Aliro̍om 13

Lɛlā nīi ngma̍ la ɔya̍ ba̍la alɛhu̍ yī ɔcha ma̍

1Ɔ̄chɛmɔ̄chɛ ge̍ ya̍ lɔkɔ nīi āchɛ nīi bī wɔhu̍ yī ɔcha ɔla̍ā ma̍ ka ma̍. Wu̍chē oji̍ nɛ, Ɔwɔ i̍ ge̍ chɛ̄ o̍bū ni̍, wɔhu̍ yī ɔcha obōbī ɔha̍lɔha̍ i̍ ge̍ē hɔ̄ ni̍. Wɔhu̍ obōbī wa̍a̍ nīi hɔ̄ ma̍, Ɔwɔ de lā i̍ngɔ̍ɔ a̍nɛ. 2Bū la ɛbɛ ɔla̍ā, ɔ̄chɛ nīi ge̍ tɔ̍ɔkɔ yī lɛlā yī āchɛ nīi bī wɔhu̍ yī ɔcha u̍ma̍ama ma̍, o̍ re̍ka ɔlɔjā tɔ̍ɔkɔ yī lɛlā nīi Ɔwɔ de lā ma̍. Ɔ̄chɛ nīi ge̍ ya̍ i̍ngɔ̍ɔ mɛ̍, o̍ re̍ka ɔlɔjā yɛ ē ya̍ nīi Ɔwɔ ge̍ē hɛ̍ ɔ̄ lɛpɔ̄ ɔdwɔ̄bi̍. 3Āchɛ ɔyɛ̍ɛ̄lā ɔnɛ̄ɛhɛhi i̍ tūuhwi yī āchɛ nīi bī wɔhu̍ yī ɛbɛ ma̍ ni̍. Alɛlā abi̍ ɔyɔ̍ɔ̄ya̍ ē tūuhwi i̍ngɔ̍ɔ a̍nɛ. A i̍ ge̍ chikpo̍ nīi āchɛ nīi bī wɔhu̍ yī ɛbɛ ma̍ ge̍ē de ē ya̍ wɔ uhuhwi ni̍, ɔ̍lɔma̍ yɛ̍ɛ̄lā ɔnɛ̄ɛhɛhi gɛ; ma̍a e̍ ge̍ē kā wɔ ɔkɔ̄kā. 4Wu̍chē oji̍ nɛ, ɔ̄chɛ obī wɔhu̍ yī ɛbɛ - ɔ̍chɛ̍ yī Ɔwɔ nɛ. O̍ yɛ ē ya̍ u̍ku̍rɔ̍ wu̍chē yī ɔnɛ̄ɛhɛhi yī ala̍. A ge̍ chī yɛ ē yɛ̍ɛ̄lā abi̍, ɔ̍lɔma̍ tūuhwi yī nū. Wu̍chē oji̍ nɛ, o̍ lwɔhu̍ bī abɔ̍ɔ ge̍ē ya̍ tāa awɔ ichɛ̄ɛhi. O̍ hɔ̄ ge̍ē chrāa Ɔwɔ ɛrɔ̄. O̍ ē nāa lɛpɔ̄ ɔhɔ̍ɔ̄hɛ̍ yī Ɔwɔ ē bī hɛ̍ āchɛ nīi yɛ̍ɛ̄lā abi̍ ma̍ ē de ichi̍ de wa̍. 5Wu̍chē yī ɔla̍ā, ala̍ ā ya̍ lɔkɔ nīi āchɛ nīi bī wɔhu̍ yī ɛbɛ ma̍ ka ma̍. I̍ owu̍chē yī lɛpɔ̄ ɔhɔ̍ɔ̄hɛ̍ nīi Ɔwɔ ge̍ē de ichi̍ ē de āchɛ ma̍ ka̍ta̍ ni̍. Owu̍chē yī ɛri̍ya̍ yī ūkpɔ̄tū yī ala̍ ɛlɛjā i̍ngi̍ngɔ̍ɔ nɛ.

6Onūma̍ gba̍a - ohu̍ nīi ala̍ ē ta̍ i̍kpa̍da̍ a̍nɛ. Āchɛ nīi bī wɔhu̍ yī ɔcha ɔla̍ā ma̍ yɛ ē ya̍ u̍ku̍rɔ̍ ɔla̍ā de Ɔwɔ, nīi o̍ ge̍ re̍ka e̍ ya̍ ɔjā nīi ngma̍ nīi e̍ ge̍ē ya̍ ma̍. 7Ala̍ ā kla̍ āā ure̍ yī ɔjā nīi ala̍ dɛ̄ wā ure̍ ma̍. Ala̍ ā ta̍ i̍kpa̍da̍ yī lɛhu̍ yī ala̍ ɛlɛjā ba̍la iyī āɛ̄jā nīi ala̍ lɛ ma̍ de wa̍. Ala̍ ā de otūlichō ba̍la rīgā de alɛhu̍ wa̍a̍.

