Okwan 4
4
1Mú onyinchéng o-faa o/fu,
onet-kyijé ejí, wo amu a-nwa ng kanong kanong.
Achi eyên nyi a-san n ne kyijé ké dyifít-kyídí-bushú eyên ecít.
Eji eyên nyi a-náng ng wǎ dyibóng-ebû
ńdyí ndyi dyi-shû ng eku nyí Gyílet.
2Asháng eyên nyi a-cé ng wǎ etám-ebû
nyí baa/pwát kányí eríp kántîk ba-kôo kányí omu.
Busháng bu*fí nang bubónge ḿbú boo/zûu bu-tánê*.
Nyǐ amúmú a/tyeem kerededet.
3Byibî-ocím eyên mbyi wǎ bucat ḿbú shíshét,
nang ké byidanwa bunong ké nkéré a-kú a-raa ng kyiraa.
Ánán eyên nyi a-san n ké kafâ-kaǎsém eyên ńké a/cít.
4Kyitông eyên nkyi wǎ kiǐnyáám-kyise-mbâm ńkyí Otu Dívit.
[Nkyí nkyi gogégogé] ne byibwáng-kyitông wǎ égot-édem etánge nké ba/kpong ké nkyí.
5Abî eyên nyi wǎ bwǎn-etong ḿbé ba/fwon kámbé afúng
ne mbe ba-ryí i byiryíng ké biǐbyâa.
6Me n/chi n-kyú ké kaku ńké burwan ḿbú badakó mîi
ne ḿbú badakó faránkínsen
tete bufú ḿbú dyicófóróng bu-tugi tete kyifip kyi-man.
7Onet-kyijé, wo amu a-nwa ng bunong kanong kanong
ne wo amu kerededet.
8Ókyî ejí, fím ké eku nyí Lebánon a-bâ ne me ké kyikû.
Shû kyíbóng-eku nyí Lebánon a-bâ ne me.
Shû kyíbóng-eku nyí Ámana ne nyí Séne ne nyí Hémon,
nyí ekpang nyi e-kyú u.
9Onet-kyijé ne ókyî ejí,
achi eyên ne byibwáng eyên ḿbyí a/fé ké kyitông bii/chi mě n*fí to m-man n ekám byiko*.
10Onet-kyijé ne ókyî ejí,
kyijé eyên nkyi kyi-kyâ mě bunyîn-dyityém.
Kyijé eyên nkyi kanong kyi-shwôm bato.
Bakút ḿbé eyên mbe ne kyinung ba-shwôm nang bará.
11Onet-kyijé ejí, wo amu ne bunyîn-bakút-bukwan ké byibî-ocím eyên.
Kabyíbabang eyên nke mě wǎ abî-mpong ne bakút-bukwan.
Byídí eyên mbyi ne kángkáng kyinung-bakút-kyinung ḿbé Lebánon.
12Onet-kyijé ne ókyî ejí mu wǎ kyifát ńkyí nkyi remê,
ńkyí ba/bi ekpe ba-wâng kánkyí.
Mu wǎ kaace ńké nke remê.
13Ányi nké byichí mbyi byi-kán n.
Mbyí mbyi byi-kán n wǎ dyijî-byichí ḿbyí badakó pamagáránat
ne mbyi byi-zím m byirim ḿbyí mbyi byi-nwa ng kanong kanong.
Byichí ḿbyí badakó héna ne nât,
14ne sáforon ne kálamus ne sínamon
nang burwan ḿbú dyizong nang dyirá byi*fí ké bukaa*.
Byichí ḿbyí badakó mîi ne ḿbyí badakó álos mbyi byi-kán n ányi
cibicibi ne kángkáng byichí ḿbyí byidanyîn kyinung.
15Wo a-chi i kyifát ńkyí omu mu o-byí i
ne dyijwáng ńdyí omu mú okpó
ne buce ḿbú mbu bu-fím m ké Lebánon bu-sen n bu-câ.
Mú onyinyi o/chîfaa o/fu,
16bufú ḿbú mbu bu-fím m bushûyû, bûu.
Bufú ḿbú mbu bu-fím m busyísen,
tugi ké kyifát ejí.
Chi bufú bu-sú ne kyinung-bakút-kyinung.
Mîng ókyî ejí o-bâ ké kyifát emen o-ba-ryí byirim-byichí ḿbyí byinong byinong.
Currently Selected:
Okwan 4: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
