Okwan 5
5
1Mú onyinchéng o-faa o/fu,
onet-kyijé ne ókyî ejí,
me nn/nung ké kyifát ejí.
Me mu m-bú ng esang-kasu ejí,
ne mu n-chi i burwan ejí ḿbú badakó mîi.
Me mu n-rû ng bakút-bukwan ejí
ne mu n-ryí i biǐsâ-bukwan.
Me mu n-jwáp ng bato ejí ne abî-mpong ejí.
Ḿbé banyinyi ba-faa ba/fu,
bákyî eten, ryí n̂g ba-jwáp tete ba-kpet ebwóm.
Ekwan Enyii
Mú onyinyi o-faa o/fu,
2nkéré mu n-rê ng,
dyityém ejí dyi*fí dyi-rê ng*.
Me n/ri burê ké ókyî ejí o/kíbî dyifyi.
Mú onyinchéng o-faa o/fu,
onet-kyijé ejí ne ókyî ejí,
mú amu mě wǎ karúú,
mîng mě m-bâ ké kafâ.
Kyibû kii/cok mě dyishí,
ne eji ejí ee/gbodok kyibû.
Mú onyinyi o/chîfaa o/fu,
3me mm/pii byídí,
ebóng ńkyí me ndachîbwá byídí.
Me nn/soo byiká ejí,
ebóng ńkyí ndachîchi kámbyí byi-firi ne babat.
4Ókyî ejí o/tan bubwô ké dyifyi,
ne kyi/nyîn mě ké nyǐ mu fáráng.
5Me m/mû mm/kpá byiko ḿbyí nda ǎ ekuu dyifyi.
Burwan ḿbú badakó mîi bu/mû boo/cít mě abwô,
ne bu/mû boo/nyange bu-cít mě efwa,
ké nkéré n/níbî kiǐré-dyifyi.
6Me n/kuu ókyî ejí dyifyi,
nké nyǐ oo/dim.
Me m/mû n-ryuu ng kanong kanong n/fu,
n-jwo ng ejá emen.
Me n/kyé ǎ, nké n*da ǎ eri*.
Me n/kó ǎ, nké n*da/jwo ojá*.
7Banet ḿbé mbe ba-bám m oshê ba/ri mě.
Mbé ba/díp mě, ba-némê mě, ba-koo mě kyídí.
8Banyinyi-Jerúsélem, ryí n̂g mě ocím ba/fu,
â ben ba/ri ókyî ejí, ben ba/chi ba-sét ǎ ba/fu,
me kyijé kii/man mě busa.
Ḿbé banyinyi ba/chîfaa ba/fu,
9onyinyi mú o/nwa bunong o-shwôm kángkáng banyinyi,
ókyî eyên o/yángê ne banet ḿbé áku?
Ebóng kiǐtí-chwǒm ńkyí nyǐ mu ne nkyí,
ńkyí be byida ǒ eryí ocím.
Mú onyinyi o/chîfaa o/fu,
10ókyî ejí mu o-nwa ng bunong ne mu ne busa.
Ké égot-banyinchéng nyí ee*nwa epan* a-ri ng obónge kǎnchí.
11Bushú emen mbu bu-san n wǎ borôn,
ne mbu gogégogé.
Eji emen nyi fyíryifyíryi,
ne nyi e-jîi ng wǎ obáng.
12Achi emen nyi a-nwa ng bunong
wǎ burúú ḿbú mbu ké bukô-booce,
burúú ḿbú ba/kôo kámbú omu ké abî-mpong [ne mbu ké bukô-buce.]
13Ánán emen nyi a-nwa ng wǎ kyifát ńkyí kii/sú ne byíkwôn ḿbyí byidanyîn kyinung.
Byibî-ocím emen mbyi wǎ ekong-biǐbyâa nyí e/nwa
ne burwan ḿbú badakó mîi boo/nyange bu-cok kámbyí.
14Osówo o/man ǎ emee abwô,
ne nyǐ mu o-fâ ékpâl nyí ba/fé aká nyí adashwane kasî.
Enyam-byiko emen nyi [wǎ asháng-eshwa nyí gogégogé,]
ne ba/fé aká nyí ragerage ké nyǐ.
15Ánán emen nyi wǎ byikwap ḿbyí ba/chi ké biǐkpárádádát-aká ḿbyí badakó alabása,
ḿbyí ba/chi byikû ne ashí ebe ké gûl.
Nyǐ o/rêe wǎ eku nyí Lebánon ne biǐcóróng-byichí ebe.
16Byibî-ocím emen byi-nyîn n enyám.
Kángkáng byěm byi-kim ne nyǐ byi-nyîn n mě.
Banyinyi-Jerúsélem, éné nké ókyî ejí mu.
Currently Selected:
Okwan 5: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
