Sâm 9
9
N/kó Osówo Asǎma ké Mpan Emen mú oo*ryí Acît*
1Óburúkpâbí, me n/chi m-kpee ǒ ne dyityém ejí kángkáng.
Me n/chi n-sét kyi-kim ne kángkáng biǐtí-byěm ḿbyí wo aa/chi.
2Me n/chi n-kwán ekwan ne bunyîn-dyityém ké bubwô eyên.
Óburúkpâbí mú o/rêe o-shwôm,
me n/chi n-kwán ekwan-akpee n-kye ǒ.
3Banet-bushwôn ejí ba-bwa ng esim ké bushú eyên.
Mbé ba-myii ng kyísí ba-kpú.
4Wo aa*ryí acît ké bampan eyên ḿbé amu a-két ng*
ne wo aa/két mpan o-nwa mě.
5Wo aa/két mpan o-bên banet ḿbé baa*nyît ǒ*
ne aa/man ne bambên atyém.
Baa*ba/chi ba-chîzîim kyi-kim ne mbé*.
6Banet-bushwôn eten baa/man ne banyá.
Wo aa/bên eshê ebe
ne baa/ráp kángkáng kyi-kim ne mbé.
7Nké Óburúkpâbí mu Otu ne banyá.
Nyǐ oo/nap kakyúng-butu emen o-tî ké mpan epan.
8Nyǐ mu o-kyú u Otu mú ejíí ne kanong echi.
Nyǐ oo*ryí acît ké mpan mú nyǐ mu o-két ng eshê*.
9Óburúkpâbí nké mu kyikit-dyirem ńkyí banet ḿbé mbe ba-cít ng kámbé.
Nkyi kyikit ńkyí onet odafem ké nkéré afaníkong.
10Óburúkpâbí, banet ḿbé mbe ba-nyît ng ǒ
ba/chi ba-tî dyityém ké wo.
Wo a*fí a-ró ng onet nang obónge
mú mu o-bâ o-kâm ǒ*.
11Kwán ekwan-akpee a-kye Óburúkpâbí
mú mu Otu mú Záyon.
Sét eshê kángkáng kyi-kim ne ḿbyí nyǐ oo/chi.
12Osówo mu o-zîim m banet ḿbé mbe ba-ri ng busông.
Nyǐ o*fí o-ráp ng bukyû ebe ḿbú mbe ba-tî ng*
ne nyǐ mu o-kyâ banet ḿbé mbe ba-chi i kámbé byibî busông.
13Ô Óburúkpâbí, ri mě bafip.
Ri busông ḿbú banet-bushwôn ejí mbe ba-chi i mě n-ri.
Ô Óburúkpâbí, nyii mě ké abwô nyí bukyû,
14eringe nyí me ndaman ebwom
ké bushú-banet-Jerúsélem
n-sét kámbé kángkáng byěm
ḿbyí me mu n-kyâ ǒ akpee.
Me n/chi n-jêe, ké nǎ, wo aa/nyii mě.
15Banet ḿbé baa*nyît ǒ* baa/sím dyibíng
ne baa/róng ké kafâ-kaǎtám ńké mbé ba/kuu.
Kaa/kám kámbé mbé bayén.
16Óburúkpâbí oo/tông byiko emen wááng
ké kanong emen ńké mu o-chi i ké bampan ekét,
ne bambên atyém baa/róng ké kaǎtám
ńké byibî-byěm ḿbyí mbé mbe ba-chi i.
17Bambên atyém ne kángkáng banet ḿbé mbe ba-né ng Osówo ba-man ba-kpú.
18Ké nǎ, Osówo oo*ba/chi o-né banet ḿbé mbe ba-ri ng afaníkong kángkáng nkéré*
ne achi etî nyí banet-kyikpu aa*tánê ne banyá*.
19Óburúkpâbí, bâ.
*Dabángê banet ba-shwane ba-shwôm ǒ*.
Bâ ne banet ḿbé baa*nyît ǒ* ba-bwom ké bushú eyên
a-két kámbé mpan.
20Óburúkpâbí, chi kámbé ba-kû ǒ eshî.
Chi kámbé ba-nyît ba/fu,
mbé ba-chi i banet ḿbé badakpú.
Currently Selected:
Sâm 9: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