Lɛlā nīi ngma̍ la ɔya̍ ba̍la ɔ̍nyīnū ma̍

8Ala̍ e̍e dɛ̄ ɔ̄chɔ̄chɛ ure̍ ni̍. Ure̍ ka̍ta̍ nīi ala̍ ge̍ē dɛ̄ ma̍ - ɔhɔtū ɔlɔ̄lɛ de ɔ̍nyīnū nɛ. Ɔ̄chɛmɔ̄chɛ nīi ge̍ yɔ̍ɔhɔtū de ɔ̍nyīmɔ̄chɛ yī nū mɛ̍, o̍ re̍ka ɔlɔjā de Lihɔ yī Imo̍sīisi gbō ke̍e̍ mɛ̍. 9“A ā la̍ ɔ̍bɔ̍ɔ̄nyā ni̍. A ā ngmo̍ ɔ̄chɛ ni̍. A ā wūwī ni̍. A ā hla̍ ɔjā yī ɔ̄chɛ ni̍.” Ɔkɔlɛ̄lā nūma̍ wa̍a̍ - lɛlā nīi Ɔwɔ ka ma̍ nɛ. Enūma̍ wa̍a̍ ba̍la ɛha̍ nīi hɔ̄ chɔba la aa̍ ma̍ tū la lipu̍ yī lɛlā ūkpo̍he kpo̍kpo̍ nūma̍: “Yɔ̍ɔhɔtū yī ɔ̍nyīmɔ̄chɛ yī wɔ bāa awɔ ɔlɔjā ma̍.” 10Ɔ̄chɛ nīi yɔ̍ɔhɔtū yī ɔ̍nyīmɔ̄chɛ yī nū ma̍ i̍ ē ya̍ ɔ̄ dwɔ̄bi̍ ni̍. A ge̍ yɔ̍ɔhɔtū mɛ̍, o̍ re̍ka Lihɔ yī Imo̍sīisi ligbo̍ ligbo̍ nīi a yɛ de ē gbō a̍nɛ.

11I̍ngɔ̍ɔ nīi ala̍ ge̍ē ya̍ a̍nɛ. Je̍ka aa̍ ala̍ je̍ yɛ̄grāa nīi hɔ̄ ma̍ ma̍? Yɛ̄grāa ohye̍ēyī la wɔlā hɔ̄ ma̍ a̍nɛ. Yɛ̄grāa pi̍i̍ nīi Ɔwɔ ge̍ē de alɔ ē hɛ̍ta̍ ma̍ de hīhī kurɛkurɛ hɛ̍ īchāha̍ ɔla̍ā nīi alɔ chɛ̄ku Ikra̍yisi la ɔrāarāa ma̍ mɛ̍. 12Otu̍ de hɛ̍ga yɛ amu yɛ gāa mɛ̍; eyī ɔnyɔ̄nyā yɛ aa̍ yewā bɛ̍ɛ̄nɛ̄ a̍nɛ. O̍ lɛ i̍ngɔ̍ɔ ma̍, alɔ ā pi̍ye̍mā hī lɛlā yī ɛbɛ odobū la ɔyɔ̍ɔ̄ya̍ gɛ. Alɔ ā kpo̍ ɛjālɛ̄wu̍ nīi alɔ ge̍ē bī nunu la ɛbɛ ɔlɛgēdēgēdē ma̍ tū la iyē gɛ. 13Alɔ ā ya̍ abɔ̄lɛ̄lā ɔlɛtri̍di̍di̍ bāa āchɛ nīi gblāa la ɛbɛ ɔlɛgēdēgēdē la yɛnɔ ma̍ gɛ. Ɔjā ɔgwɔ̍ɔ̄gwa̍ de wɔ̄wīyā ɔdwɔ̄bi̍ ɔdwɔ̄bi̍ ita ɔha̍lɔha̍ wa̍a̍ ge̍ e̍e hɔ̄ gɛ ni̍. Ya̍chi yī lɛlā ɔyɔ̍ɔ̄ya̍ ba̍la a̍kpla yī lɛlā ɔyɔ̍ɔ̄ya̍ ita ɔha̍lɔha̍ ge̍ e̍e hɔ̄ gɛ ni̍. 14Ɔkɔkɔ ɔla̍ā, ala̍ ā nāa Ādā ɔlɔjā nīi - Iji̍sɔ̄ɔsi Ikra̍yisi ma̍ tū la iyē bāa ɛjālɛ̄wu̍ ma̍ gɛ. Ala̍ ā pi̍ye̍mā hī lɛlā yī ala̍ ɛlɛjā nīi ē hla̍ ala̍ la ɔyɔ̍ɔ̄ya̍ ma̍ gɛ.

Currently Selected:

Aliro̍om 13: YBASR

Highlight

Copy