Sâm 89
89
Okwan mú Nkéré mú Oshê mu o-ri ng Afaníkong
1Óburúkpâbí, me n/chi n-kwán ekwan kángkáng nkéré
n-kim ne kyijé eyên ńkyí kii*man*.
Me n/chi n-sét kángkáng nkéré
kyi-kim ne eringe nyí wo amu a-tî ng ocím eyên mú a/ryí.
2Me mu n-nyît ng n/fu,
kyijé eyên kyi-waa ng kángkáng nkéré.
Ocím eyên mú a/ryí o-waa ng ne banyá wǎ bubóng.
3Wo a/sét a/fu, wo aa/ryí ocím a-sem byiko eyên ne onet mú wo a/cá.
Wo aa/ryí Otu Dívit mú ḿgbán eyên ocím a/fu,
4onet-kyikû emen o/chi o-kyú otu kángkáng nkéré.
A/fu, wo a/chi a-tî kyikû-butu emen kyi-waa ne banyá.
5Kángkáng barím ḿbé banong kyíbóng mbe ba-kwán n ekwan
kyi-kim ne biǐtí-byěm ḿbyí wo amu a-chi i.
Mbé mbe ba-kwán n ekwan
kyi-kim ne eringe nyí wo amu a-tî ng ocím eyên mú wo a/ryí, ǎ Óburúkpâbí.
6Óburúkpâbí, onet o*fí nang obónge kyíbóng mú mu wǎ wo*.
Chwǒm kyi*fí kyíbóng ńkyí nkyi jangjang ne wo*.
7Wo amu ne ofê ké ncibi mú byěm ḿbyí mbyi kyíbóng,
ne mbyí kángkáng ba-shî ng ǒ kanong kanong.
8Osówo Óburúkpâbí mú o/rêe o-shwôm,
onet o*fí mú o/rêe wǎ wo*.
Wo amu a-tî ng ocím eyên mú a/ryí ké kángkáng byěm,
ǎ Óburúkpâbí.
9Busa ḿbú baya ḿbé baryên mbu ké abwô eyên.
Wo amu a-chi i kámbé ba-mîng enáng.
10Wo a/ju kiǐnyám-Ráhap,
a-kpógê banet-bushwôn eyên ké kiǐtí-busa eyên.
11Bubóng ne esí byi/já ǒ wo.
Wo a/chi ejíí ne kángkáng byěm ḿbyí mbyi ké nyǐ.
12Wo nké a/chi ejíí emúmú.
Kaku ńké Tábo ne ńké Hémon mbu bu-kyâ dyizîn eyên akpee ké bunyîn-dyityém.
13Wo amu ne busa ḿbú bu/rêe kanong kanong.
14Butu eyên bu/bwom ké kanong echi ne ntûntû.
Kángkáng byěm ḿbyí amu a-chi i mbyi byi-tông ng kyijé
ne eringe nyí amu a-tî ng ocím eyên mú a/ryí.
15Bunyîn-dyityém bu/jê banet ḿbé mbe ba-kyâ ǒ ofê ké ekwan,
ḿbé mbe ba-kpen n ké kiinwángé ńkyí kanong eyên.
16Ké kyirim-dyicí kángkáng,
mbé mbe ba-jêe ng ké dyishí eyên,
ne mbe ba-kpee ng ǒ ké kanong eyên.
17Wo a-chi i bě byi-kpógê biǐtí-banet-bushwôn eten.
Ké kyijé eyên, wo a/chi bě byi-kpógê.
18Óburúkpâbí, wo nké a/cá onet-onyii eten.
Wo, ǎ Osówo mú Ézerel mú o/nwa o-shwôm nké a/kye bě otu eten.
Ocím mú Osówo o/ryí Otu Dívit
19Ké chwǒm-akat ńkyí bǎmgbán eyên ba/ri
ké nkéré mú o/shwôm ké esim,
wo a/sét kámbé a/fu,
wo aa/kye kiǐtí-nnwa byití ochwâp.
Wo aa/kye onet mú wo a/cá ké burwám-banet kakyúng-butu.
20Wo aa/chi Otu Dívit mú ḿgbán eyên otu
ké bakút ḿbé banong ḿbé wo a/yip a-jware ǎ.
21Busa eyên bu/chi bu-kyú ne nyǐ kángkáng nkéré.
Busa eyên bu/chi bu-chi ǎ o-shwane.
22Banet-bushwôn emen baa*ba/chi ba-kpógê ǎ ne banyá*.
Byibî-banet bii*ba/chi byi-kpógê ǎ*.
23Wo a/chi a-man ne banet-ociring emen
a-ju nang yeě mú mu o-sa ng kafâ ne nyǐ.
24Kyijé eyên ńkyí kii*man* ne ocím eyên mú a/ryí byi/chi byi-waa ne nyǐ.
Wo a/chi a-chi ǎ o-kpógê kángkáng nkéré.
