū yī ɔjā nīi Ɔwɔ ka āchɛ ɛ̍lɛ ge̍ ya̍ ma̍ bɛ̍ɛ̄nɛ̄ ma̍, lɛlā ɔdwɔ̄bi̍ nū kwrichi yarɛ brii bɛ̍ɛ̄nɛ̄. 10Bū la ɛbɛ ɔla̍ā, n pīyaku̍ ke̍e̍. Lɛlā nīi Ɔwɔ ka āchɛ ɛ̍lɛ ge̍ ya̍ nīi ke̍ ge̍ bī ɔhɔ̄leyī ge̍ de u ma̍ chōo̍chē bī ɔpīyaku̍ ge̍ de ami ke̍e̍. 11Lɛlā ɔdwɔ̄bi̍ ma̍ ɛbɛ de ikpo̍ rɛ, gla̍ ami yɛ̍gra̍ bū la lɛlā ɔ̍lɔma̍ nīi Ɔwɔ ka āchɛ ɛ̍lɛ ge̍ ya̍ ma̍. Lɛlā ɔdwɔ̄bi̍ nāa lɛlā ɔla̍ā nīi Ɔwɔ ka āchɛ ɛ̍lɛ ge̍ ya̍ ma̍ bī ngmo̍ u i̍ngɔ̍ɔ ke̍e̍.

12Bū la ɛbɛ ɔla̍ā, o̍ re̍ka Lihɔ yī Imo̍sīisi - ɔjā ɔlɛcha̍ri̍cha̍ri̍ nɛ. Lɛlā nīi Ɔwɔ chī ka āchɛ ɛ̍lɛ ge̍ ya̍ ma̍ chī lɛ cha̍ri̍cha̍ri̍, lɛ kpakpa, gba̍a hwɔhi gɔ̄grāa ke̍e̍. 13Ma̍, o̍ re̍ka ɔjā nīi hwɔhi hwɔhi ma̍ chōo̍chē bī ɔpīyaku̍ ge̍ de ami a̍nɛ? Īchāha̍ īchāha̍! Lɛlā ɔdwɔ̄bi̍ ngmo̍ u a̍nɛ. Lɛlā ɔdwɔ̄bi̍ bī ɔjā nīi - ɔnɛ̄ɛhɛhi ma̍ ya̍ de u ngmo̍ a̍nɛ. Lɛlā ɔdwɔ̄bi̍ ya̍ i̍ngɔ̍ɔ lɛbɛ ge̍ē de iyī nū chabɔ̄ lɔkɔ nīi o̍ lɛ la olēchi̍ lēchi̍ ma̍. Bū la ɔla̍ā nīi lɛlā ɔdwɔ̄bi̍ nāa lɛlā nīi Ɔwɔ ka āchɛ ɛ̍lɛ ge̍ ya̍ ma̍ bī ya̍ u̍ku̍rɔ̍ ma̍, lɛlā ɔdwɔ̄bi̍ de iyī nū chabɔ̄ bāa ɔjā ɔdwɔ̄bi̍ ke̍ke̍ni̍ gba̍a̍ ma̍.

