Sâm 94
94
Osówo mu Nkêt Mpan mú Kángkáng Banet
1Óburúkpâbí, wo a-chi i Osówo mú mu o-kyâ banet busông.
Tông kafâ eyên wááng ńké amu a-sa ng.
2Wo amu nkêt mpan mú kángkáng banet.
Bûu a-kye bantông byiko ńkyí kyi/kwárê ne mbé.
3Bambên atyém ba-chî ng ejêe ka-rí nǎ.
Ka-chî ng erí nǎ, ǎ Óburúkpâbí.
4Banchi byibî ba-chî ng etông byiko ka-rí nǎ,
ba-tyem abwô ké kakim kyi-kim ne byibî ebe.
5Óburúkpâbí, mbé mbe ba-ju ng banet eyên.
Mbé mbe ba-cít ng bwǎn eyên.
6Mbé mbe ba-ju ng banyǐnkú ne bwǎn-byibén
ne bacinbánet ḿbé mbe ba-kyú u ké esí eten.
7Mbé mbe ba-sét ng ba/fu,
Osówo Óburúkpâbí mú Ézerel o*fí o-tún n achi o-ri ng bě*.
8Banet ejí, ebóng ben ba/róng dyizong-enyam ándyi.
Nkéré orá ben ba/chi ba-nyît chwǒm.
9Osówo nké o/chi atông eten,
nyǐ oo*jwo dí*.
Nyǐ nké o/chi achi eten,
nyǐ oo*rángê dí*.
10Eshê nyi ké bubwô emen,
nyǐ oo*ba/chi o-kye kányí busông dí*.
Nyǐ nké mu o-tángê e kángkáng banet,
nyǐ o*fí ne bubong dí*.
11Óburúkpâbí mu o-nyît ng ńkyí mbé mbe ba-kabe ng.
Nyǐ mu o-nyît ng o/fu,
okabe ebe o*da/byí chwǒm*.
12Óburúkpâbí, bunyîn-dyityém mbu ne onet
mú wo amu a-tángê e ǎ,
ne mú amu a-tángê e ǎ byije eyên.
13Wo amu a-kyâ ǎ dyijâng ké ací nyí afaníkong,
ké nǎ, ba/sím dyibíng ba-tî bambên atyém.
14Óburúkpâbí oo*ba/chi o-dim o-mîng banet emen*.
Nyǐ oo*ba/chi o-mîng bwǎn emen*.
15Ba-chî ng eri ntûntû ké esuk,
ne banet ḿbé mbe ba-chi i kanong ba/chi ba-bwom kámú ké esim.
16Yeě o/bwom ne me ké kyikû ké bushú ḿbú bambên atyém.
Yeě mu kyicê ńkyí ejí ké bushú ḿbú banchi byibî.
17Â Óburúkpâbí o/mû o*da mě echwáp*
něen m/mû nn/jé babap ké oshê-bakúsí.
18Me n/fu, me n-kú n-róng ng.
Nké kyijé eyên ńkyí kii*man* ǎ Óburúkpâbí,
kyi/níbî mě shwaneshwane.
19Nang nkéré orá nké mu n-ryú u,
wo amu a-fâ mě dyityém,
a-chi mě n-kyú ké bunyîn-dyityém.
20Wo aa*fárâng bankêt mpan ḿbé badaryí ngu*
ḿbé ba/bángê ké acît eryí*
21ḿbé mbe ba-nam m kyibî kyi-kim ne banet ḿbé banong*
ne mbe ba-két ng mpan ba/fu,
baju banet ḿbé ba*da/chi kyibî*.
22Nké Óburúkpâbí mu kyikit-dyirem ejí,
Osówo ejí mu o-ku ng mě.
23Nyǐ o/chi o-kye kámbé busông ké atyém ebe nyí ba/bên,
o-ju kámbé ké byibî ebe.
Osówo Óburúkpâbí eten o/chi o-ju kámbé.
Currently Selected:
Sâm 94: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
