Aliro̍om 4

Igbla yī ɔtū ode chōche yī A̍brahāam

1Bɛ̍ɛ̄nɛ̄ ma̍, oji̍ nīi alɔ ge̍ē ka ē ku̍ lɛlā yī A̍brahāam nīi - a̍dɔ̄kū yī alɔ āchɛ yī Iju̍u ma̍? Oji̍ nīi o̍ ma̍ wɔ̄bɔ̄bɔ̄ yī nū ma̍? 2Ala̍ ma̍ gɛ ko̍ō! O̍ ge̍ re̍ka A̍brahāam de lɛ kpakpa ba̍la Ɔwɔ bū la lɛlā ɔha̍ nīi anu̍ ɔlɔjā yɔ̍ɔ̄ya̍ ma̍ nɛ, o̍ ge̍ ma̍ lɛlā ɔha̍ ē bī gbogū. O̍ i̍ lɛ lɛlɛ̄lā obī gbogū la iyɔ̄bū yī Ɔwɔ ni̍. 3Wu̍chē oji̍ nɛ, Īpū yī Ɔwɔ ka hīka, “A̍brahāam de ɔtū che Ɔwɔ. Bū la ɔtū ode chōche yī nū, Ɔwɔ nāa anu̍ nīi o̍ de lɛ kpakpa la eyī yī nū ke̍e̍.” 4Ɔ̄chɛ nīi ya̍ u̍ku̍rɔ̍ ma̍, e̍ ē kla̍ anu̍ ure̍ yī u̍ku̍rɔ̍ nīi o̍ ya̍ ma̍. Ure̍ yī u̍ku̍rɔ̍ yī nū ɔla̍ā, ɔ̄chɛ i̍ ē nāa anu̍ ka ɔ̍lɔ - ɔjā ɔkɔ̄kɔ̄ ni̍. Ɔjā nīi o̍ nāa wu̍chē yī ɔjā nīi o̍ yɔ̍ɔ̄ya̍ ma̍ nɛ. 5Ɔ̄chɛ nīi i̍ chī yɛ ē kwɔgu lɛlā ɔyɔ̍ɔ̄ya̍ hɛ̄ɛbɛ gbɔjā la abɔ̄ yī Ɔwɔ ni̍, nīi de ɔtū che Ɔwɔ ke̍e̍ ma̍ bɛ̍ɛ? Wu̍chē oji̍ nɛ, o̍ de ɔtū che Ɔwɔ nīi ē ya̍ nīi ɔ̄chɛ ɔdwɔ̄bi̍ ē de ē hwɔhi hwɔhi ē mɛ̍ ma̍. Bū la ɛbɛ ɔla̍ā, ɔtū ode chōche yī nū ɔla̍ā nīi Ɔwɔ ē nāa ē bī ya̍ nīi ɔlɔjā de ē lɛ kpakpa ba̍la Ɔwɔ bɛ̍ɛ̄nɛ̄ a̍nɛ. 6Ide̍bīidi titi kɛlā nūma̍ i̍ngi̍ngɔ̍ɔ. O̍ ka a̍hōhi ɔ̍lɔ ge̍ iyī ɔ̄chɛ nīi Ɔwɔ ɔ̍lɔ nāa ɔ̍lɔ hīka ɔ̍lɔ de lɛ kpakpa la eyī yī anu̍ ke̍e̍ ma̍. Onūma̍ i̍ lā ku lɛlā ɔyɔ̍ɔ̄ya̍ yī ɔ̄chɛ ɔlɔjā hɛ̄ɛbɛ gbɔjā la abɔ̄ yī Ɔwɔ ni̍. I̍ngɛ̍ɛ̄nɛ̄ nīi Ide̍bīidi ka a̍nɛ:

7“A̍hōhi ge̍ iyī āchɛ nīi Ɔwɔ de lɛlā abi̍ ɔyɔ̍ɔ̄ya̍ yī wā

kɔ̄ de wa̍ ke̍e̍ ma̍!

8A̍hōhi ge̍ iyī ɔ̄chɛ nīi Ādā i̍ ge̍ē de lɛlā ɔdwɔ̄bi̍ yī nū

lā ga̍nū gɛ ni̍ ma̍!”

