Sâm 98
98
Osówo nké mu Otu mú Ejíí
1Kwán n̂ okwan mú ofyîfî ba-kye Óburúkpâbí.
Nyǐ oo/chi byěm-akat.
Nyǐ oo/kpógê ne kiǐtí-busa ḿbú bubwô emen
ḿbú bu/nwa bu-shwôm.
2Óburúkpâbí o/sét dyikpóge emen,
nyǐ o/chi eshê kángkáng e-nyît busa ḿbú onyii emen.
3Nyǐ o/tî ocím emen mú o/ryí banet ḿbé Ézerel
eringe nyí nyǐ mu o-tông ng kámbé kanong emen
ne kyijé emen ḿbyí bii*man*.
Kángkáng banet nang nyá nang nyá baa/ri dyikpóge ńdyí Osówo eten.
4Kángkáng banet ké ejíí,
kwán n̂ ekwan nyí bunyîn-dyityém ba-kye Óburúkpâbí.
Kwán n̂ ekwan ké bunyîn-dyityém ne ejá kyíbóng kyíbóng ba-kpee ǎ.
5Kwán n̂ ekwan-akpee ba-kye Óburúkpâbí.
Kim m̂ ane ké ácîng.
6Jwá n̂g biintán ké bunyîn-dyityém ne ejá kyíbóng
ba-kye Óburúkpâbí mú mu Otu eten.
7Baya, cibicibi ne kángkáng byěm
ḿbyí mbyi ǒ ké kafâ, rime ê.
Ejíí, cibicibi ne kángkáng banet
ḿbé mbe ba-kyú u ǒ ké kafâ, kwán n̂ ekwan.
8Ben, ǎ buce, shwóm m̂ akwâ.
Ben, ǎ eku, cibi n̂g ejá ba-kwán ekwan ne bunyîn-dyityém
ké bushú ḿbú Óburúkpâbí,
9ké nǎ, nyǐ o-kú o-bâ ejíí mpan epan wǎ Otu.
Nyǐ o/chi o-pan ejíí mpan kerededet,
acît oo*ryí*.
Currently Selected:
Sâm 98: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