25Wo a/chi a-chi butu emen bu-fím ké baya ḿbé Medeterényan
bu-nere tete bu-ribi kace ńké Yuférétyis.
26Nyǐ o/chi o-sét ǒ o/fu,
wo a-chi i Bonchí ne Osówo emen, o/fu,
wo a-chi i Onet-Oku ne Onet-Onyii emen.
27Wo a/chi a-chi ǎ mbwôp kashú-wǎn eyên
ne otu mú o/rêe o-shwôm kángkáng batu.
28Wo a/chi a-tî ocím eyên mú a/ryí ne nyǐ a-sem byiko eyên,
ne ocím mú a/ryí ne nyǐ o/chi o-waa ne banyá.
29Wo a/chi a-chi kyikû-butu emen kyi-waa ne banyá wǎ bubóng,
ne onet-kyikû emen obónge o/chi o-kyú otu kángkáng nkéré.
30-31Nké â bwǎn emen ba/né echi ńkyí byije eyên byi/sét,
ne ba*da/kyú eringe nyí wo a/kye busa*
32wo kâng a/chi a-kye kámbé busông ké dyishí-byibî ebe.
Wo a/chi a-chi kámbé ba-ri afaníkong
ké chwǒm ńkyí mbé ba*da/man echi*.
33Nké Otu Dívit oo*ba/chi o-mîng ǒ wo ejê*
a-bên nang ocím eyên mú a/ryí ǎ*.
34Wo aa*ba/chi a-bên ocím mú a/ryí ne nyǐ*
a-yángê ocím nang obónge mú a/ryí ǎ*.
35Kabónge kyi-man éné nké wo a/ryí ǎ ocím a-sem dyizîn eyên a/fu,
wo aa*ba/chi a-sét Otu Dívit kyisédéng ne banyá*.
36A/fu, nyǐ o/chi o-já banet ké kyikû emen kángkáng nkéré,
ne wo a/chi a-kûbám kyibám-butu emen tete óbyísû o-mîng esan.
37Kyibám-butu emen kyi/chi kyi-waa wǎ otukáku
mú mu wǎ ntûesé mú bubóng mú badafé dyityém ne nyǐ.
Bukyû etii ké Otu mú ba/kpógê
38Nké wo nkyi kyi-sa ng ǒ ne otu mú wo a/cá.
Wo aa/né ǎ a-dim a-mîng ǎ.
39Wo aa/bên ocím eyên mú a/ryí ne a-sem byiko eyên ne ḿgbán eyên,
a-pii etam-butu emen a-twóp ké biǐntóng.
40Wo aa/bú ekpe nyí ba/bi ba-wáp oshê emen
a-bên kyikit-dyirem emen.
41Kángkáng banet ḿbé mbe ba-shwôm m fáráng ba-kú ba-jii ng ǎ byěm,
kángkáng barî-banet emen ba-kú ba-jwó ng ǎ.
42Wo aa/chi banet-bushwôn emen ba-kpógê.
Wo aa/chi kámbé kángkáng ba-firi ké bunyîn-dyityém.
43Wo aa/chi byiyám-byití emen byi-waa kyísí dyikáá,
a-chi ba-kpógê ǎ ké byití.
44Wo aa/koo [kashwám-butu] emen,
a-jê kakyúng-butu emen a-twóp kyísí.
45Wo aa/chi ǎ o-kâa ne nkéré emen o-kûfyi,
ne aa/cít ǎ ne éshwân.
Nshwam mú Osówo o/chi o-nyii Bě
46Óburúkpâbí, wo a/chi a-rôo byiko eyên ne banyá?
Kafâ eyên ńké nke ka-mang ng ǒ wǎ okwâ ka-rí i nǎ.
47Wo amu a-nyît ng a/fu,
dyikpen ńdyí onet dyi*da/tíbî*.
Wo amu a-nyît ng a/fu,
wo a/chi bě a/fu, byikpú.
48Yeě odakpen oo*kpú ne banyá*.
Onet o-cen n nǎ ne o-fem enung ké dyikun.
49Óburúkpâbí, ekap nyí kpákpá
nyí nyi e-tông ng kyijé eyên e/jé nyá.
Ocím mú a/ryí Otu Dívit o/jé nyá.
50*Daráp ecábé nyí [mbe ba-kyâ mě me mú ḿgbán eyên*.]
Me n-cen n nǎ ne m-bwom kángkáng [byibî-banshwam]
ḿbyí banshâng bakye mbe ba-fâ ba-kyâ mě.
51Óburúkpâbí, banet-bushwôn eyên mbe ba-cábê ng otu eyên mú a/cá.
Mbe ba-cábê ng ǎ nang nyá nké nyǐ o/ce.
52Kye Óburúkpâbí akpee ne banyá ne banyá.
Kyi/bát kyikyú éné kerededet.
Currently Selected:
Sâm 89: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