9O̍ re̍ka a̍hōhi nūma̍ nīi Ide̍bīidi ka ma̍ - iyī āchɛ yī Iju̍u nīi re̍ka āchɛ ɔtwɔ̍wu̍ ma̍ ke̍e̍ nɛ? Ehe̍e! A̍hōhi nūma̍ - iyī Ɛchɛkɔcha nīi re̍ka āchɛ i̍twɔ̍wu̍ ni̍ ma̍ titi nɛ. Wu̍chē oji̍ nɛ, alɔ kɛlā bū la Īpū yī Ɔwɔ i̍ngɔ̍ɔ i̍chɛ mɛ̍ hīka, “A̍brahāam de ɔtū che Ɔwɔ. Bū la ɔtū ode chōche yī nū, Ɔwɔ nāa anu̍ ka ɔ̍lɔ de lɛ kpakpa la eyī yī anu̍ ke̍e̍ mɛ̍.” 10Yɛ̄grāa ɔna̍ nīi lɛlā nūma̍ ya̍ ma̍? O̍ ya̍ o̍bū nīi A̍brahāam twɔ̍wu̍, kɛ̄ɛ A̍brahāam twɔ̍wu̍ o̍bū? Lɛlā ɔla̍ā lā o̍bo̍o̍bū nīi o̍ twɔ̍wu̍ a̍nɛ. 11O̍ wā ge̍ twɔ̍wu̍ bɛ̍ɛ̄nɛ̄ ma̍, wɔwu̍ ɔtɔ̍ɔ̄ta̍ yī nū ɔla̍ā lɛ bāa ukɔ̄ ohōhu nīi ge̍ē chabɔ̄ yī lɛlā ɔha̍ ma̍. Ɔla̍ā chabɔ̄ hīka, yɛ̄grāa nīi A̍brahāam i̍ tɔ̍ɔ̄twɔ̍wu̍ we̍ ni̍ ma̍, wu̍chē yī ɔtū nīi o̍ de che Ɔwɔ ma̍, Ɔwɔ nāa anu̍ ka ɔ̍lɔ de lɛ kpakpa la eyī yī anu̍ mɛ̍. Bū la ɛbɛ ɔla̍ā, āchɛ wa̍a̍ nīi de ɔtū che Ɔwɔ nīi Ɔwɔ nāa aa̍ ka ɛ̍lɛ de lɛ kpakpa la eyī yī anu̍ ma̍, e̍ i̍ ge̍ tɔ̍ɔ̄twɔ̍wu̍ ni̍, A̍brahāam re̍ka a̍dā yī wā a̍nɛ. 12A̍brahāam chī gba̍a - a̍dā yī āchɛ nīi twɔ̍wu̍ ma̍ nɛ. I̍ wu̍chē yī wɔwu̍ nīi e̍ ta̍ ma̍ - ohu̍ a̍ni̍. Ɔjā nīi hu̍ ma̍, onīi e̍ hɔ̄ gala ɔgɔgu yī ɔtū ode che Ɔwɔ lɔkɔ nīi a̍dā yī alɔ A̍brahāam hɔ̄ de ɔtū che Ɔwɔ o̍bū nīi o̍ twɔ̍wu̍ ma̍ nɛ.

Lɔkɔ nīi A̍brahāam nāa oko̍o ochōche yī Ɔwɔ ma̍

13Ɔwɔ choko̍o de A̍brahāam ba̍la wɔma yī nū ka yɛchɛ wa̍a̍ ɔ̍lɔ - iyī ɛ̍lɛ nɛ. I̍ owu̍chē hīka A̍brahāam gbō Lihɔ yī Imo̍sīisi ka̍ka̍ - ohu̍ a̍ni̍. Ɔwɔ choko̍o de ɔ̍ wu̍chē yī ɔtū nīi o̍ de che Ɔwɔ nīi Ɔwɔ nāa anu̍ ka ɔ̍lɔ de lɛ kpakpa la eyī yī anu̍ ma̍. 14O̍ ge̍ re̍ka Ɔwɔ ge̍ē de ɔjā nīi o̍ choko̍o ma̍ ē de āchɛ nīi ē gbō Lihɔ yī Imo̍sīisi ke̍e̍ ma̍ nɛ, nɛ̄ni̍ ɔtū nīi ɔ̄chɛ de ē che Ɔwɔ ma̍ ge̍ re̍ka a̍ji yī lɛlā ke̍e̍; oko̍o nīi Ɔwɔ che ma̍ chī ge̍ re̍ka a̍kpla yī lɛlā i̍ngɔ̍ɔ ke̍e̍. 15Lihɔ yī Imo̍sīisi nīi hɔ̄ ma̍, anu̍ ē bī ɔtū ngurangura yī lɛpɔ̄ ɔhɔ̍ɔ̄hɛ̍ yī Ɔwɔ ē wā a̍nɛ. Ɛbɛ nīi lihɔ ɔha̍lɔha̍ i̍ ge̍ hɔ̄ ni̍, lihɔ ode bɔ̄bīya i̍ hɔ̄ ni̍.

