1 Alikɔ̍rīnti 4

Alɔ - alɛrɔ̄ yī Ikra̍yisi nɛ

1Ala̍ ge̍ē gbɛri̍ya̍ ē tū alɔ ma̍, ala̍ gbɛri̍ya̍ tū alɔ bāa a̍chɛ̍ yī Ikra̍yisi ma̍. Alɔ - āchɛ odeyīrɛ lɛlā olēchi̍ lēchi̍ yī Ɔwɔ nīi - lɛlā ɔtrɛ̍ba ma̍ a̍nɛ. 2Ɔjā ūkpo̍he nīi ngma̍ nīi ɔ̄chɛ odeyīrɛ lɛlā i̍ngɔ̍ɔ ge̍ lɛ ma̍, ɔya̍ lɛbɛ nīi abā yī nū ge̍ de ɔtū che ɔ̍ nɛ. 3N i̍ hi̍yɛ̄ngura hīka ala̍ hɛ̍ u lɛpɔ̄ mɛ̍, kɛ̄ɛ āchɛ hɛ̍ u lɛpɔ̄ gala ɔgɔgu yī lɛlā yī āchɛ̄ɛchɛ mɛ̍ ni̍. Ami ɔlɔjā i̍ ē de hɛ̍ iyī u lɛpɔ̄ o̍bo̍bū ni̍. 4Ūkpɔ̄tū yī u lɛ u bāa ɔchra̍da̍da̍ ma̍. Ɔla̍ā i̍ chī re̍ka n i̍ gblɛfiyɛ yī lɛlɛ̄lā ni̍ ni̍. Ādā ɔlɔjā ē hɛ̍ u lɛpɔ̄ ē mɛ a̍nɛ. 5Wu̍chē yī ɔla̍ā, ɔ̄chɔ̄chɛ ge̍ e̍e hɛ̍ ɔ̍nyīnū lɛpɔ̄ i̍ngɔ̍ɔ o̍bū nīi yɛ̄grāa kpakpa ge̍ gbajɛ ni̍. Lɛpɔ̄ ɔhɔ̍ɔ̄hɛ̍ ogwīihi nūma̍ ge̍ lā gbo̍ ɔ̄chī nīi Ādā ɔlɔjā ge̍ē wā ma̍. Lɛlā ɔtrɛ̍ba yī āchɛ̄ɛchɛ ɔha̍lɔha̍ wa̍a̍ nīi - ɔdwɔ̄bi̍ ma̍, Ādā ge̍ē de ɔ̍ ē lā yɛchɛ gēdēgēdē. Ɛri̍ya̍ yī lɛlāha̍ ɛlāha̍ wa̍a̍ nīi trɛ̍ba la ūkpɔ̄tū yī āchɛ ma̍, o̍ ge̍ē de ɔ̍ ē lwāa ē ta̍āpāapɛ̄. Yɛ̄grāa ɔla̍ā bɛ̍ɛ̄nɛ̄ ma̍, Ɔwɔ ge̍ē de ɔkɔ̄kā nīi ngma̍ la ɔ̄chɛmɔ̄chɛ ma̍ ē de ɔlɔjā.

6Aɛ̍nɛ̍ yī u, lɛlā nūma̍ wa̍a̍ nīi n yɛ ē ka ma̍, n nāa Apo̍lōosi ba̍la ami ɔlɔjā bāa igbla yī lɛlā ma̍ wu̍chē yī ala̍. N ya̍ i̍ngɔ̍ɔ hɛ̄ɛbɛ nīi ala̍ ge̍ ē je̍ “ɔgu yī lɛlā ɔlamu ɔlamu” lɔkɔ nīi e̍ ka ma̍. Ɔ̄chɔ̄chɛ lipu̍ yī ala̍ ge̍ e̍e wɔ̄wīyā wu̍chē yī ɔ̄chɛ ɔha̍, chōo̍chē chi̍hi̍ya̍ yī ɔ̄chɛ ɔha̍ ni̍. 7Ɔ̄nyɛ de ala̍ pīya āchɛ ɔlamu ɔlamu hi̍ āchɛ ehēhī ma̍? Je̍ka Ɔwɔ kɔ̄ ɔjāha̍ ɔjāha̍ wa̍a̍ nīi ala̍ lɛ ma̍ de ala̍ a̍nɛ? Kana̍ bɛ̍ɛ̄nɛ̄ nīi ala̍ chōo̍chē ge̍ē bī gbogū i̍ngɔ̍ɔ bɔ̄ɔjā nīi e̍ i̍ kɔ̄ ɛjā ɛla̍ā ɔkɔ̄kɔ̄ de ala̍ ni̍ ma̍?