Unu ɔha̍ nīi hɔ̄ la ibi̍īyē yī ɔ̄chɛ̄ɛchɛ ma̍

14Alɔ jo̍ōkū hīka Lihɔ yī Imo̍sīisi ma̍ bū la abɔ̄ yī Ɔwɔ ke̍e̍. Ami chī - ɔ̄chɛ̄ɛchɛ ɔbɔbɔ nīi ē ko̍ōku̍ mɛ ma̍ nɛ. N de pīya ɔfiyɛ yī lɛlā ɔdwɔ̄bi̍ i̍ngɔ̍ɔ ke̍e̍. 15N i̍ ē je̍ ochi̍chi̍ yī ɔjā nīi n chikpo̍ ge̍ ya̍ ma̍ mɛ ni̍. Lɛlā nīi ta̍ um anyī ma̍ nīi n ē chōo̍chē ya̍ ihihi a̍nɛ. 16Ɔla̍ā nīi n ē chōo̍chē ya̍ ɔjā nīi n i̍ ē chikpo̍ ge̍ē ya̍ ni̍ ma̍ chabɔ̄ hīka amɔ̍lɔ chɛ̄ hīka Lihɔ yī Imo̍sīisi ɔ̍lɔ hwɔhi hwɔhi. 17Bū la ɛbɛ ɔla̍ā, o̍ re̍ka i̍ ami ɔlɔjā yɛ ē yɛ̍ɛ̄lā ɔla̍ā a̍ni̍; lɛlā ɔdwɔ̄bi̍ nīi lwɔ̄lɛ̍ la ami ma̍ yɛ ē ya̍ ihihi a̍nɛ. 18N jo̍ōkū gblɛ̍ɛgblɛ̍ɛ hīka lɛlā ɔnɛ̄ɛhɛhi ɔyɔ̍ɔ̄ya̍ ɔha̍lɔha̍ i̍ hɔ̄ amu la ami nūma̍ nīi - ɔ̄chɛ̄ɛchɛ cha̍ka̍ra̍ ma̍ ni̍. Wu̍chē oji̍ nɛ, lɛlā ɔnɛ̄ɛhɛhi ē hɔ̍ɔ̄hla̍ ami la ɔyɔ̍ɔ̄ya̍ nyaa ma̍, n i̍ ē ya̍ mɛ ni̍. 19N i̍ ē yɛ̍ɛ̄lā ɔnɛ̄ɛhɛhi nīi n ē chikpo̍ ge̍ē ya̍ ma̍ ni̍; ɔdwɔ̄bi̍ ɔdwɔ̄bi̍ nīi n i̍ ē chikpo̍ ge̍ē ya̍ ni̍ ma̍, anu̍ nīi n ē chōo̍chē ya̍ ihihi a̍nɛ. 20O̍ ge̍ re̍ka n yɛ ē ya̍ ɔjā nīi ami ɔlɔjā i̍ chikpo̍ ge̍ē ya̍ ni̍ ma̍, ɔla̍ā chabɔ̄ hīka i̍ ami ɔlɔjā yɛ ē yɛ̍ɛ̄lā ɔ̍lɔma̍ a̍ni̍; lɛlā ɔdwɔ̄bi̍ nīi lwɔ̄lɛ̍ la ami ma̍ yɛ ē ya̍ ihihi a̍nɛ.

21Bū la ɛbɛ ɔla̍ā, n ma̍ hīka ita yī lihɔ nūma̍ i̍ngɛ̍ɛ̄nɛ̄ yɛ ē ya̍ u̍ku̍rɔ̍ amu lipu̍ yī ibi̍īyē yī u a̍nɛ: N ge̍ chikpo̍ ge̍ē yɛ̍ɛ̄lā ɔnɛ̄ɛhɛhi, lɛlā abi̍ ɔyɔ̍ɔ̄ya̍ chōo̍chē hɛ̍ u kpɛ̍ɛ ihihi a̍nɛ. 22Abɔ̍ɔ la ɛri̍ya̍ yī lipu̍ yī ami ɔlɔjā ma̍, lihɔ yī Ɔwɔ lɛ u wɔnyɛ gɔ̄ga a̍nɛ. 23N chī ma̍ lihɔ ɔha̍ nīi hɔ̄ɔ̄hɔ̄ ke̍e̍ ma̍ amu la ibi̍īyē yī u. Lihɔ ɔ̍lɔma̍ yɛ ē nunu ē tāa lihɔ ɔla̍ā nīi lɛ ūkpɔ̄tū yī u wɔnyɛ ma̍. O̍ de u ku̍ pīya ɔfiyɛ yī lihɔ yī lɛlā ɔdwɔ̄bi̍ nīi yɛ ē ya̍ u̍ku̍rɔ̍ la ibi̍īyē yī u ma̍. 24Ɔchɔ̍ɔnyɛ ēēe! Ɔ̄nyɛ kpɛ̍ɛ ge̍ē u̍tu ē de u ē hɛ̍ta̍ hī ibi̍īyē nūma̍ nīi bī u yɛ ma̍ yɛ gāa ɔpīyaku̍ ma̍? 25O̍gbo̍ ge̍ - iyī Ɔwɔ nīi ge̍ē de u ē hɛ̍ta̍ gala abɔ̄ yī Iji̍sɔ̄ɔsi Ikra̍yisi Ādādā yī alɔ ke̍e̍ ma̍!

Ɔchlɛhu̍ yī lɛlā nīi n lɛ ma̍ hɔ̄ ma̍ a̍nɛ! Ami ɔlɔjā ma̍ ge̍ē hɔ̍chɛ̍ yī lihɔ yī Ɔwɔ ke̍e̍ la ūkpɔ̄tū yī u wa̍a̍. Ɔchɔ̍ɔwɔ yī ɔ̄chɛ̄ɛchɛ nīi n wɛ ma̍, anu̍ ge̍ē hɔ̍chɛ̍ yī lihɔ yī lɛlā ɔdwɔ̄bi̍ ɔla̍ā a̍nɛ.

Currently Selected:

Aliro̍om 7: YBASR

Highlight

Copy