Okwan 2
2
1Me n*fí chwǒm kyikíri* kyi-cibi ne ekong-byichí nyí nyi ké Sháron*
ne ekong-kiǐbyâa nyí nyi ké ewo*.
Mú onyinchéng o-faa o/fu,
2onet-kyijé ejí mu ké burwám-banyinyi
wǎ ekong-kiǐbyâa nyí nyi ké byiwong.
Mú onyinyi o/chîfaa o/fu,
3onet-kyijé ejí mu ké burwám-banyinchéng
wǎ dyisín-kyichí ńkyí badakó ápil,
ńkyí nkyi ké burwám-byichí ḿbyí ké dyikán.
Me nkyi kyi-nyîn n mě ekyú ké kiǐríribí-kyichí ánkyi,
ne byirim emen mbyi byi-nyîn n mě ké ocím.
4Nyǐ o/bê ne me ké ócâm-dyijî emen
ne o/tông mě kyijé kanong kanong.
5Kye mě byirim-byichí ḿbyí badakó rézen n-ryí n-chîfiri ne busa,
a-kye mě byirim-byichí ḿbyí badakó ápil n-ryí enyam-byiko ejí e-bâa,
ké nǎ, kyijé eten echi kii/koo mě busa.
6Bubwô-eku emen mbu mě ké dyishí
ne bubwô-etyebéng emen mbu bu-tare ng mě ké byiko.
7Banyinyi-Jerúsélem, ryí n̂g mě ocím ba-sem ké dyizîn ńdyí enyam nyí edakwáng e-shwôm wǎ etong ba/fu,
ben baa*ba/chi ba-két bě kyijé eten echi*.
Nnyinyěng-Okwan
Mú onyinyi o/chîfaa o/fu,
8me mu n-jwo ng ejá nyí onet-kyijé ejí.
Nyǐ mu o-zóngê e o-pyiryi ng eku o-bâ o-kâm mě.
9Onet-kyijé ejí mu wǎ etong,
mu wǎ kyisu-otyép-enyam ńkyí kyidakwáng kyi-shwôm.
Nyǐ nké mu áku cip ké bukô-ekpe.
Nyǐ mu o-tún n ké mbwo-kyise.
10Onet-kyijé ejí mu o-pem m ne me.
Mú onyinchéng o-faa o/fu,
onet-kyijé ejí, bâ kâng.
Bâ ne me ké kyikû, ǎ onet-kyijé ejí.
11Kyifang kii/shwôm, baǎmú baa/mîng ena,
12ne ekong-byichí ké dyikán ee/paam.
Nyín nkéré mú ekwan ekwán.
Banet mbe ba-jwo ng ekwan nyí ámalê ké dyikán.
13Byirim-byichí ḿbyí badakó fyîk bii/kpet ebwam.
Bufú boo/sú ne kyinung ńkyí ekong-byichí nyí nyi e-byí i.
Onet-kyijé ejí, bâ kâng.
Bâ ne me ké kyikû, ǎ onet-kyijé ejí.
14Wo amu wǎ karúú ńké nke ka-rem m kyikit-buká bu/járê.
Mîng mě n-ri bushú eyên ḿbú bunong bunong
n-jwo ejá eyên to nyí edanyîn.
15Kám enyam nyí nyi e-bên n bě ekong-byichí nyí nyi e-byí i ké byifát eten.
Mú onyinyi o/chîfaa o/fu,
16onet-kyijé ejí o/já mě, ne me to n/já ǎ.
Nyǐ mu o-nen n ebû emen ké biǐbyâa,
17tete bufú-dyicófóróng bu-kpet etugi
tete kyifip to kyi-rím.
Bwa esim, ǎ onet-kyijé ejí,
wǎ kyisu-otyép-enyam ńkyí kyidakwáng kyi-shwôm,
ńkyí nkyi ké [eku nyí Béta.]
Currently Selected:
Okwan 2: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