8Ala̍ ma̍, ala̍ de lɛ ɔjāha̍ ɔjāha̍ wa̍a̍ nīi ku̍ ala̍ ɔkɔ ma̍ mɛ̍. Ala̍ de gbwɔdu mɛ̍. Ala̍ chī de pīya ɛchwɔ̄lɛ̍ ke̍e̍ mɛ̍. Alɔ ma̍ i̍ chī lɛ i̍ngɔ̍ɔ ni̍. O̍ ngma̍ nīi ala̍ ē de pīya ɛchwɔ̄lɛ̍ i̍ngɔ̍ɔ ichɛ̄ɛhi, hɛ̄ɛbɛ nīi alɔ titi ē de ē pīya ɛchwɔ̄lɛ̍ ba̍la ala̍. 9O̍ lɛ u bɔ̄ɔjā nīi Ɔwɔ de ɛbɛ nīi bi̍hi ka̍ka̍ ma̍ de alɔ āchɛ nīi - alɛrɔ̄ yī nū ma̍. Alɔ lɛ bāa āchɛ nīi e̍ hɛ̍ wā ɔpīyaku̍ nīi e̍ ge̍ē ngmo̍ wā la ɔgbādu ma̍. Alɔ lɛ bāa lɛbi̍ ɔma̍ bī kɛlā ku̍ ma̍ de yɛchɛ yī ayɛ̍ɛ̄chɛ̄rɔ̄ nīi - uhu ma̍ ba̍la āchɛ̄ɛchɛ wa̍a̍. 10Wu̍chē yī Ikra̍yisi, alɔ de pīya ali̍bobo; ala̍ ma̍ chī de jyɛ̍ɛ̄lā i̍ngɔ̍ɔ ke̍e̍ bū la Ikra̍yisi mɛ̍. Alɔ lɛ kwīkwī; ala̍ ma̍ lwɔhɔ̍hu̍. Āchɛ ē chi̍hi̍ya̍ yī alɔ; ala̍ ma̍, e̍ ē tū ala̍ lichō. 11Kpɛɛ ku u̍ma̍ama nūma̍, alɔ de ku̍ lɛmiyɛ, de ku̍ odīyenyi; alɔ yɛ amu ē gāa la a̍chiyɔ̄pa̍ la ohi̍; āchɛ ē gwō alɔ lijē ji bɛ̍ɛ̍; alɔ ē gāa bɛ̍bɛ̍ ta̍ ɛbɛbɛ ē ta̍. 12Alɔ ɛlɛjā ya̍ u̍ku̍rɔ̍ o̍bū bī iyī alɔ a̍nɛ. Āchɛ ge̍ jɔhā tū alɔ, alɔ ē de ɔpiyɛ ē de wa̍. E̍ ge̍ ya̍ alɔ ichi̍, alɔ ē mlɔtū kpɔ̍ɔ̍. 13E̍ ge̍ chī pra̍a alɔ ɛcha̍, alɔ ē hīya aa̍ ɔkɔ bāa ɔyaya ma̍. Alɔ de ya̍ bāa limū okpo̍ chīyenū ma̍; alɔ lɛ bāa ɛrwɔ̄ ma̍, amu la yɛchɛ nūma̍, kpɛɛ ge̍ ku u̍ma̍ama nūma̍.

