Sâm 95
95
Okwan-Akpee
1Bâ n̂g byi-kye Óburúkpâbí akpee.
Bâ n̂g byi-kwán ekwan ké bunyîn-dyityém byi-kye Osówo mú mu o-bám m bě.
2Bâ n̂g byi-bwom ǎ ké bushú byi-kó ǎ asǎma,
byi-kwán ekwan-akpee nyí bunyîn-dyityém.
3Ké nǎ, Óburúkpâbí mu Osówo mú o/rêe o-shwôm,
mu Otu mú o/rêe o-shwôm kángkáng esówo.
4Nyǐ nké mu Otu mú ejíí emúmú,
kyi-fím ké kafâ-bucim tete kyi-ribi ké kaku ńké ka/nyâam ka-shwôm.
5Nyǐ nké mu Otu mú baya ḿbé nyǐ o/chi
ne esí nyí nyǐ oyén o/mee.
6Bâ n̂g byi-tíngê kyísí byi-fé ǎ.
Bâ n̂g byi-tím arông kyísí ké bushú-Óburúkpâbí mú o/chi bě.
7Ké nǎ, nyǐ nké mu Osówo eten.
Be nké byimu banet ḿbé nyǐ mu o-tún n.
Be nké byimu ǎ dyibóng-ebû ńdyí nyǐ mu o-nen n.
Fwôo n̂g atông ba-jwo kurún ńkyí nyǐ mu o-raa ng o/fu,
8*da n̂g erêe atyém wǎ eringe nyí banchí enen ba/mû ba/rêe ké Meryíba*
ne wǎ eringe nyí mbé ba/mû ké dyicí ándyi ńdyí ba/mû ké kyikim-dyikán ké Mása*.
9Ányi nké mbé ba/kan mě ba/fu,
me ntông kámbé ekap nang ké mbé ba/ri ńkyí me n/chi kámbé.
10Kafâ ka/mû kaa/sa mě ne banet ámbe ké bajam-aje bafee.
Me n-raa n/fu, mbé atyém ebe nyi a-tánê e a-câ.
Mbé mbe ba-né ng echi ńkyí n/fu, bachi.
11Kyi/mû kyi/sa mě, ne n-ryí ocím n/fu,
ben baa*ba/chi ba-nung ké esí nyí me m/mû n/chi n-kye běn dyijâng*.
Currently Selected:
Sâm 95: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
