Aliro̍om 12

Ɔhɔ̄leyī nīi alɔ ge̍ē bī hɔ̍chɛ̍ yī Ɔwɔ ma̍

1O̍ lɛ i̍ngɔ̍ɔ ma̍, aɛ̍nɛ̍ yī u, wu̍chē yī lɛha̍ nīi Ɔwɔ ma̍ de alɔ i̍ngɔ̍ɔ ɔ̄kū ma̍, n ge̍ē ra̍ābɔ̄ yī lɛlā nūma̍ ē de ala̍ wa̍a̍: Ala̍ ā de iyī ala̍ ɛlɛjā kwɔbɔ̄ de Ɔwɔ bāa ɔjā ode pā Ɔwɔ ɔpɔ̄pā nīi - e̍e hɔ̄leyī ma̍. Ala̍ ā de iyī ala̍ lā ke̍e̍ de ɔ̍ la u̍ku̍rɔ̍ yī nū ɔyɔ̍ɔ̄ya̍, gbo ɔ̍ ɔtū nɛnɛ gɛ. Ɔpɔ̄pū yī otūlichō olēchi̍ lēchi̍ nīi ala̍ ge̍ē ya̍ de Ɔwɔ ma̍ bī aa̍ a̍nɛ. 2Ala̍ e̍e nāa abɔ̄lɛ̄lā ɔyɔ̍ɔ̄ya̍ yī alyɛchɛ nūma̍ ni̍. Ɔkɔkɔ ɔla̍ā, ala̍ ā pi̍ye̍mā nīi ala̍ ge̍ de pīyata̍ ga onīpīpɛ̄ ke̍e̍ la ɔgɔ̄grāa gɛ. Bū la ɛbɛ ɔla̍ā bɛ̍ɛ̄nɛ̄ ma̍ ala̍ ge̍ē je̍ ɔjā nīi Ɔwɔ chikpo̍ ke̍e̍ ma̍ mɛ: Lɛlā nīi hwɔhi hwɔhi ma̍, ba̍la lɛlā nīi lɛ ɔ̍ wɔnyɛ ma̍, ba̍la lɛlā nīi hwɔhi gɔ̄grāa ke̍e̍ ma̍ nɛ.

