Ekyilyizátes 12
12
1Ké bubwô ámbu, zîim m̂ Osówo mú o/chi běn ké nkéré mú ba/tôong bwǎsíng, ne byibî-ací byi-kûbê, ne aje a-kûfárâng nyí ben ba/chi ba-raa ba/fu, dyikpen ejí dyi*fí to dyi-nyîn n mě*. 2Ányi nké kiinwángé ńkyí esû ne ńkyí otukáku ne ńkyí ékpére kyi/chi kyi-firi ǒ kyifip wǎ bubóng-kyifang. 3Nkéré ámu kâng nké abwô eyên nyí a/mû a-ku ng ǒ a/chi a-kûtím banê, ne byiká eyên ḿbyí byi/mû shwanshwan byi/chi byi-firi kyeekyee. Asháng eyên aa*ba/chi a-chîjê nyí adasám byiryíng eyên* ne achi eyên a-firi ng bimê aa*ri to kanong*. 4Atông eyên aa*ba/chi a-chîjwo kyicoge ńkyí ké ótíbingé*. Aa*ba/chi ba-chîman ejwo kyirime kanong* ńkyí buká-ókáre* nang ane nyí mbe ba-kim m* nké nang kyiraa ńkyí kanurung kyi/chi kyi-jwóbê ǒ ké burê. 5Wo a/chi a-kûshî byikit ḿbyí mbyi nyáám, ne bucen bu/chi bu-firi ǒ kyibî-chwǒm. Eji eyên e/chi e-yángê e-firi ébyî ébyi, ne aa*ba/chi a-chîman etín a-cen a-ca* ne byěm eryuu kángkáng byi/chi byi-man.
Be kángkáng byimu byi-wâa ng ké oshê-bakúsí, ne banet ba/chi ba-kûtii ké étíbingé. 6Mgbokobá-kiǐré mú ba/chi ké syílyíba o/chi o-sît, ne otyuryíkáng mú ba/chi ké gûl o/chi o-róng kyísí o-sêe, ne katí-omu ka/chi ka-sêe. 7Enyam-byiko eten e/chi e-bwa esim ké ecing, ne kiǐnjáng-dyikpen eten dyi/chi dyi-bwa dyi-kâm Osówo mú o/kye bě kándyí.
8Onet mú o/kwâa byiraa-bubong o/fu, ńkyín kyi*da/byí chwǒm*. Kángkáng byi*da/byí chwǒm*.
Ké Nkuli Kyikû
9Nké ké bubwô ḿbú onet mú o/kwâa byinyídíng mu ne bubong, nyǐ o/ce kashú mu o-tángê e banet ńkyí nyǐ mu o-nyît ng. Nyǐ o/kwâa atím-ekan ne o/kan kányí o-ri ntûntû mú mu ké atím-ekan ányi. 10O/kan ekyé ejá-byiraa nyí edachee dyityém, nké ejá-byiraa nyí nyǐ o/sáng nyi ntûntû. 11Ejá-byiraa nyí banet-bubong nyi wǎ buchí ḿbú badatín bampong ba-ca ké ochíchí-kyikit, ne atím-ekan nyí ba/cibi kyikit kyibónge nyi a-rí i wǎ émúrúsún nyí ba/mán kanong kanong. Osówo mú mu bě wǎ mbâm ebû obónge nké o/kye bě kányí.
12Wǎn ejí, chwǒm kyikíri kyi/tôong ńkyí adatún achi ké nkyí. Banwet esáng ba*fí ne nkuli kyikû* ne nwet ekwâa chwóó o-chi i ǒ a-firi kyeekyee.
13Ké nkuli kyikû káng, chwǒm nkyi kyibónge ńkyí adaraa, a/fu, shî Osówo, a-chi eringe nyí byije emen byi/sét, ké nǎ, ńkyín kángkáng nké Osówo o/chi onet o/fu, ochi. 14Osówo o/chi o-pan bě mpan ké kángkáng byěm ḿbyí byimu byi-chi i, nang ḿbyí byinong nang ḿbyí bii*nwa* nang byěm ḿbyí byimu byi-chi i ké kadip.
Currently Selected:
Ekyilyizátes 12: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