16Oko̍o nīi Ɔwɔ che ma̍ hɔ̄ wu̍chē yī ɔtū ode che Ɔwɔ ochōche. O̍ lɛ i̍ngɔ̍ɔ hɛ̄ɛbɛ nīi uhwa ɔnɛ̄ɛhɛhi nīi Ɔwɔ choko̍o ge̍ē de ma̍ ge̍ē re̍ka ɔjā ɔkɔ̄kɔ̄ ke̍e̍ de āchɛ wa̍a̍ nīi - wɔma yī A̍brahāam ma̍ la olēchi̍ lēchi̍. I̍ iyī āchɛ ka̍ta̍ nīi ē gbō Lihɔ yī Imo̍sīisi ma̍ ni̍. Iyī āchɛ nīi de ɔtū che Ɔwɔ lɔkɔ nīi A̍brahāam de ɔtū che Ɔwɔ ma̍ kpa̍a nɛ. Wu̍chē oji̍ nɛ, A̍brahāam re̍ka a̍dā yī alɔ wa̍a̍ a̍nɛ. 17O̍ lɛ lɔkɔ nīi Īpū yī Ɔwɔ ka ma̍, “N de wɔ pīya a̍dā yī ɔcha yɛ̄mɛ̄mɛ̄ mɛ̍.” Oko̍o nīi Ɔwɔ che ma̍ hwɔhi hwɔhi gɔ̄grāa la īkprī yī Ɔwɔ ɔlɔjā nīi A̍brahāam de ɔtū che ɔ̍ ma̍. Anu̍ - Ɔwɔ nīi ē de okū hye̍ēyī wā la ɔhɔ̄leyī mɛ ma̍ nɛ. Anu̍ - Ɔwɔ nīi ē kɛlā ji nīi ɔjā nīi i̍ hɔ̄ o̍bū ni̍ ē chōo̍chē de ē hɔ̄ ke̍e̍ ma̍ nɛ. 18A̍brahāam de ɔtū che ɔjā nīi Ɔwɔ choko̍o ma̍ i̍ngɔ̍ɔ kpɔ̍ɔ̍ yɛ̄grāa ɔla̍ā nīi ɔjɔ̄jā odeyīche che i̍ hɔ̄ ni̍ lachi̍lachi̍ ma̍. Bū la ɔla̍ā, o̍ de pīya “a̍dā yī ɔcha yɛ̄mɛ̄mɛ̄.” O̍ lɛ lɔkɔ nīi Īpū yī Ɔwɔ ka ma̍, “Āchɛ nīi ge̍ē bū la wɔma yī wɔ ma̍ ge̍ lyɛ̄mɛ̄ kpɛ̍ɛji.” 19A̍brahāam gbajɛ lɛ̍yi̍ ohu ɛrwɔ̄ yɛ gāa mɛ̍; o̍ ge̍ gbɔ̄gbɛri̍ya̍ tū lɔkɔ nīi ibi̍īyē yɛngrɔ̄ɔ yī nū ko̍ōku̍ wa̍a̍ mɛ̍, kɛ̄ɛ Isa̍ra ɔnyā yī nū nīi i̍ ge̍ē ma ɔyi̍ ē mɛ̍ ē gɛ ni̍ ma̍, ɔtū nīi o̍ de che Ɔwɔ ma̍ i̍ diya gee ni̍ kpɔ̍ɔ̍. 20A̍brahāam i̍ pi̍ye̍mā la ɔtū ode che Ɔwɔ ochōche ni̍; o̍ i̍ ta̍ahu̍ yī ɔjā nīi Ɔwɔ choko̍o de ɔ̍ ma̍ ni̍. Ɔkɔkɔ ɔla̍ā, ɔtū nīi o̍ de che Ɔwɔ ma̍ ya̍ nīi o̍ lwɔhu̍ brii, kā Ɔwɔ ɔkɔ̄kā. 21O̍ jo̍ōkū gblɛ̍ɛgblɛ̍ɛ hīka Ɔwɔ ɔ̍lɔ ge̍ē ya̍ ɔjā nīi ɔ̍lɔ choko̍o ma̍. 22Ɔla̍ā - ohu̍ nīi, “Ɔwɔ nāa A̍brahāam ka ɔ̍lɔ de lɛ kpakpa la eyī yī anu̍ mɛ̍” a̍nɛ. 23Ɔkɔlɛ̄lā nūma̍ nīi re̍ka, “Ɔwɔ nāa anu̍ ka ɔ̍lɔ de lɛ kpakpa la eyī yī anu̍” ma̍, e̍ i̍ ta̍ tū la īpū wu̍chē yī A̍brahāam ke̍e̍ ni̍. 24E̍ de ta̍ tū wu̍chē yī alɔ titi nīi Ɔwɔ ge̍ē nāa alɔ ka aɛ̍lɛ de lɛ kpakpa la eyī yī anu̍ ma̍. Alɔ wa̍a̍ nīi de ɔtū che Ɔwɔ nīi de Iji̍sɔ̄ɔsi Ādādā yī alɔ hye̍ēyī la okū ma̍ nɛ. 25Iji̍sɔ̄ɔsi nūma̍ nīi Ɔwɔ tu̍labɔ̄ hī ɔ̄ nīi o̍ pīyaku̍ wu̍chē yī lɛlā ɔdwɔ̄bi̍ yī alɔ wa̍a̍ ma̍, Ɔwɔ de ɔ̍ hye̍ēyī bū la okū wā la ɔhɔ̄leyī ya̍ nīi alɔ de lɛ kpakpa ba̍la Ɔwɔ mɛ̍.

Currently Selected:

Aliro̍om 4: YBASR

Highlight

Copy