3Wu̍chē yī ɔjā nīi Ɔwɔ kɔ̄kɔ̄ de u ke̍e̍ ji ma̍, n ge̍ē koko̍o de ala̍ wa̍a̍ hīka, ala̍ e̍e gbɛri̍ya̍ tū iyī ala̍ de glɛbɛta̍ ni̍. Ɔkɔkɔ ɔla̍ā, ala̍ gbo ɔtū nɛnɛ gbɛri̍ya̍ tū iyī ala̍ ɛlɛjā. Ɔnyɔnyɛ ge̍ hɛ̍ iyī nū lɛpɔ̄ kwiko la ɔtū ode chōche lɔkɔ nīi Ɔwɔ de de ɔlɔjā ge̍ gbajɛ ma̍. 4Ibi̍īyē ma̍ lɛ ūkpo̍he. Alɔ chī tū ɛbɛ yɛ̄mɛ̄mɛ̄ la ibi̍īyē ūkpo̍he nūma̍. Ɔnyɔnyɛ yī wā ya̍ u̍ku̍rɔ̍ hɔ̄ɔ̄hɔ̄ hɔ̄ɔ̄hɔ̄. 5Gala ɔgɔgu ɔla̍ā, alɔ wa̍a̍ lɔ̄lyɛ̄mɛ̄ nyaa ma̍, alɔ tū la ibi̍īyē ūkpo̍he ngmo̍tu̍chɛ̄ ba̍la Ikra̍yisi. Alɔ wa̍a̍ hra̍ku la ɔ̍nyīnū lɔkɔ nīi ɛbɛha̍ ɛbɛha̍ yī ibi̍īyē hra̍ku la ibi̍īyē ūkpo̍he ma̍. 6Bū la ɛbɛ ɔla̍ā, alɔ ge̍ē bī ɔjā nīi Ɔwɔ kɔ̄ de alɔ nīi hɔ̄ɔ̄hɔ̄ hɔ̄ɔ̄hɔ̄ ma̍ ē ya̍ gala ɔgɔgu yī uhwa ɔnɛ̄ɛhɛhi nīi Ɔwɔ de de alɔ ma̍. O̍ ge̍ - iyī ɛrɔ̄ yī Ɔwɔ ɔkɔ̄ka de āchɛ nɛ, alɔ ā ka ɛrɔ̄ yī Ɔwɔ kwiko la ɔtū ode chōche nīi alɔ lɛ ma̍. 7O̍ ge̍ chī - iyī ɛrɔ̄ ɔchɔ̄chɛ̄ nɛ, alɔ ā chrɛ̄ɛrɔ̄ i̍ngɔ̍ɔ. O̍ ge̍ - iyī ongū āchɛ lɛlā nɛ, alɔ ā ngū i̍ngɔ̍ɔ. 8O̍ ge̍ chī ɔtū āchɛ yɛngrɔ̄ɔ nɛ, alɔ ā ya̍ i̍ngɔ̍ɔ. Ɔ̄chɛ nīi ge̍ lɛ ɔjā ge̍ē kɔ̄ de āchɛ, ɔlɔjā ge̍ ya̍ i̍ngɔ̍ɔ la ūkpɔ̄tū ɔlɛyaya. Ɔ̄chɛ nīi ge̍ - ɔlɛhu̍ yī lɛlā ɔha̍, ɔlɔjā ge̍ de abɔ̄ ngmu̍wɔ̍hu̍ la u̍ku̍rɔ̍. Ɔ̄chɛ nīi ge̍ yɛ ē mlɛ̍ha̍ yī āchɛ, ɔlɔjā ge̍ ya̍ i̍ngɔ̍ɔ la ūkpɔ̄tū ɔlɛgbadagbada.

9Ɔhɔtū nīi i̍ tū a̍chālā ni̍ ma̍ nīi ala̍ ge̍ē lɛ a̍nɛ. Lɛlā abi̍ ɔha̍lɔha̍ wa̍a̍ ge̍ ta̍ ala̍ anyī. Ala̍ ā ta̍ābɔ̄ ku̍ lɛlā ɔnɛ̄ɛhɛhi brii. 10Ala̍ ā yɔ̍ɔhɔtū yī ɔ̍nyīnū gɛnɛgɛnɛ bāa aɛ̍nɛ̍ la abɔ̄ yī Ikra̍yisi ma̍. Otūlichō ɔya̍ de ɔ̍nyīnū ge̍ hla̍ ɔ̍nyīnū ɔhɔ̍ɔ̄hla̍. 11Ala̍ ā de abɔ̄ ngmu̍wɔ̍hu̍ la u̍ku̍rɔ̍; ala̍ e̍e de dwɔbɔ̄ ni̍. Ala̍ ā chrāa Ādā ɛrɔ̄ de ūkpɔ̄tū yī ala̍ kwɔbɔ̄ de ɔ̍ ke̍e̍. 12Ɔjā nīi ala̍ deyīche ma̍ ge̍ de ala̍ tū la ɔwɔ̄wīyā myɛ̄grāa-myɛ̄grāa. Ala̍ ā mlɔtū kpɔ̍ɔ̍ la akanya wa̍a̍ nīi ē hɔ̄ de ala̍ ma̍. Ala̍ ā jɔhā de Ɔwɔ myɛ̄grāa-myɛ̄grāa. 13Ɛjā nīi ala̍ lɛ ma̍, ala̍ ā de bɔ̍ɔ̄ba̍ ba̍la aɛ̍nɛ̍ yī ala̍ nīi i̍ lɛ ni̍ ma̍. Ala̍ ā bī āchɔga ga wɔlɛ̍ yī ala̍.