14N i̍ yɛ ē ta̍ īpū nūma̍ tɛ̄rɔ̄ hu ala̍ hɛ̄ɛbɛ ge̍ē de liwēyī de ala̍ ni̍. Ɔya̍ hɛ̄ɛbɛ ngū ala̍ lɛlā bāa ayi̍ yī u lēchi̍ lēchi̍ ma̍ nɛ. 15Wu̍chē oji̍ nɛ, ala̍ ge̍ lɔ̄lɛ āchɛ u̍nɔ ohu nīi yɛ ē gbō ala̍ ogbōgbo la ɔpɔ̄pū yī Ikra̍yisi ma̍, ɔ̄chɛ ūkpo̍he chī - a̍dā yī ala̍ a̍nɛ. Bū la ɔpɔ̄pū yī lɛlā yī Ikra̍yisi, ami re̍ka a̍dā yī ala̍ a̍nɛ, bū la Wɔ̄kā Ɔlwɔnyɛ yī Ɔwɔ nīi bī wā ge̍ de ala̍ ma̍. 16Ala̍ chu̍chu̍u, ala̍ ā yɛ̍ɛ̄lā gala ɔgɔgu yī u. 17Wu̍chē yī ɔla̍ā, n de Iti̍mōti tɛ̄rɔ̄ yɛ abɔ̍ɔ yewā dikpo̍ ē ba̍ ala̍. Ɔyi̍ yī u lēchi̍ lēchi̍ nīi n de ɔtū che ɔ̍ la abɔ̄ yī Ikra̍yisi nɛ. O̍ ge̍ē ngū ala̍ ɔgulɛ̄lā nīi n ē ya̍ la ɔhɔ̄leyī onīpīpɛ̄ nīi n hɔ̄ la Ikra̍yisi Iji̍sɔ̄ɔsi ma̍. O̍ ge̍ē ka ē de ala̍ wa̍a̍ lɔkɔ nīi n yɛ amu ē ngū ogrēeyī āchɛ yī Ɔwɔ yɛ̄mɛ̄mɛ̄ lɛlā i̍ngɔ̍ɔ wa̍a̍ ē ta̍ ɛbɛbɛ e̍ ta̍ ma̍.

18Āchɛ ɛha̍ yī ala̍ gblāa abɔ̍ɔ ē jɛ̄ ɛba̍achɛ. E̍ je̍ka amɔ̍lɔ i̍ ge̍ē wā ge̍ē ma̍ ala̍ gɛ ni̍. 19Ɔwɔ ge̍ chɛ̄, n ge̍ē wā dikpo̍ ē ba̍ ala̍ lipu̍ yī ɔ̄chī ɛpɛpa nūma̍. Bū la ɛbɛ ɔla̍ā, n ge̍ē ma̍ la abɔ̄ yī u, ɔjā nīi alɛba̍achɛ ɛla̍ā ge̍ē ya̍ mɛ ma̍. I̍ ɔjā nīi e̍ ge̍ē ka la oko̍o ma̍ ke̍e̍ nīi n ge̍ē ma̍ a̍ni̍. 20Wu̍chē oji̍ nɛ, Ɔchwɔ̄lɛ̍ Oro̍ōre̍ yī Ɔwɔ, i̍ lɛlā ɔkɔ̄ka re̍ka ɔka̍ka̍ a̍ni̍. Wɔhu̍ yī nū - ɔka̍ka̍ a̍nɛ. 21Ɔna̍ nīi ala̍ ka̍a chikpo̍ ma̍ oo? N ē wā dikpo̍ba̍ ala̍ la a̍grɛ̄chi̍ la abɔ̄ kɛ̄ɛ n ē wā la ūkpɔ̄tū ɔlɛmlɛ̍ɛ̍ ba̍la ɔhɔtū?

Currently Selected:

1 Alikɔ̍rīnti 4: YBASR

Highlight

Copy