Okwan 1
1
1Okwan [mú Otu Sólómon] mú mu o-nyîn n o-shwôm ekwan kángkáng.
Mbwôp Kashú-Okwan
2Mú onyinyi o/fu,
fé mě byibî-ocím eyên ké ocím ejí.
Kyijé eyên nkyi kanong kyi-shwôm bato.
3Wo amu ne bunyîn-dyityém ké byiko.
Dyikô ńdyí dyizîn eyên ndyi dyi-chi i mě n-zîim kánkyí.
Onyinyi o*fí mú wo aa*jê ǎ*.
4Yip mě n-dim ne wo,
ne be byi/chi byi-chêe.
Firi otu ejí, a-kúng mě n-nung ké nfût eyên.
Byi/chi byi-kyú ké bunyîn-dyityém,
byi-nung ké kyijé echi ńkyí kyidanyîn kyi-shwôm bato.
Éné nké amu a-jê ng kángkáng banyinyi.
5Banyinyi-Jerúsélem, me mu n-jîi ng,
[nké] me mu n-nwa ng bunong
wǎ bampyep ḿbé banet ḿbé Kéda ḿbé ba/bi ké byídí,
ne wǎ ékpígí nyí kyise ńkyí Otu Sólómon.
6*Da mě ekúng dángé ké enyam-byiko ejí*
ké nǎ, esû ee/shí mě*.
Bwǎn-bané ejí ḿbé banyinchéng ba/mû ba-sa ng kafâ ne me
ne ba/chi mě n-chi bǎmkpóngé ké kyifát.
Me m/mû n*fí ne nkéré mú ndatún byiko ejí*.
7Onet-kyijé ejí, sét mě,
wo a-jâ kyicê kyirá ne ebû eyên e-da-ryí baryî.
Nyǐ e-jáng ng nyá ké nkéré esû ee/kán.
[Ebóng ńkyí me n/chi n-kyé ǒ ké burwám-ebû nyí bambâm ebû bakíri.]
Mú onyinchéng o-faa o/fu,
8onyinyi mú o/nwa bunong o-shwôm bábe-banyinyi,
wo a*fí a-nyît ng kyikit dí*.
Ca a-cen ne ebû ké kyikû a-kyé kyikit-baryî ńkyí ebû eyên edaryí fáráng ne bampyep ḿbé bambâm ebû.
9Wo, ǎ onet-kyijé ejí,
amu a-chi i banyinchéng byiko byi-dim kámbé
wǎ buma-kabyî-orá budachi byiko byi-dim batyép-bubyî-orá
ḿbú mbu bu-tut ng bamútu ḿbé otu mú Éjip.
10Eji eyên nyí nyi ǒ reberebe ké kyitông eyên
wǎ byibwáng nyi e-nwa ng kanong kanong.
11Ba/chi ba-chi ǒ kiǐré-gûl ba-fé to byibwáng-syílyíba ké nkyí.
Mú onyinyi o/chîfaa o/fu,
12otu ejí o/mû sáre ké karíng emen,
ne bakút-kyinung ejí ba/mû ba-châ kyinung.
13Onet-kyijé ejí mú o/rí mě ké kakim mu ne kyinung-bakút ḿbé badakó mîi.
14Onet-kyijé ejí mu wǎ ekong-byichí nyí enong
nyí nyi ké byifát ḿbyí Ngédyi.
Mú onyinchéng o-faa o/fu,
15onet-kyijé ejí, wo amu a-nwa ng búsé kanong kanong.
Achi eyên nyi a-san n ne kyijé kanong kanong.
Mú onyinyi o-chîfaa o/fu,
16onet-kyijé ejí, wo amu a-nwa ng kyisat kanong kanong
ne amu a-chi i kyi-nyîn mě kanong kanong.
Biǐbyâa byi/chi byi-kyú bě karíng.
17Byichí ḿbyí badakó séda byi/chi byi-kyú bě mbwôm-kyise
ne ḿbyí badakó sápurus byi-kyú bě efang-kyise.
Currently Selected:
Okwan 1: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