14Ala̍ ā ra̍ābɔ̄ de Ɔwɔ nīi o̍ ge̍ de ɔpiyɛ kla̍ āchɛ nīi ē ya̍ ala̍ ichi̍ dwɔ̄bi̍ dwɔ̄bi̍ ma̍. Ala̍ ā jɔhā ojōji de wa̍, ala̍ e̍e jɔhā ojōji tū wā ni̍. 15Ala̍ ā wɔ̄wīyā ba̍la āchɛ nīi yɛ ē wɔ̄wīyā ma̍. Ala̍ ā gwe̍ejrīkā ba̍la āchɛ nīi yɛ ē gwe̍ejrīkā ma̍. 16Ala̍ ā gbɛri̍ya̍ tū āchɛmāchɛ wa̍a̍ jɔ̄ɔ̄jɛ̄. Ala̍ e̍e jɛ̄ ɛba̍achɛ ni̍. Ala̍ ā nāa u̍ku̍rɔ̍ nīi - iyī ɔchɔ̍ɔnyɛ ma̍. Ala̍ e̍e gbɛri̍ya̍ ku̍ iyī ala̍ hīka ala̍ ɔ̍lɔ je̍ ka̍ka̍ ni̍.

17Ɔ̄chɛ ge̍ ya̍ wɔ lɛlā abi̍, a ā ya̍ ɔ̄ lɛlā abi̍ ku̍re̍ ni̍. Ala̍ ā chɛ̄rī nīi ala̍ ge̍ yɛ̍ɛ̄lā nīi āchɛ wa̍a̍ nāa bāa lɛlā ɔnɛ̄ɛhɛhi ma̍. 18Ala̍ ā chɛ̄rī gba̍a̍ lɔkɔ nīi ala̍ ge̍ē ya̍ mɛ ma̍ nīi ala̍ ge̍ gblāa la ogbodɔ̍dɔ̍ ba̍la āchɛ wa̍a̍. 19Ala̍ e̍e ku̍ ɔ̄chɛ ure̍ yī lɛlɛ̄lā ni̍, aɛ̍ɛya ami! Ɔkɔkɔ ɔla̍ā, ala̍ ā pi̍ye̍mā nīi Ɔwɔ ge̍ hɛ̍ ɔ̄ lɛpɔ̄ ku̍re̍. Wu̍chē oji̍ nɛ, Īpū yī Ɔwɔ ka ɔ̍lɔ ge̍: “Ɔwɔ ka anɔ̍lɔ ge̍ē ku̍re̍ yī lɛlā! Anɔ̍lɔ ge̍ē kla̍ ɛ̍lɛ ure̍ yī lɛlā abi̍ yī ɛ̍lɛ!” 20Ɔkɔkɔ ɔla̍ā, ala̍ ā ma̍ lɔkɔ nīi Īpū yī Ɔwɔ ka ma̍ gɛ: “Ɛchɛlɛwu̍ yī wɔ ge̍ ku̍ lɛmiyɛ, kɔ̄ ojōre̍ de ɔ̍. O̍ ge̍ ku̍ odīyenyi, kɔ̄ yenyi ɔgwɔ̍ɔ̄gwa̍ de ɔ̍. Wu̍chē oji̍ nɛ, bū la ɔla̍ā nīi a yɛ ē ya̍ ma̍, liwēyī ɔnɔ̄kɔ̄kū nīi a nāa chiya anu̍ a̍nɛ.” 21Ala̍ e̍e chɛ̄ nīi lɛlā abi̍ ɔyɔ̍ɔ̄ya̍ ge̍ nāa wɔhu̍ yī ala̍ ni̍. Ɔkɔkɔ ɔla̍ā, lɛlā ɔnɛ̄ɛhɛhi ɔyɔ̍ɔ̄ya̍ yī ala̍ ge̍ de lɛlā abi̍ ngmo̍.

Currently Selected:

Aliro̍om 12: YBASR

Highlight

Copy