1 Alikɔ̍rīnti 5

Ya̍chi yī lɛlā nīi hɔ̄ la Ogrēeyī yī Āchɛ yī Ɔwɔ ɔla̍ā ma̍

1Lēchi̍, āchɛ yɛ amu ē ka hīka ya̍chi yī lɛlā yī anyā ba̍la angrɔ̄ɔ nīi - ɔ̍lɔ rɛ abɔ̍ɔ lipu̍ yī ogrēeyī yī āchɛ yī Ɔwɔ abɔ̍ɔ la ɛbɛ yī ala̍ ma̍, ɔ̍lɔ de yɔ̍ɔ̄kɔ̄kū kpɛ̍ɛ nīi Ɛchɛkɔcha ɛ̍lɛ i̍ ge̍ē chɛ̄ ya̍ ita ya̍chi yī lɛlā oli̍ngɔ̍ɔ ni̍. E̍ ka de u hīka ɔngrɔ̄ɔ ɔha̍ ma̍ ɔ̍lɔ de ɔnyā yī a̍dā yī ɔ̍lɔ wu̍ hɔ̄ abɔ̍ɔ. 2Ɛba̍achɛ ma̍ ala̍ ē chī jɛ̄ hī iyī ma̍? Ɔkɔkɔ ɔla̍ā, eyīwɔnɔ ngma̍ nīi ala̍ ge̍ē hɛ̍ a̍nɛ. Ala̍ ā de ɔ̄chɛ nīi ya̍ ita ya̍chi yī lɛlā ɔla̍ā ma̍ wu̍ligbo̍ hī lipu̍ yī ala̍. 3Ami ɔlɔjā, n hɔ̄ɔ̄hɔ̄ hwɛɛ hī ala̍ nyaa ma̍, n hɔ̄ abɔ̍ɔ ba̍la ala̍ la uhu. Bū la riyī yī Iji̍sɔ̄ɔsi nīi - Ādādā yī alɔ wa̍a̍ ma̍, n de lɛpɔ̄ ku̍ ɔngrɔ̄ɔ nīi yɛ̍ɛ̄lā okwi̍bi̍īyē grigri ɔla̍ā ma̍. N ya̍ i̍ngɔ̍ɔ bɔ̄ɔjā nīi hɔ̄ abɔ̍ɔ ba̍la ala̍ ma̍. 4Ala̍ wa̍a̍ ge̍ē grēeyī nīi ami titi chī ge̍ē hɔ̄ abɔ̍ɔ ba̍la ala̍ la uhu ma̍, Iji̍sɔ̄ɔsi nīi - Ādādā yī alɔ wa̍a̍ ma̍ hɔ̄ abɔ̍ɔ tāa alɔ. Bū la wɔhu̍ yī Iji̍sɔ̄ɔsi nīi hɔ̄ abɔ̍ɔ ma̍, 5ala̍ tu̍labɔ̄ hī ɔngrɔ̄ɔ ɔ̍lɔma̍ de Isa̍tan nīi o̍ ge̍ de ibi̍īyē yī ɔ̄chɛ ɔla̍ā chāajɛ, hɛ̄ɛbɛ nīi uhu yī nū ge̍ lɛ ɔhɛ̍ta̍ la Ɔ̄chī ɔla̍ā nīi Ādā ge̍ē wā ma̍.

