Sâm 90
90
Eringe nyí Osówo ne Onet mbe
1Óburúkpâbí, wo nké amu bě [kyikit] ńkyí byidakyú kángkáng nkéré.
2Wo a/mû Osówo mú ne banyá ne a-kûchi eku ne ejíí,
ne wo a/chi a-waa Osówo ne banyá.
3Wo amu a-sét ng onet a/fu,
oyángê o-firi eringe nyí o/mû.
Wo a-yángê e ǎ o-bírî ecing.
4Égot-aje etánge nyi ǒ wǎ dyicí dyibónge.
Nyǐ nyi wǎ kyísóng mú oo/shwôm.
Nyi wǎ kaǎkím-nkéré ńké buchú.
5Wo amu a-kpaa ng bě wǎ kiǐsúsú-kace ńké kadakpaa byěm.
Dyikpen eten ndyi kaǎkím wǎ burê eri.
Be byimu éné wǎ biǐbyâa ḿbyí byidabyí ké dyicófóróng,
6ḿbyí byidakán byi-chi ekong nyí enong,
ne ké dyikurúku byi-jwóm byi-kpú.
7Kafâ eyên esa nké nke ka-ju ng bě.
Kafâ eyên esa nké nke ka-chi i bě byi-shî.
8Wo amu a-yip ng byibî eten a-tî ké kashú eyên,
ké kyikit ńkyí adari byibî eten ḿbyí byi/chi ké kadip.
9Kafâ eyên esa kaa/chi akpen eten a-firi boǒkím.
A-kú a-rím m éné wǎ byiraa-booju.
10Aje nyí dyikpen eten nyi bajam bachât esim diǐkpú.
Bajam banyii â byimu byi-shwane e.
Nang ké nkyi éné,
nyǐ nyi a-bâ bě ne afaníkong ne bafip.
Kaǎnyín-nkéré, dyikpen dyi-man,
ne be byi-jâ.
11Yeě oo/fwôo kángkáng busa ḿbú kafâ esa eyên.
Yeě mu o-nyît ng dyizong-bushî ḿbú kafâ esa eyên
nke ka-bâ ne mbú.
12Tángê bě byi-nyît byi/fu,
akpen eten nyi boǒkím eringe be byidakyú ne bubong.
13Kafâ eyên esa ka/chi ka-chîrí nǎ.
Óburúkpâbí, ri bǎmgbán eyên bafip.
14Chi atyém eten a-sú ne kyijé eyên ńkyí kii*man*
kángkáng dyicófóróng,
eringe nyí be byi/chi byi-kûkwán ké bunyîn-dyityém
kángkáng dyikpen eten.
15Kye bě bunyîn-dyityém chwóó kántîk
wǎ eringe nyí aa/kye bě bafip
ké kángkáng aje eten nyí afaníkong.
16Mîng bě be mú bǎmgbán eyên byi-ri biǐtí-byěm eyên ḿbyí amu a-chi i.
Mîng bwǎn eten ba-ri kiǐtí-busa eyên.
17Osówo Óburúkpâbí eten,
kyi/bát ojware eyên okyú ne be.
Chi bě byi-kpógê ké kángkáng byěm ḿbyí byimu byi-chi i.
Currently Selected:
Sâm 90: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