6O̍ i̍ ngma̍ lɛbɛ nīi ala̍ ē jɛ̄ ɛba̍achɛ i̍ngɔ̍ɔ ni̍. Je̍ka aa̍ ala̍ plɛ̍ɛ̄lā ɔha̍ nīi e̍ ka ma̍: “Ɔjā obī ibrɛ̍ɛdi nōnū ge̍ lɔ̄lɛ bāa opi̍nyɛ̍ ma̍, anu̍ ē ya̍ nīi ɛjā nīi e̍ de ti̍yatū ge̍ē ya̍ ibrɛ̍ɛdi ma̍ ē nōnū pu̍tu̍pu̍tu̍ a̍nɛ” 7Ala̍ ā de lɛlā ɔdwɔ̄bi̍ ɔyɔ̍ɔ̄ya̍ nīi lɛ bāa ɔjā obī ibrɛ̍ɛdi nōnū nīi - ɔnɛ̄chɛ̄ ma̍ wu̍ ta̍anū gɛ, hɛ̄ɛbɛ nīi ala̍ ge̍ de lɛ chra̍da̍da̍ gɔ̄grāa. Bū la ɛbɛ ɔla̍ā, ala̍ ge̍ē de ē lɛ bāa ɔjā nīi e̍ de ti̍yatū yɛ ge̍ē ya̍ ibrɛ̍ɛdi nīi i̍ tū ɔjā obī ɔ̄ nōnū ni̍ ma̍. N u̍tu jo̍ōkū mɛ̍ hīka i̍ngɔ̍ɔ ke̍e̍ nīi ala̍ lɛ a̍nɛ. Wu̍chē oji̍ nɛ, yɛ̄grāa yī Ɔwɔ̄wīyā yī Owu̍lā yī alɔ de gbajɛ mɛ̍. E̍ de Ikra̍yisi ngmo̍ mɛ̍. Anu̍ - ɔyɔ̍ɔ̄nyīyɛrɔ̄ yī alɔ bāa onīi e̍ ē ngmo̍ la yɛ̄grāa yī Ɔwɔ̄wīyā yī Owu̍lā ma̍ a̍nɛ. 8O̍ lɛ i̍ngɔ̍ɔ ma̍, alɔ ā re̍ Ɔwɔ̄wīyā yī Owu̍lā yī alɔ ɔ̍lɔma̍ gɛ! Alɔ ā e̍e bī ibrɛ̍ɛdi nīi tū ɔjā obī ɔ̄ nōnū nīi - ɔnɛ̄chɛ̄ ma̍ ya̍ ni̍. Wu̍chē oji̍ nɛ, ɔla̍ā lɛ bāa ɔjā obī lɛlā ɔdwɔ̄bi̍ ba̍la lɛlā abi̍ ɔyɔ̍ɔ̄ya̍ nōnū ma̍. Ɔjā nīi alɔ ge̍ē bī ya̍ ɔwɔ̄wīyā nūma̍ ma̍, ibrɛ̍ɛdi nīi i̍ tū ɔjā obī ɔ̄ nōnū ni̍ ma̍ nɛ. Wu̍chē oji̍ nɛ, anu̍ kwichi̍ tāa ɔlɛcha̍ri̍cha̍ri̍ ba̍la olēchi̍ lēchi̍ yī lɛlā a̍nɛ.

9Lipu̍ yī īpū ɔla̍ā nīi ta̍ tɛ̄rɔ̄ hu ala̍ ma̍, n ta̍ ala̍ ɔna hīka ala̍ e̍e trīibi tāa āchɛ nīi ē yɛ̍ɛ̄lā ya̍chi yī angrɔ̄ɔ ba̍la anyā tāa iyī wā ma̍ ni̍. 10I̍ āchɛ nīi i̍ je̍ Ɔwɔ we̍ ni̍ nīi ē yɛ̍ɛ̄lā ya̍chi i̍ngɔ̍ɔ ba̍la iyī wā, kɛ̄ɛ ē ya̍ ānyānyi, kɛ̄ɛ ē wūwī, kɛ̄ɛ ē pā ɛchi̍yɛka ma̍ nīi n yɛ ē ka a̍ni̍. Ɔ̄chɛ ge̍ bli̍kpo̍ ge̍ē gwō gbo̍o̍ ē hī āchɛ eli̍ngɔ̍ɔ, a ge̍ē ku̍ pīya ē hī yɛchɛ nūma̍ ligbo̍ ligbo̍. 11Onīi ami yɛ ē ka ma̍, ɔ̄chɛ nīi hī iyī nū ka anɔ̍lɔ - ɔɔ̍nɛ̍ yī ala̍ gala abɔ̄ yī Ikra̍yisi ma̍ nɛ. Ɔ̄chɛ oli̍ngɔ̍ɔ ge̍ yɛ ē yɛ̍ɛ̄lā ya̍chi yī anyā ba̍la angrɔ̄ɔ, kɛ̄ɛ ē ya̍ ānyānyi, kɛ̄ɛ ē pā ɛchi̍yɛka, kɛ̄ɛ ē bīya riyī yī āchɛ, kɛ̄ɛ ē gwa̍ ɔjā ka̍ka̍ ē de ē wɔ̄wīyā, kɛ̄ɛ ē wūwī, ala̍ e̍e trīibi tāa anu̍ ni̍. Ala̍ e̍e tābɔ̄ yī ojōre̍ ba̍la ɔ̄chɛ oli̍ngɔ̍ɔ o̍bo̍bū ni̍.

12- 13Ɔna̍ u̍tu iyī u, nīi n ge̍ē hɛ̍ alyɛchɛ nīi i̍ tū tāa alɔ ni̍ lɛpɔ̄ ma̍/? Ɔwɔ ɔlɔjā ge̍ē hɛ̍ wā lɛpɔ̄ a̍nɛ. Āchɛ ɛla̍ā chī tū lipu̍ yī ogrēeyī yī ala̍ ma̍, ala̍ ge̍ē hɛ̍ wā lɛpɔ̄. Wu̍chē oji̍ nɛ, Īpū yī Ɔwɔ ka i̍ngɔ̍ɔ hīka, “Ala̍ de ɔ̄chɛ ɔdwɔ̄bi̍ wu̍ligbo̍ hī lipu̍ yī ala̍.”

Currently Selected:

1 Alikɔ̍rīnti 5: YBASR

Highlight

Copy